កីឡាករ Nwaneri ដែលបានចូលរួមជាមួយ Arsenal តាំងពីអាយុ៨ឆ្នាំ ត្រូវបានអ្នកគាំទ្រ ចាប់អារម្មណ៍កាន់តែខ្លាំងក្រោយគ្រូបង្វឹកដាក់ឲ្យលេងជំនួយតំណែងរបស់កីឡាករ Bukayo Saka ដែលរងរបួសសរសៃពួរកាលពីចុងខែធ្នូ។

ខ្សែបម្រើវ័យក្មេងនេះជាតួអង្គសំខាន់ជួយឲ្យក្លិប Arsenal យកឈ្នះក្លិប Girona ក្នុងលទ្ធផល ២-១។ គ្រាប់បាល់ជ័យជម្នះកើតឡើងពីការស៊ុតបញ្ចូលទីរបស់កីឡាករ Nwaneri នៅនាទី៤២ ក្នុងការប្រកួតនៅកីឡដ្ឋាន Estadi Montilivi ហើយនោះក៏ជាគ្រាប់បាល់ដំបូងរបស់គេ ក្នុងពានរង្វាន់ UEFA Champions League។ ក្រោយបញ្ចប់ការប្រកួត រូបគេក៏បានឈ្នះពានរង្វាន់​កីឡាករល្អ​ប្រចាំ​ការ​ប្រកួត។

លោក Mikel Arteta បាននិយាយថា ៖«គាត់​មាន​ភាព​ប្រជែងខ្លាំង​ណាស់​ ពេល​គាត់​បាន​បាល់ ហើយ​មាន​ទំនុក​ចិត្ត​ខ្លាំង។ ​មុន​ពេលគាត់ចង់ធ្វើ​សកម្មភាពអ្វី​មួយ​ គឺសម្រេចចិត្ត​បាន​​ត្រឹមត្រូវ តាមអ្វីដែលគាត់ចង់បាន។ គាត់​មាន​សមត្ថភាព​បញ្ចប់​ទីគ្រប់​ជ្រុង»។

ការប្រកួតបន្ទាប់ Arsenal បន្ទាប់​ ត្រូវ​ទទួល​ក្រុម​លេខ​៤ Manchester City ក្នុងពានរង្វាន់ Premier League នៅ​ថ្ងៃ​អាទិត្យ។ បច្ចុប្បន្នក្រុម​របស់លោក Arteta ស្ថិត​ក្នុង​ចំណាត់​ថ្នាក់​លេខ​២ នៅលីគកំពូលអង់គ្លេស ដោយ​តាម​ពី​ក្រោយ​ក្រុមលេខ១ Liverpool ចំនួន​៦​ពិន្ទុ​ ខណៈក្រុមហង្សក្រហមសល់មួយប្រកួតទៀតក្នុងដៃ៕

ប្រែសម្រួល៖ ផា រតនា​

The post Arteta ពេញចិត្តខ្លាំងទម្រង់លេងកីឡាករ​វ័យ​១៧​ឆ្នាំ Nwaneri appeared first on Kampuchea Thmey Daily.

ភាពរំភើបគឺកំពុងតែកើនឡើងស្របពេលការប្រកួតហ្វ្រេនហ្ស៊ី ហ្រ្វីស្តាយល៍បានឈានដល់វគ្គ ១/៤ ផ្តាច់ព្រ័ត្រ។ ការប្រកួតបាល់ហ្វ្រីស្តាយល៍ ដំបូងនៅកម្ពុជា គឺជាដំណើរការ​ដ៏អស្ចារ្យមួយ រហូតមកដល់ពេលនេះ ដោយបេក្ខជន បេក្ខនារី​ ដែលមានទេពកោសល្យនៅក្នុងប្រទេសកម្ពុជាបានប្រកួតគ្នា ដើម្បីមានឱកាសឈានទៅវគ្គបន្តមួយទៀតក្នុងចំណោមជើងខ្លាំងទាំង៨នាក់។

