សេដ្ឋកិច្ច

ការដោះដូរទំនិញកម្ពុជា-ម៉ាឡេស៊ី សម្រេចបានជាង $៣០០ លាន នៅត្រីមាសទី១ កើនជិត ៥០%

បានផុស

២ ខែ មុន

នៅ

ថ្ងៃអង្គារ ២១ មេសា ២០២៦

ដោយ

ការដោះដូរទំនិញកម្ពុជា-ម៉ាឡេស៊ី សម្រេចបាននូវទំហំទឹកប្រាក់ជាង ៣៧២ លានដុល្លារ នៅក្នុងរយៈពេល ៣ ខែ ឆ្នាំ ២០២៦ កើនឡើង ៤៩,៤% ប្រៀបធៀបនឹងរយៈពេលដូចគ្នាកាលពីឆ្នាំមុន ដែលឆ្លុះបញ្ចាំងអំពីតម្រូវការកើនឡើងនៃប្រទេសទាំងពីរ ខណៈកម្ពុជា នៅតែបន្តរក្សាបានទីផ្សារសំខាន់ៗរបស់ខ្លួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទិន្នន័យរបស់អគ្គនាយកដ្ឋានគយ និងរដ្ឋាករកម្ពុជា (GDCE) បង្ហាញថា គិតចាប់ពីខែមករា ដល់ខែមីនា ២០២៦ ទំហំពាណិជ្ជកម្មទ្វេភាគី កម្ពុជា-ម៉ាឡេស៊ីសម្រេចបាន ៣៧២ លានដុល្លារ ក្នុងនោះកម្ពុជានាំចេញទៅម៉ាឡេស៊ីមានទំហំទឹកប្រាក់ ៥៥ លានដុល្លារ កើនឡើង ៤៨,៣% ចំណែកម៉ាឡេស៊ីនាំចូលមកវិញ មានតម្លៃ ៣១៧ លានដុល្លារ កើន ៤៩,៦%។

ប្រទេសម៉ាឡេស៊ី គឺជាដៃគូពាណិជ្ជកម្មធំជាងគេទី ៧ របស់កម្ពុជា បន្ទាប់ពីប្រទេសចិន សហរដ្ឋអាមេរិក វៀតណាម ថៃ ជប៉ុន និងសិង្ហបុរី។

លោក ប៉ែន សុវិជាតិ រដ្ឋលេខាធិការ និងជាអ្នកនាំពាក្យក្រសួងពាណិជ្ជកម្ម មានប្រសាសន៍ថា ទំហំពាណិជ្ជកម្មកម្ពុជាមានកំណើន ឆ្លុះបញ្ចាំងពីការរក្សាបាននូវទីផ្សារសំខាន់ៗរបស់ខ្លួន ដែលជាទីផ្សារនៅក្នុងតំបន់ និងពិភពលោក ដែលធានាបាននូវខ្សែច្រវាក់តម្លៃ និងផ្គត់ផ្គង់ ព្រមទាំងរក្សាបាននូវជំនឿចិត្តពីអ្នកបញ្ជាទិញ។

អ្នកតាមដានភូមិសាស្ត្រនយោបាយ និងសេដ្ឋកិច្ច លោកបណ្ឌិត ជ័យ តិច មានប្រសាសន៍ថា ការកើនឡើងនៃការនាំចូលទំនិញពីម៉ាឡេស៊ីដោយសារតែកម្ពុជាបានបង្វែរទំនិញមួយចំនួនពីប្រទេសថៃ បន្ទាប់ពីមានបញ្ហាព្រំដែនជាមួយគ្នា ជាមួយនឹងការធ្វើពហិការទំនិញថៃពីប្រជាជនកម្ពុជា។

នៅក្នុងឆ្នាំ ២០២៥ ពាណិជ្ជកម្មទ្វេភាគីកម្ពុជា-ម៉ាឡេស៊ី សម្រេចបាននូវទំហំទឹកប្រាក់ចំនួន ១,១ ពាន់លានដុល្លារ កើនឡើង ២៤,៦៦% ក្នុងនោះ កម្ពុជានាំចេញទៅម៉ាឡេស៊ី មានតម្លៃ ១៤៣ លានដុល្លារ ធ្លាក់ចុះ ២,៥៥% ចំណែកឯម៉ាឡេស៊ីនាំចូលមកវិញ មានតម្លៃ ៩៣៥ លានដុល្លារ កើន ៣០,២៥%។ នេះបើយោងតាមក្រសួងពាណិជ្ជកម្ម៕

អត្ថបទ៖ ឡេង ដេត

Related Topics:ទំហំពាណិជ្ជកម្មកម្ពុជា-ម៉ាឡេស៊ី

សេចក្ដីជូនដំណឹង៤ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា