យោងតាមការផ្សាយរបស់សារព័ត៌មាន Khaosod នៅថ្ងៃសៅរ៍នេះបានឱ្យដឹងថា សេចក្តីសម្រេចរបស់តុលាការឧក្រិដ្ឋកម្មទីក្រុងបាងកកគឺជាលើកទីពីរហើយក្នុងឆ្នាំនេះ ដោយបានរកឃើញថា ក្រុមបាតុករមួយចំនួនដែលប្រឆាំងនឹងរដ្ឋាភិបាលដឹកនាំដោយសម្ព័ន្ធមិត្តរបស់អតីតនាយករដ្ឋមន្ត្រី លោកថាក់ស៊ីន ស៊ីណាវ៉ាត្រា មិនបានប្រព្រឹត្តបទល្មើសព្រហ្មទណ្ឌធ្ងន់ធ្ងរនៅក្នុងសកម្មភាពរបស់ពួកគេឡើយ។ ហើយតុលាការបានសម្រេចកាលពីថ្ងៃសុក្រថា ការតវ៉ានៅអាកាសយានដ្ឋានត្រូវបានការពារនៅក្រោមរដ្ឋធម្មនុញ្ញ ដោយសារតែក្រុមអ្នកតវ៉ាមិនមានអាវុធ នេះបើតាមការផ្សាយជាសាធារណៈ Thai PBS និងកាសែតថៃរ៉ាត់។

យ៉ាងណាមិញសម្រាប់ មនុស្ស ៦៧នាក់នៅក្នុងសំណុំរឿងកាលពីថ្ងៃសុក្រ ត្រូវបានតុលាការចោទប្រកាន់ជារួម ក្នុងនោះរួមទាំងការបះបោរ និងអំពើភេរវកម្មដែលនាំឱ្យមានការកាត់ទោសប្រហារជីវិត។

សូមជម្រាបជូនថា ជនជាប់ចោទរាប់សិបនាក់ដែលពាក់ព័ន្ធនឹងការតវ៉ានៅអាកាសយានដ្ឋានឆ្នាំ ២០០៨ ត្រូវបានបែងចែកជាពីរក្រុម ហើយត្រូវបានចោទប្រកាន់ក្នុងឆ្នាំ ២០១៣ ។ ក្រុមទីមួយត្រូវបានដោះលែងកាលពីខែមករា ឆ្នាំ ២០២៤ ហើយក្នុងនោះមានមនុស្សប្រហែល ១០នាក់ត្រូវបានពិន័យជាប្រាក់ចំនួន ២០.០០០០ បាត (៥៥០ ដុល្លារ) សម្រាប់ការរំលោភលើក្រឹត្យបន្ទាន់មួយដែលបានហាមឃាត់ការប្រមូលផ្ដុំជាសាធារណៈ ។

ជាមួយគ្នានេះសម្រាប់ក្រុមបាតុករ អាវលឿង ដែលគេស្គាល់ថាជាក្រុមបង្ហាញពីភាពស្មោះត្រង់ចំពោះរាជានិយមថៃ បានកាន់កាប់ព្រលានយន្តហោះដុនមឿង និងសុវណ្ណភូមិ។ ពួកគេបានទាមទារឱ្យមានការលាលែងពីតំណែងរបស់រដ្ឋាភិបាលដែលស្មោះត្រង់នឹងលោកថាក់ស៊ីន ដែលត្រូវបានបណ្តេញចេញពីអំណាចដោយរដ្ឋប្រហារយោធាឆ្នាំ ២០០៦ បន្ទាប់ពីការតវ៉ារបស់ក្រុមអាវលឿងដ៏ធំ ដោយចោទប្រកាន់គាត់(លោក ថាក់ស៊ីន) ពីបទពុករលួយ និងការមិនគោរពរបបរាជានិយម។ កាលនោះក្រុមបាតុករបានបិទប្រតិបត្តិការព្រលានយន្តហោះ និងបានផ្គើននឹងដីកាអំពាវនាវឱ្យពួកគេចាកចេញ។ ការឡោមព័ទ្ធបានបញ្ចប់ បន្ទាប់ពីសេចក្តីសម្រេចរបស់តុលាការបានបង្ខំ នាយករដ្ឋមន្ត្រី Somchai Wongsawat ដែលជាប្អូនថ្លៃរបស់លោកថាក់ស៊ីន ចេញពីតំណែង។

ក្នុងឆ្នាំ ២០១១ តុលាការរដ្ឋប្បវេណីបានបញ្ជាឱ្យមេដឹកនាំក្រុមនេះបង់ប្រាក់ចំនួន ៥២២លានបាត (១៤.៧ លានដុល្លារ) ជាការខូចខាតដល់អាជ្ញាធរអាកាសយានដ្ឋានរដ្ឋ ៕

ប្រែសម្រួលដោយ÷ ប៉ោ កុសល

The post តុលាការឧក្រិដ្ឋកម្មទីក្រុងបាងកក កាត់ទោសមនុស្សជិត ៧០នាក់ពាក់ព័ន្ធនឹងការតវ៉ាដ៏ធំ កាលពីឆ្នាំ ២០០៨ appeared first on Kampuchea Thmey Daily.