កម្មវិធីដ៏​អស្ចារ្យ​នេះ​បាន​ឆក់​យក​បេះដូង​ទស្សនិកជន និង​អ្នក​ចូល​រួម​ដែលមិនធ្លាប់ស្គាល់ថាបាល់ហ្វ្រីស្តាយល៍ជាអ្វី ដោយ​បាន​បង្ហាញ និងលេចឃើញនូវសមត្ថភាព និងសិល្បៈនៃការលេងបាល់របស់បេក្ខជន បេក្ខជនារី​ ក្នុងការ​បង្កើត​ក្បាច់ថ្មីប្លែកៗ។ នៅពេល​ការ​ប្រកួតគឺទាមទារឱ្យបេក្ខជន បេក្ខនារីទាំងអស់ព្យាយាមឱ្យអស់ពីកម្លាំងកាយចិត្ត ដើម្បីទទួលបានពិន្ទុពីគណៈកម្មការ​វាយតម្លៃ ក្នុងការឈានទៅកាន់វគ្គបន្ត។

ចង់ដឹងថាវគ្គ ១/៤ ផ្តាច់ព្រ័ត្រ (វគ្គ៨នាក់ចុង​ក្រោយ) នឹងមានទស្សនីយភាព ក្បាច់ពិសេសអ្វី​ខ្លះដែលត្រូវបង្ហាញ ដើម្បីឱ្យបងប្អូនហូរសប្បាយ កុំភ្លេចតាមដាន និងចូលរួមទស្សនាគាំទ្រដោយសេរីទាំងអស់ នៅស្ទូឌីយោបាយ័នបឹងស្នោរ នាថ្ងៃទី០២ ខែកុម្ភៈ ឆ្នាំ២០២៥​ ចាប់ពីម៉ោង៣:០០ នាទីរសៀលតទៅ ដោយរួមមាន ៖

• បេក្ខនារី  ឌី គឹមយាន នឹងត្រូវប្រកួតជាមួយ​បេក្ខជន លន់ ឆៃយ៉ា               
• បេក្ខជន ចាន់ណាក់​ វរៈបុត្រ នឹងត្រូវប្រកួតជាមួយគ្នាបេក្ខជន​ នួន វណ្ណា      
• បេក្ខជន ស៊ុំ សាន​ នឹងត្រូវប្រកួតជាមួយ បេក្ខជន ខុន ខេមរៈបុត្ត
• បេក្ខជន ផ្លម ធិញហួយ នឹងត្រូវប្រកួតជាមួយបេក្ខនារី យ៉ែម នារតី​                  

The post បេក្ខភាព៨នាក់ ​ត្រៀមប្រកួតក្នុងកម្មវិធី Frenzy Freestyle ដើម្បី​ឱកាស​ឡើងទៅជុំបន្ដ appeared first on Kampuchea Thmey Daily.

Ronaldo បានស៊ុតបាល់បញ្ចូលទី១គ្រាប់ និងបញ្ជូនបាល់ឲ្យមិត្តរួមក្រុម១លើក។ យោងទៅតាមសារព័ត៌មាន Marca ថា កីឡាករវ័យ៣៩ឆ្នាំរូបនេះ បានក្លាយជាកីឡាករបាល់ទាត់ដំបូង និងតែមួយគត់ក្នុងប្រវត្តិសាស្ត្របាល់ទាត់ដែលអាចរកបានជ័យជម្នះជាមួយក្លិបបាល់ទាត់អាជីពបានចំនួន៧០០លើក។

ការឈ្នះទាំង៧០០លើកនោះរួមមាន៖

• ជ័យជម្នះជាមួយក្លិប Sporting ចំនួន១៣លើក
• ជម្នះជាមួយក្លិប Manchester United ចំនួន១២៤លើក
• ជ័យជម្នះជាមួយក្លិប Real Madrid ចំនួន៣១៦លើក
• ជ័យជម្នះជាមួយក្លិប Juventus ចំនួន៩១លើក
• ជ័យជម្នះជាមួយក្លិប Al-Nassr ចំនួន៦៦លើក

ជ័យជម្នះរបស់ Al-Nassr បានធ្វើឲ្យពួកគេតាមពីក្រោយ៥ពិន្ទុក្រុមកំពូលតារាង Al-Hilal និង Al-Ittihad ខណៈក្រុមទាំង២សល់ការប្រកួត១ទៀតក្នុងដៃ។ បច្ចុប្បន្ន Ronaldo រកបាន ៨៥គ្រាប់ក្នុងការបង្ហាញខ្លួន៩៤ប្រកួតនៅលីគកំពូលអារ៉ាប៊ីសាអ៊ូឌីត។ រូប​គេ​នឹង​ឈាន​ចូល​វ័យ​៤០​ឆ្នាំ​នា​ថ្ងៃ​ទី​៥ ខែ​កុម្ភៈ ឆ្នាំ​២០២៥​៕

ប្រែសម្រួល៖ ផា រតនា

The post Ronaldo បាន​បង្កើត​កំណត់ត្រាពិភពលោកថ្មី ក្រោយជួយ Al-Nassr ឈ្នះយប់មិញ appeared first on Kampuchea Thmey Daily.