ប្រភពបានឱ្យដឹងថា នៅក្នុងការសម្រេចចិត្តជាឯកច្ឆ័ន្ទ តុលាការយុត្តិធម៌អន្តរជាតិ (ICJ) បាននិយាយថា អ៊ីស្រាអែលត្រូវតែធ្វើសកម្មភាព “ដោយគ្មានការពន្យាពេល” ដើម្បីអនុញ្ញាតឱ្យ “ការផ្តល់នៃសេវាមូលដ្ឋាន និងជំនួយមនុស្សធម៌ដែលត្រូវការជាបន្ទាន់” ។ ការសម្រេចរបស់តុលាការអង្គការសហប្រជាតិនេះ ធ្វើឡើងបន្ទាប់ពីមានការព្រមានថា ទុរ្ភិក្សអាចវាយលុកតំបន់ហ្គាហ្សាក្នុងរយៈពេលប៉ុន្មានសប្តាហ៍ខាងមុខ ខណ:ដែលអ៊ីស្រាអែលឯនោះវិញ បានចាត់ទុកថា អន្តរជាតិកំពុងមើលមកខ្លួនថា បានរារាំងជំនួយដោយគ្មានមូលដ្ឋានទាំងស្រុង ។

ជាការឆ្លើយតបរបស់ខ្លួនចំពោះដីការបស់តុលាការ ក្រសួងការបរទេសអ៊ីស្រាអែលបាននិយាយថា ខ្លួនកំពុងបន្ត “លើកកម្ពស់គំនិតផ្តួចផ្តើមថ្មី និងពង្រីកសកម្មភាពដែលមានស្រាប់” ដើម្បីអនុញ្ញាតឱ្យមានលំហូរជាបន្តបន្ទាប់នៃជំនួយទៅកាន់តំបន់ហ្គាហ្សា “តាមផ្លូវគោក ផ្លូវអាកាស និងសមុទ្រ” ដោយធ្វើការជាមួយអង្គការសហប្រជាជាតិ និងមធ្យោបាយផ្សេងទៀត។

ប្រភពដដែលបានឱ្យដឹងទៀតថា សេចក្តី សម្រេចចុងក្រោយ របស់តុលាការនៅទីក្រុងឡាអេ ធ្វើឡើងបន្ទាប់ពីប្រទេសអាហ្រ្វិកខាងត្បូងបានស្នើឱ្យខ្លួនពង្រឹង និងចាត់វិធានការទាំងអស់ដើម្បីការពារអំពើប្រល័យពូជសាសន៍នៅក្នុងតំបន់ហ្គាហ្សា។ អាហ្រ្វិកខាងត្បូងបាននិយាយថា ខ្លួនមានកាតព្វកិច្ចក្នុងការទប់ស្កាត់អំពើប្រល័យពូជសាសន៍ក្នុងនាមជាប្រទេសហត្ថលេខីនៃ អនុសញ្ញាប្រល័យពូជសាសន៍ឆ្នាំ ១៩៤៨ របស់អង្គការសហប្រជាជាតិ។ ប្រទេសនេះបានរិះគន់យ៉ាងខ្លាំងចំពោះប្រតិបត្តិការយោធារបស់អ៊ីស្រាអែលនៅតំបន់ហ្គាហ្សា ។

មួយវិញទៀត សេចក្តីសម្រេចរបស់ ICJ ក៏ធ្វើឡើងបន្ទាប់ពី របាយការណ៍មួយដោយ Integrated Food Security Phase Classification Global Initiative ដែលគ្រប់គ្រងដោយកម្មវិធីស្បៀងអាហារពិភពលោក និងកម្មវិធីផ្សេងទៀតត្រូវបានបោះពុម្ពផ្សាយកាលពីសប្តាហ៍មុន ដោយព្រមានថាស្ថានភាព “មហន្តរាយ” កំពុងវិវត្តនៅក្នុងហ្គាហ្សា ៕

ប្រែសម្រួលដោយ÷ ប៉ោ កុសល

The post តុលាការកំពូលរបស់អង្គការសហប្រជាជាតិបញ្ជាឱ្យអ៊ីស្រាអែលបើកលំហូរជំនួយមនុស្សធម៌ទៅតំបន់ហ្គាហ្សា បន្ទាន់ appeared first on Kampuchea Thmey Daily.