សំបុត្រចូលរួមទស្សនាសារមន្ទីររបស់ Ronaldo នៅហុងកុងនឹងចាប់ផ្ដើមដាក់លក់នៅថ្ងៃទី៥ ខែកុម្ភៈ​​ ដែល​ជាថ្ងៃកំណើតរបស់​កីឡាករឈាន​ចូល​វ័យ​៤០​ឆ្នាំ។ សំបុត្រ Early Bird​ និង VIP នឹងមានលក់នៅកាលបរិច្ឆេទ ខណៈ​សំបុត្រ​ទូទៅនឹងដាក់លក់នៅថ្ងៃទី២៤ ខែកុម្ភៈ វេលាម៉ោង១១ព្រឹក តាមរយៈប្រព័ន្ធអនឡាញ Klook និង Ctrip ក៏ដូចជាគេហទំព័រផ្លូវការរបស់ K11។ នេះបើយោងតាមកាសែត South China Morning Post បានរាយការណ៍។

សំបុត្រចូលទស្សនាទូទៅមានតម្លៃ១៨០ដុល្លារហុងកុង (ប្រមាណ២៣ដុល្លារអាមេរិក) សម្រាប់មនុស្សពេញវ័យ និងតម្លៃ​១៩​ដុល្លារអាមេរិក សម្រាប់កុមារ និងមនុស្សចាស់ ជាមួយនឹងការបញ្ចុះតម្លៃ១០%។

សារមន្ទីរក៏នឹងផ្តល់ជូននូវសំបុត្រ VIP ជាច្រើនកម្រិតផងដែរ ដែលត្រូវបានគេរំពឹងថានឹងរួមបញ្ចូលអត្ថប្រយោជន៍ផ្តាច់មុខដូចជារួមមានទំនិញដែលមានកំណត់ ដំណើរទេសចរណ៍ និងការចូលទៅកាន់តំបន់ពិសេសនៅក្នុងសារមន្ទីរ៕

ប្រែសម្រួល៖ ផា រតនា

The post សារមន្ទីរថ្មីរបស់ Ronaldo នៅហុងកុងនឹងបើកដំណើរ​ខែកក្កដា appeared first on Kampuchea Thmey Daily.

ការប្រកួតវគ្គផ្តាច់ព្រ័ត្រ និងការប្រកួតដណ្ដើមចំណាត់ថ្នាក់លេខ៣ ស្វាយរៀង​ខាប់ យុវជន​អាយុ​ក្រោម​១៣​ឆ្នាំ នឹងត្រូវធ្វើឡើងនៅថ្ងៃសៅរ៍ ទី១ ខែកុម្ភៈ ឆ្នាំ២០២៥ នៅកីឡដ្ឋាន ខេត្តស្វាយរៀង។ ចំពោះអ្នកគាំទ្រចូលរួមទស្សនាដោយសេរីដោយមិនមានការលក់សំបុត្រ​ឡើយ និង​ជាពិសេសក៏មានការផ្សាយផ្ទាល់តាមរយៈ BTV NEWS៕

គូដណ្ដើមចំណាត់ថ្នាក់លេខ៣ (ម៉ោង ៣:០០នាទី)

• ធូប្រាឌឺ បាវិត VS សសយក ស្រុកកំពង់រោទិ៍

គូដណ្ដើម​ជើងឯក (ម៉ោង ៤:០០នាទី)

• យុវជនសាមគ្គី U13 VS ព្រះខ័នរាជស្វាយរៀង U13

អត្ថបទ៖ ផា រតនា

The post ព្រះខ័នរាជស្វាយរៀង ប៉ះ យុវជនសាមគ្គី ដណ្ដើម ពានស្វាយរៀងខាប់ U13 appeared first on Kampuchea Thmey Daily.