ជាក់ស្តែងក្រុមហ៊ុនឈានដល់ការបញ្ជាទិញចំនួន ១០.០០០គ្រឿង បន្ទាប់ពីរយៈពេល ៤នាទីដំបូងនៃកម្មពិធីប្រកាសជាផ្លូវការណ៍ ហើយបន្ទាប់មក នៅនាទីទី៧ ការបញ្ជាទិញ កើនឡើងរហូតដល់ ចំនួន ២០.០០០ គ្រឿង។ ហើយកាន់តែភ្ញាក់ផ្អើលបំផុតនោះគឺ យីហោរថយន្តអគ្គិសនីវ័យក្មេងនេះ លក់បាន ៥០.០០០ គ្រឿង បន្ទាប់ពីបើកការបញ្ជាទិញរយៈពេល ២៧នាទី។

យោងតាមគេហទំព័រ My Driver បានកត់សម្គាល់ថា ក្នុងចំណោមការបញ្ជាទិញដែលបានបញ្ជាក់ចំនួន ៥០.០០០ គ្រឿង ក្នុងនោះមានរថយន្តចំនួន ៥.០០០ គ្រឿងស្ថិតនៅក្នុងកំណែ Foundation Edition ។ អ្នកដែលបញ្ជាទិញម៉ូដែលនេះអាចផ្លាស់ប្តូរជម្រើសនៃការកំណត់រចនាសម្ព័ន្ធ ឬស្នើសុំការបង្វិលសងប្រាក់កក់ ប្រសិនបើពួកគេផ្លាស់ប្តូរចិត្តក្នុងរយៈពេល ៧ថ្ងៃ។ ដូច្នេះ កម្រិតនៃការលក់ពិតប្រាកដនឹងត្រូវបានបញ្ជាក់ក្នុងរយៈពេលពីរបីសប្តាហ៍បន្ទាប់ ។

តាមការបង្ហាញរបស់ Xiaomi បានឱ្យដឹងថា តម្លៃចាប់ផ្តើមនៃម៉ូដែល SU7 គឺ ២១៥.៩០០ យន់ (៣ម៉ឺនដុល្លារ) ថោកជាង Tesla Model 3 ដែលជាគូប្រជែងផ្ទាល់របស់រថយន្តនេះនៅក្នុងទីផ្សារប្រទេសចិន។ លើសពីនេះ Xiaomi ក៏ផ្តល់ជូននូវជម្រើសម៉ូដែល Pro តម្លៃ ២៤៦.០០០ យន់ (៣៤.០០០ ដុល្លារ) និង ម៉ូដែល Max តម្លៃ ៣០០.០០០ យន់ (៤១.៥០០ ដុល្លារ) សម្រាប់អតិថិជនងាយស្រួលសម្រេចចិត្តជ្រើសរើសផងដែរ។

ជាមួយគ្នានេះ លោក Lu Weibing ប្រធានក្រុមហ៊ុន Xiaomi បាននិយាយថា គោលដៅរបស់រថយន្តអគ្គិសនី Xiaomi គឺដើម្បីក្លាយជារថយន្តអគ្គិសនីដែលលក់ដាច់បំផុតទាំង ៣ នៅក្នុងប្រទេសចិន។ បើប្រៀបធៀបជាមួយការលក់របស់ដៃគូប្រកួតប្រជែងដូចជា Tesla Model 3, Ji Krypton 001, Weilai ET5… ប្រព័ន្ធផ្សព្វផ្សាយបានព្យាករណ៍ថាបរិមាណលក់ដែលចង់បានរបស់ Xiaomi ក្នុងឆ្នាំដំបូងគឺ ៦០.០០០ គ្រឿង។

សូមជម្រាបផងដែរថា ម៉ូដែល SU7 របស់ក្រុមហ៊ុន Xiaomi ត្រូវបានប្រកាសជាលើកដំបូងនៅក្នុងខែធ្នូ ឆ្នាំ ២០២៣។ ចំពោះការរចនារថយន្តនេះ មើលទៅដូចគ្នាច្រើនជាមួយផលិតផលរបស់ Porsche ៕

ប្រែសម្រួលដោយ÷ ប៉ោ កុសល

The post ក្រុមហ៊ុន Xiaomi លក់រថយន្តអគ្គិសនីចំនួន ៥ម៉ឺនគ្រឿងក្នុងរយៈពេលតិចជាងកន្លះម៉ោង appeared first on Kampuchea Thmey Daily.

សារព័ត៌មានខាងលើបាននិយាយថា សេចក្តីព្រាងច្បាប់នេះ ទាមទារឱ្យមានការអនុម័តពីព្រឹទ្ធសភា និងការយល់ព្រមពីព្រះមហាក្សត្រ មុនពេលដែលច្បាប់នេះក្លាយជាច្បាប់ពេញលេញ។ លើសពីនេះវាក៏ទាមទារឱ្យមានការគាំទ្រពីគណបក្សធំៗទាំងអស់របស់ប្រទេសថៃ ហើយត្រូវបានអនុម័តដោយសមាជិកសភាចំនួន ៤០០ រូប ក្នុងចំណោមសមាជិកសភា ៤១៥ រូបដែលមានវត្តមាន ។

លោក Danuphorn Punnakanta ប្រធានគណៈកម្មាធិការសភាលើសេចក្តីព្រាងច្បាប់នេះ បានប្រាប់សមាជិកសភាមុនការអានសេចក្ដីព្រៀងថា “យើងបានធ្វើនេះសម្រាប់ប្រជាជនថៃទាំងអស់ដើម្បីកាត់បន្ថយភាពខុសគ្នានៅក្នុងសង្គម និងចាប់ផ្តើមបង្កើតសមភាព” ។

សូមជម្រាបថា ការអនុម័តសេចក្តីព្រាងច្បាប់នេះ គឺជាជំហានដ៏សំខាន់មួយ ឆ្ពោះទៅរកការពង្រឹងជំហររបស់ប្រទេសថៃ ក្នុងឋានៈជាសង្គមសេរីបំផុតមួយរបស់អាស៊ី លើបញ្ហាស្រឡាញ់ភេទដូចគ្នា ជាមួយនឹងការបើកចំហ និងអាកប្បកិរិយាសេរី ដែលរួមរស់ជាមួយតម្លៃព្រះពុទ្ធសាសនាបែបប្រពៃណី និងអភិរក្សនិយម ៕

ប្រែសម្រួលដោយ÷ ប៉ោ កុសល

The post ថៃកំពុងបង្ខិតប្រទេសរបស់ខ្លួនចំពោះការស្រឡាញ់ភេទដូចគ្នាឱ្យស្របច្បាប់ appeared first on Kampuchea Thmey Daily.

យោងតាមរបាយការណ៌លក់ក្នុងប្រទេសចិន Counterpoint ដែលបង្ហាញដោយសារព័ត៌មាន Zing news បានឱ្យដឹងថា ក្នុងរយៈពេល ៦ សប្តាហ៍ដំបូងនៃឆ្នាំ ២០២៤ ការលក់ទូរស័ព្ទ iPhone បានធ្លាក់ចុះ ២៤% បើធៀបនឹងឆ្នាំមុន។ទន្ទឹមនឹងនេះ ការលក់របស់ក្រុមហ៊ុន Huawei ដែលជាគូប្រជែងក្នុងស្រុករបស់ Apple បានកើនឡើង ៦៤% ។

ប្រភពបាននិយាយថា ការច្របាច់ករបស់សហរដ្ឋអាមេរិកមកលើប្រទេសចិន និងភាពតានតឹងផ្នែកពាណិជ្ជកម្មបច្ចេកវិទ្យា បានបណ្តាលឱ្យជនជាតិចិននឿយណាយ ក្នុងការចាប់កាន់ប្រើប្រាស់ទូរស័ព្ទដៃដែលផលិតដោយក្រុមហ៊ុនអាមេរិក ដូច្នេះហើយកត្តានេះបានធ្វើឱ្យម៉ាកយីហោក្នុងស្រុកឈានមុខគេគឺ Huawei ចាប់ផ្ដើមរៀនរស់ដោយខ្លួនឯង រហូតទទួលបានជោគជ័យជាថ្មី ។

លោកស្រី Linda Sui នាយកជាន់ខ្ពស់នៃក្រុមហ៊ុនស្រាវជ្រាវ TechInsights បានប្រាប់កាសែត New York Times ថា “យុគមាសរបស់ Apple នៅក្នុងប្រទេសចិនបានបញ្ចប់ហើយ” ។ យោងតាមអ្នកជំនាញ ហេតុផលដ៏ធំបំផុតមួយគឺការបង្កើនភាពតានតឹងរវាងសហរដ្ឋអាមេរិក និងចិនជុំវិញពាណិជ្ជកម្ម និងបច្ចេកវិទ្យា។ ប្រសិនបើភាពតានតឹងភូមិសាស្ត្រនយោបាយមិនធូរស្រាលទេ វានឹងពិបាកសម្រាប់ Apple ក្នុងការរក្សាជំហររបស់ខ្លួននៅក្នុងប្រទេសចិន។ លោកស្រីបន្តថា “បញ្ហាមិនគ្រាន់តែមកពីអ្នកប្រើប្រាស់ទេ វាក៏ទាក់ទងទៅនឹងរូបភាពរួមផងដែរ នៅពេលដែលមហាអំណាចទាំងពីរប្រឈមមុខដាក់គ្នា។ នេះ​គឺ​ជា​ដើម​ចម​ដែល​នៅ​ពី​ក្រោយ​រាល់​បញ្ហា​ប្រឈម​របស់ Apple” ។