ផ្អែក​លើ​សំបូរ​ធន​ធាន​ហិរញ្ញវត្ថុ ក្លិប​យក្ស​បារាំង PSG ​ហ៊ាន​ចំណាយ​ប្រាក់​យ៉ាង​ច្រើន​សន្ធឹក​សន្ធាប់​ដើម្បី​នាំចូល​កីឡាករ​​ល្អ​ៗ​ទូទាំង​ពិភព​លោក និង​ផ្តល់​តម្លៃ​ពល​កម្ម​ខ្ពស់។ កីឡាករ​ភាគ​ច្រើន​មាន​តម្លៃ​ពល​កម្ម​ខ្ពស់ ហើយ​សូម្បី​តែ​កីឡាករ​ដែល​មាន​តម្លៃ​ពលកម្ម​តិច​ជាង​គេ​នៅ​ក្នុង​ក្លិប ក៏​ប៉ុន្តែ​នៅ​តែ​ខ្ពស់ បើ​ប្រៀប​ធៀប​នឹង​ក្លិប​ផ្សេង​ៗ។

ខាង​ក្រោម​ជា​កីឡាករ​មាន​​តម្លៃ​ខ្លួន​ខ្ពស់​៥​រូប និង​កីឡាករ​មាន​តម្លៃ​ខ្លួន​តិច​ជាង​គេ​៥​រូប​របស់​ក្លិប PSG។

កីឡាកររបស់ក្លិប​ PSG ៥​រូប​មានប្រាក់ខែច្រើនបំផុត

• Ousmane Dembele ២០,៨៦៤,០០០ដុល្លារ
• Lucas Hernandez ១៩,៨២១,០០០ដុល្លារ
• Marquinhos ១៧,៥២៦,០១២ដុល្លារ
• Kvaratskhelia ១៧,០៦៦,៩៩៧ដុល្លារ
• Milan Skriniar ១៧,០៦៦,៩៩៧ដុល្លារ 

កីឡាររបស់ក្លិប PSG ៥រូបមានប្រាក់ខែទាបបំផុត

• Ibrahim Mbaye        ១២,៥១៨,៥៨ដុល្លារ
• Yoram Zague         ៤,៩៦៤,៤៦ដុល្លារ
• Senny Mayulu        ៧,៥១១,១៤ដុល្លារ
• Arnau Tenas           ១,២៥១,៨៨៥ដុល្លារ
• Nuno Mendes         ១,៥០២,២២៩ដុល្លារ

ប្រែសម្រួល៖ ផា រតនា

The post កីឡាករ៥រូបរបស់ PSG មានប្រាក់ខែច្រើនបំផុតនិងតិចបំផុត appeared first on Kampuchea Thmey Daily.

ក្លិប Juventus ត្រូវបានគេរាយការណ៍​ពី​កំពុងពិចារណាក្នុងការនាំយកអតីតអ្នកចាត់ការក្រុម Barcelona លោក Xavi នៅរដូវក្តៅនេះ បន្ទាប់ពីលោក Thiago Motta ជាអ្នកចាត់ការបច្ចុប្បន្នដឹកនាំក្រុមមិនសូវបានល្អ។

លោក Thiago Motta ត្រូវបានតែងតាំងជាគ្រូបង្វឹក Juventus ក្រោយ​បាន​ដឹកនាំក្លិប Bologna បានយ៉ាងល្អកាលពីរដូវកាលមុន។ ទោះជាយ៉ាងណា អតីតកីឡាករជម្រើសជាតិអុីតាលីរូបនេះ មិនទទួលបានជោគជ័យខ្លាំងជាមួយក្លិបសេះបង្គង់​ឡើយ។ បច្ចុប្បន្នពួកគេកំពុងឈរនៅលេខ៥ ក្នុងតារាងពិន្ទុលីគកំពូលអុីតាលី ក្រោយប្រកួត២២លើក ឈ្នះ៨លើក ស្មើ១៣លើក និងចាញ់១លើក មាន៣៧ពិន្ទុ។

យោងតាម ​​L’Equipe ពេលនេះ Old Lady បានកំណត់យក Xavi ជាជម្រើសដំបូង​ដើម្បីជំនួសតំណែងលោក Motta នៅរដូវក្ដៅក្រោយនេះ ក្នុងករណីដែលពួកគេបានចែកផ្លូវជាមួយបុរសវ័យ៤២ឆ្នាំជាគ្រូបង្វឹកបច្ចុប្បន្ន។