សម្រាប់មនុស្សមួយចំនួននៅក្នុងប្រទេសចិន ការទិញទូរស័ព្ទមិនខុសពីការប្រកាសជំហរនយោបាយនោះទេ។ នៅលើបណ្តាញទំនាក់ទំនងសង្គម ការជជែកដេញដោលជាបន្តបន្ទាប់បានផ្ទុះឡើងជុំវិញថាតើការប្រើប្រាស់ iPhone គឺជាការប្រមាថដល់ក្រុមហ៊ុនបច្ចេកវិទ្យារបស់ចិន ហើយកាល​ពី​ឆ្នាំ​មុន ទីភ្នាក់ងារ​រដ្ឋាភិបាល​ចិន​មួយ​ចំនួន​បាន​ចេញ​បទប្បញ្ញត្តិ​ហាម​បុគ្គលិក​មិន​ឱ្យ​ប្រើ iPhone សម្រាប់​ការងារ ដោយបទប្បញ្ញត្តិនេះបានលេចឡើងតិចជាង ២ សប្តាហ៍បន្ទាប់ពីក្រុមហ៊ុន Huawei បានចាប់ផ្តើមបញ្ចេញស្មាតហ្វូន Mate 60 Pro ដែលជាស្មាតហ្វូនបំពាក់ដោយប្រព័ន្ធប្រតិបត្តិការ “ក្នុងស្រុក” ។ ប្រព័ន្ធ​ផ្សព្វផ្សាយ​ចិន​បាន​ហៅ​ថា​នេះ​ជា​ជ័យជម្នះ​សម្រាប់​ក្រុមហ៊ុន Huawei ដែលបានប្រឆាំង​នឹង​ការ​ខិតខំ​ប្រឹងប្រែង​របស់​រដ្ឋាភិបាល​ក្រុង​វ៉ាស៊ីនតោន​ក្នុង​ការ​កម្រិត​ការ​អភិវឌ្ឍ​បច្ចេកវិទ្យារបស់ប្រទេសចិន។

យោងតាមទិន្នន័យពី Counterpoint ការលក់របស់ក្រុមហ៊ុន Huawei បានដណ្ដើមទីផ្សារស្មាតហ្វូនទាំងមូលក្នុងរយៈពេល ៦ សប្តាហ៍ដំបូងនៃឆ្នាំ ២០២៤ ដែលធ្វើឱ្យក្រុមហ៊ុនកាន់កាប់ចំណែកទីផ្សារធំទីពីរនៅក្នុងទីផ្សារស្មាតហ្វូនរហូតដល់ ១៧% ។

សូមជម្រាបជូនផងដែរថា យោងតាម កាសែត New York Times ក្រុមហ៊ុន Apple បានចាប់ផ្តើមលក់ iPhones នៅក្នុងប្រទេសចិនក្នុងឆ្នាំ ២០០៩ ហើយលើកចុងក្រោយដែល Apple បានបាត់បង់តំណែងក្នុងការប្រកួតប្រជែងជាមួយក្រុមហ៊ុន Huawei គឺនៅឆ្នាំ ២០១៩ ។ ប៉ុន្តែភ្លាមៗនោះ រដ្ឋបាលលោក Donald Trump បាន “ពន្យារអាយុជីវិត” របស់ Apple តាមវិធីដាក់កម្រិតបច្ចេកវិទ្យារបស់ចិន តាមរយៈការកាត់ផ្ដាច់ទំនាក់ទំនងពាណិជ្ជកម្មបច្ចេកវិទ្យារវាងក្រុមហ៊ុន Huawei និង Google រួមទាំងក្រុមហ៊ុន semiconductor មួយចំនួនក៏បានកាត់ផ្តាច់កិច្ចសហប្រតិបត្តិការជាមួយក្រុមហ៊ុនផលិតរបស់ចិនផងដែរ ៕

ប្រែសម្រួលដោយ៖ ប៉ោ កុសល

The post អ្នកជំនាញនិយាយថា “យុគមាសរបស់ Apple នៅក្នុងប្រទេសចិនបានបញ្ចប់ហើយ” appeared first on Kampuchea Thmey Daily.

យោងតាមប្រព័ន្ធផ្សព្វផ្សាយរដ្ឋបានឱ្យដឹងថា អតីតប្រធានកីឡាបាល់ទាត់ លោក Chen Xuyuan ត្រូវបានកាត់ទោសជាប់ពន្ធនាគារកាលពីថ្ងៃអង្គារ រួមជាមួយនឹងនាយកប្រតិបត្តិកីឡាជាន់ខ្ពស់ជាច្រើនរូប បន្ទាប់ពីការស៊ើបអង្កេតអស់រយៈពេលជាច្រើនខែ។

ទោះបីជាមានទស្សនៈវិស័យរបស់មេដឹកនាំចិន Xi Jinping ក្នុងការប្រែក្លាយប្រទេសទៅជាមហាអំណាចបាល់ទាត់ក៏ដោយ ក៏គេមើលឃើញថា ការអភិវឌ្ឍន៍បាល់ទាត់អាជីពកម្រិតខ្ពស់របស់ខ្លួនត្រូវបានជាប់គាំងដោយសារការសម្រេចចិត្តផ្នែកហិរញ្ញវត្ថុមិនល្អ និងអំពើពុករលួយចាក់ឫសយ៉ាងជ្រៅ។

ប្រភពបានឱ្យដឹងថា លោក Chen ស្ថិតក្នុងចំណោមមន្ត្រីបាល់ទាត់ជាច្រើនរូបដែលត្រូវបានជាប់ឃុំដោយការស៊ើបអង្កេតប្រឆាំងអំពើពុករលួយដែលកំពុងបន្ត ហើយក្នុងនោះមន្ត្រីស៊ើបអង្កេតក៏បានកំណត់គោលដៅលើអតីតអនុប្រធានសមាគមលោក Yu Hongchen អតីតគ្រូបង្វឹកក្រុមជម្រើសជាតិលោក Li Tie និងអ្នកផ្សេងទៀតជាច្រើន។លើសពីនេះ សម្រាប់លោក Chen ក៏ត្រូវបានរឹបអូសទ្រព្យសម្បត្តិ និងដកហូតសិទ្ធិនយោបាយរបស់គាត់អស់មួយជីវិតផងដែរ ។

ប្រព័ន្ធផ្សព្វផ្សាយរដ្ឋបានរាយការណ៍ថា នៅក្នុងការកាត់ទោស Chen តុលាការប្រជាជនកម្រិតមធ្យមនៅទីក្រុង Huangshi បាននិយាយថា ចុងចោទបានប្រើតួនាទីរបស់គាត់ដើម្បីជួយដល់ក្រុមហ៊ុន និងបុគ្គលដែលគាត់បានធ្វើការជាមួយនឹងថ្នូរទឹកប្រាក់យ៉ាងច្រើន ។

របាយការណ៍បានបង្ហាញថា លោក Chen បានទទួលសំណូកពីចន្លោះ ១០ ទៅ ១១លានដុល្លារ រហូតដល់ ២១៧លើក គិតតាំងពីឆ្នាំ ២០១០ រហូតដល់ឆ្នាំ ២០២៣ ដែលចំនួនទឹកប្រាក់សរុបបានមកពីអំពើពុករលួយនេះ តុលាការបាននិយាយថា “ជាចំនួយលុយច្រើនហួសប្រមាណ” ។ ជាមួយគ្នានេះ តុលាការបាននិយាយថា “ទង្វើរបស់ Chen បានធ្វើឱ្យខូចខាតយ៉ាងធ្ងន់ធ្ងរដល់សណ្តាប់ធ្នាប់ និងយុត្តិធម៌នៅក្នុងវិស័យកីឡាបាល់ទាត់ និងបរិស្ថានវិទ្យានៃឧស្សាហកម្ម ដែលបណ្តាលឱ្យខូចខាតយ៉ាងធ្ងន់ធ្ងរដល់អាជីវកម្មបាល់ទាត់ជាតិ”។

សូមជម្រាបផងដែរថា ប្រទេសចិនគឺជាមហាអំណាចកីឡាដ៏អស្ចារ្យមួយរបស់ពិភពលោក ដោយអត្តពលិករបស់ខ្លួនតែងតែគ្របដណ្តប់លើព្រឹត្តិការណ៍សំខាន់ៗដូចជាអូឡាំពិក និងកីឡាអូឡាំពិករដូវរងា។ ប៉ុន្តែវាជាប្រវត្តិសាស្ត្រមិនសូវទទួលបានជោគជ័យជាមួយនឹងកីឡាបាល់ទាត់ឡើយ ៕

ប្រែសម្រួលដោយ÷ ប៉ោ កុសល

The post អំពើពុករលួយ ធ្វើឱ្យប្រធានសមាគមបាល់ទាត់ថ្នាក់ជាតិរបស់ប្រទេសចិន ត្រូវជាប់ពន្ធនាគារអស់មួយជីវិត appeared first on Kampuchea Thmey Daily.