លោក Xavi បាន​បញ្ចប់​រដូវកាលជាមួយភាព​តានតឹង​កាលពី​រដូវ​កាល​មុន អំឡុងពេលដឹកនាំក្រុម Barcelona បន្ទាប់ពី​ប្រធាន​ក្លិបលោក Joan Laporta បាន​សុំអង្វរគាត់កុំ​ឲ្យ​ចាកចេញ​។ ទោះបី​ជា​ លោកទទួល​​យកការផ្តល់ជូននេះ ក៏​លោក Laporta បានបញ្ចប់តំណែងគ្រូបង្វឹកវ័យ៤៥ឆ្នាំ បន្ទាប់ពីគាត់បាន​និយាយ​ពាក់​ព័ន្ធនឹងស្ថានភាពហិរញ្ញវត្ថុរបស់ក្លិប។ ចំពោះក្លិប​ Juventus ទំនងជានៅតែបន្ដគាំទ្រលោក Motta ឲ្យដឹកនាំក្រុមក្នុងការស្វែងរកជោគជ័យជូនក្រុម៕

ប្រែសម្រួល៖ ផា រតនា

The post ក្លិប Juventus កំពុង​ចង់​បាន Xavi ជាគ្រូបង្វឹក​ថ្មី appeared first on Kampuchea Thmey Daily.

នៅក្នុងបទសម្ភាសន៍ថ្មីៗនេះនៅលើផតខាស់ ABtalks តារាឆ្នើមរបស់ក្លិប PSG បាននិយាយអំពីស្ថានភាពហិរញ្ញវត្ថុរបស់គាត់ បន្ទាប់ពីការលែងលះនៅឆ្នាំ២០២៣ ជាមួយតារាសម្តែង Hiba Abouk ។ នៅពេលមានរបាយការណ៍ចេញផ្សាយមកថា Hakimi បានដាក់ទ្រព្យសម្បត្តិរបស់គាត់ទាំងអស់នៅក្រោមឈ្មោះ​របស់​ម្តាយ ធ្វើឲ្យអ្នកនាង Hiba Abouk មានការភ្ញាក់ផ្អើល​យ៉ាង​ខ្លាំង។

កីឡាករ Achraf Hakimi បាននិយាយថា ៖«តាំងពីខ្ញុំចាប់ផ្តើមរកលុយតាំងពីក្មេងមក ម្តាយរបស់ខ្ញុំជាអ្នកទទួលខុសត្រូវលើអ្វីៗទាំងអស់។ លុយ​ខ្ញុំ​ជា​លុយ​របស់​គាត់ ហើយ​ខ្ញុំ​ជឿជាក់​លើ​គាត់ទាំង​ស្រុង។ គាត់បានជួយខ្ញុំធ្វើការសម្រេចចិត្តត្រឹមត្រូវ នៅពេល​ខ្ញុំមិនដឹងពីរបៀបគ្រប់គ្រង​លុយ។ វាមិនពាក់ព័ន្ធនឹងការរៀបការ ឬការលែងលះនោះទេ»។

កីឡាករ Hakimi បានបន្ថែមថា ៖«គាត់ជាអ្វីគ្រប់យ៉ាងសម្រាប់ខ្ញុំ។ នៅក្នុងគ្រួសារមួយ ម្តាយគឺជាឆ្អឹងខ្នង។ គាត់ដឹកនាំ និងរក្សាអ្វីៗគ្រប់យ៉ាង។ ម្តាយរបស់ខ្ញុំគឺជាប្រភពនៃការលើកទឹកចិត្តដ៏ធំបំផុត។ ខ្ញុំដឹងថាគាត់មានមោទនភាពចំពោះខ្ញុំ ហើយខ្ញុំខិតខំបន្តធ្វើឲ្យគាត់មានមោទនភាព​ទៀត»។

កីឡាករ Hakimi វ័យ២៦ឆ្នាំ ជាខ្សែការពារដ៏ល្អបំផុតម្នាក់នាពេលបច្ចុប្បន្ននេះ។ រូបគេបានចាប់ផ្តើមអាជីពរដំបូងនៅក្លិប Real Madrid ហើយខ្ចីជើងទៅក្លិប Borussia Dortmund ក្រោយមកបានចូលរួមជាមួយក្លិប Inter Milan ក្នុងឆ្នាំ២០២០ ជាកន្លែងដែលគាត់បានជួយឲ្យឈ្នះពានរង្វាន់ Serie A ។ នៅឆ្នាំ២០២១ គាត់បានចុះហត្ថលេខាជាមួយ PSG ដោយបានបង្ហាញខ្លួនជាង១០០លើក និងស៊ុតបញ្ចូលទីបាន១៥គ្រាប់៕

ប្រែសម្រួល៖ ផា រតនា

The post Hakimi ប្រាប់មូលហេតុឲ្យម្តាយគ្រប់គ្រងទ្រព្យសម្បត្តិរបស់ខ្លួន appeared first on Kampuchea Thmey Daily.