យោងតាមនាយកដ្ឋានពន្លត់អគ្គីភ័យ Baltimore បានឱ្យដឹងថា មនុស្សរហូតដល់ ២០ នាក់ ក៏ដូចជារថយន្តជាច្រើនគ្រឿងអាចនឹងធ្លាក់ចូលទៅក្នុងទឹក ។

អាជ្ញាធរបាននិយាយថា MPA កំពុងទាក់ទងជាមួយឆ្មាំឆ្នេរសមុទ្រអាមេរិក និងក្រុមហ៊ុនគ្រប់គ្រងកប៉ាល់ ដើម្បីផ្តល់ជំនួយចាំបាច់ ។ជាមួយគ្នានេះ MPA បានសង្កត់ធ្ងន់ថា “ក្នុងនាមជាម្ចាស់ទង់ជាតិ MPA នឹងផ្តល់កិច្ចសហប្រតិបត្តិការពេញលេញដល់ឆ្មាំឆ្នេរសមុទ្រអាមេរិកក្នុងការស៊ើបអង្កេតរបស់ខ្លួន ហើយ MPA ក៏នឹងកំពុងស៊ើបអង្កេតឧប្បត្តិហេតុនេះផងដែរ” ។

យោងតាមទិន្នន័យតាមដានកប៉ាល់បានបង្ហាញថា កប៉ាល់ Dali ត្រូវបានចុះឈ្មោះជាមួយក្រុមហ៊ុន Grace Ocean Pte Ltd ដែលជាក្រុមហ៊ុនបុត្រសម្ព័ន្ធជាមួយ Synergy Marine Group ។ ហើយកប៉ាល់នេះត្រូវបានជួលដោយក្រុមហ៊ុនដឹកជញ្ជូនរបស់ដាណឺម៉ាក Maersk នៅមុនពេលមានគ្រោះថ្នាក់។

សូមជម្រាបជូនថា MPA បានបង្ហាញថា Dali គឺជាកប៉ាល់កុងតឺន័រមានទម្ងន់សរុប ៩៦ម៉ឺនតោន ដែលប្រតិបត្តិការជាមួយសមាជិកនាវិក ២២នាក់ នៅថ្ងៃកើតហេតុ។

យោងតាមគេហទំព័ររបស់ MPA បានឱ្យដឹងថា ប្រទេសសិង្ហបុរីគឺជាប្រទេសមួយក្នុងចំនោមការចុះបញ្ជីកប៉ាល់ដ៏ធំបំផុតរបស់ពិភពលោកដែលមាននាវាជាង ៤.៤០០ គ្រឿង។ ថ្វីបើ Dali បានចុះបញ្ជីនៅក្នុងប្រទេសសិង្ហបុរី ក៏ពិតមែន ប៉ុន្តែនៅក្នុងករណីបុកស្ពាន Francis Scott Key នៅទីក្រុង Baltimore នេះ សិង្ហបុរីពុំមានទំនួលខុសត្រូវឡើយ ដោយ Dali និងក្រុមហ៊ុនធានារ៉ាប់រង ជាអ្នកទទួលខុសត្រូវដោយខ្លួនឯងរាល់ការខូចខាតទាំងអស់ ៕

ប្រែសម្រួលដោយ÷ ប៉ោ កុសល

The post សិង្ហបុរី ប្រកាសថា ខ្លួននឹងស៊ើបអង្កេតករណីកប៉ាល់កុងតឺន័រ Dali បុកជាមួយស្ពាន Francis Scott Key appeared first on Kampuchea Thmey Daily.

យោងតាមការផ្សាយរបស់ទីភ្នាក់ងារសារព័ត៌មាន Rueters នៅថ្ងៃទី២៥ ខែមីនា បានឱ្យដឹងថា សមាជិកក្រុមប្រឹក្សាចំនួន ១៤រូប ដែលនៅសេសសល់ បានបោះឆ្នោតគាំទ្រសេចក្តីសម្រេចបទឈប់បាញ់នេះ ដែលត្រូវបានស្នើឡើងដោយសមាជិកសភាចំនួន ១០រូប ដែលជាប់ឆ្នោត។

ឯកអគ្គរដ្ឋទូតអង្គការសហប្រជាជាតិរបស់ប្រទេសអាល់ហ្សេរី លោក Amar Bendjama បានប្រាប់ក្រុមប្រឹក្សាបន្ទាប់ពីការបោះឆ្នោតថា ប្រជាជនប៉ាឡេស្ទីនបានរងទុក្ខយ៉ាងខ្លាំង។ ការបង្ហូរឈាមនេះបានបន្តជាយូរមកហើយ។

ជាមួយគ្នានេះ វិទ្យុកងទ័ពអ៊ីស្រាអែលបានរាយការណ៍ភ្លាមៗមុនពេលកិច្ចប្រជុំក្រុមប្រឹក្សាចាប់ផ្តើមថា នាយករដ្ឋមន្ត្រីអ៊ីស្រាអែលលោក Benjamin Netanyahu នឹងលុបចោល គណៈប្រតិភូដែលបានគ្រោងនឹងទៅកាន់ទីក្រុងវ៉ាស៊ីនតោន ប្រសិនបើសហរដ្ឋអាមេរិកមិនបោះឆ្នោតវេតូប្រឆាំងនឹងបទឈប់បាញ់ ។

សូមជម្រាបជូនផងដែរថា រដ្ឋាភិបាលក្រុងវ៉ាស៊ីនតោន បានច្រានចោលពាក្យ “បទឈប់បាញ់” តាំងតែពីដើមក្នុងសង្រ្គាមជិត៦ខែនៅតំបន់ហ្គាហ្សាស្ទ្រីប ហើយបានប្រើរបាំងអំណាចវេតូរបស់ខ្លួន ទុកឱ្យសម្ព័ន្ធមិត្តអ៊ីស្រាអែល បានសងសឹកប្រឆាំងនឹងក្រុមហាម៉ាសសម្រាប់ការវាយប្រហារកាលពីថ្ងៃទី ៧ ខែតុលា ដែលអ៊ីស្រាអែលបាននិយាយថា ហាម៉ាស់បានសម្លាប់មនុស្ស ១.២០០នាក់។ ប៉ុន្តែចំពេលមានការកើនឡើងសម្ពាធជាសកលសម្រាប់ “បទឈប់បាញ់” ក្នុងសង្រ្គាមដែលបានសម្លាប់ជនជាតិប៉ាឡេស្ទីនជាង ៣២,០០០នាក់នោះ សហរដ្ឋអាមេរិកបានបដិសេធការបោះឆ្នោតវេតូកាលពីថ្ងៃចន្ទ ដើម្បីអនុញ្ញាតឱ្យក្រុមប្រឹក្សាសន្តិសុខទាមទារឱ្យមានបទឈប់បាញ់ជាបន្ទាន់សម្រាប់ខែនៃការតមអាហាររបស់មូស្លីម (Ramadan) ដែលនឹងត្រូវបញ្ចប់នៅក្នុង ពីរសប្តាហ៍។ ហើយដំណោះស្រាយក៏ទាមទារឱ្យមានការដោះលែងចំណាប់ខ្មាំងទាំងអស់ជាបន្ទាន់ និងដោយគ្មានលក្ខខណ្ឌ។

ជុំវិញនឹងការបដិសេធបោះឆ្នោតវេតូរបស់សហរដ្ឋអាមេរិក ឯកអគ្គរដ្ឋទូតប្រចាំអង្គការសហប្រជាជាតិលោកស្រី Linda Thomas-Greenfield បាននិយាយថា ការគាំទ្ររបស់សហរដ្ឋអាមេរិកចំពោះគោលបំណងទាំងនេះ (គាំទ្របទឈប់បាញ់) មិនមែនគ្រាន់តែជាវោហាសាស្ត្រនោះទេ។

ជាមួយគ្នានេះ សេចក្តីសម្រេចរបស់ក្រុមប្រឹក្សាសន្តិសុខបានសង្កត់ធ្ងន់លើតម្រូវការបន្ទាន់ដើម្បីពង្រីកលំហូរនៃជំនួយមនុស្សធម៌ដល់ និងពង្រឹងការការពារជនស៊ីវិលនៅក្នុងតំបន់ហ្គាហ្សាស្ទ្រីបទាំងមូល និងបញ្ជាក់ឡើងវិញនូវតម្រូវការរបស់ខ្លួនសម្រាប់ការលុបចោលនូវឧបសគ្គទាំងអស់ចំពោះការផ្តល់ជំនួយមនុស្សធម៌ក្នុងកម្រិតប្រសើរមួយ ។

សូមបញ្ជាក់ថា ពាក្យ “វេតូ (Veto)” ជាភាសារឡាតាំង មានន័យថា “ខ្ញុំជំទាស់ ឬប្រឆាំង” ។ អំណាចវេតូ (Veto Power) ជាសិទ្ធិជំទាស់ឯកត្តោភាគី ដ៏មានអនុភាពលើសេចក្តីសម្រេចទាំងឡាយរបស់អង្គការសហប្រជាជាតិទាក់ទងនឹងសន្តិសុខពិភពលោក ហើយប្រសិនបើប្រទេសណាមួយប្រើសិទ្ធិអំណាចនេះហើយ មានន័យថា មិនមានសេចក្ដីសម្រេចណាមួយកើតឡើងបានឡើយ ។ បច្ចុប្បន្នមានប្រទេសចំនួន ៥ ដែលមានសិទ្ធិប្រើប្រាស់អំណាចមួយនេះ មាន សហរដ្ឋអាមេរិក បារាំង អង់គ្លេស ចិន និងរុស្ស៊ី ៕

ប្រែសម្រួលដោយ÷ ប៉ោ កុសល

The post ក្រុមប្រឹក្សាសន្តិសុខអង្គការសហប្រជាជាតិទាមទារឱ្យមានបទឈប់បាញ់ជាបន្ទាន់រវាង អ៊ីស្រាអែល និងក្រុមសកម្មប្រយុទ្ធប៉ាឡេស្ទីន appeared first on Kampuchea Thmey Daily.