សេដ្ឋកិច្ច
បណ្ឌិត គឹម ហ៊ាង៖ ទិញដីធ្លីចង់ចំណេញត្រូវពឹងលើហុង ស៊ុយ ដែរព្រោះខ្ញុំធ្លាប់កប់ដើមខាតអស់ច្រើនហើយ
«ពេលខ្លះខ្ញុំបែរជាយល់ឃើញថា ការទិញដី ដូចជាការលេងតុងទីន ឬលេងឆ្នោតអ៊ីចឹង ជួនកាលទិញកប់ដើមដល់ ៤-៥ឆ្នាំ ហាងឆេងអត់ឡើងសោះ ហើយដាក់លក់អត់ចេញ ដល់ពេលបង្ខំចិត្តលក់ចេញទាំងខាតដើម អ្នកទិញបន្តបែរជាលក់ចំណេញមួយជាពីរ ជាបីក៏មានដែរ»។ នេះជាការលើកឡើងរបស់បណ្ឌិត គឹម ហ៊ាង អគ្គនាយកក្រុមហ៊ុនខ្មែររៀលអ៊ីស្ទេត ជាមួយកម្ពុជាថ្មី ជុំវិញប្រធានបទ ការវិនិយោគដីធ្លីដើម្បីចំណេញ។
អ្នកជំនាញធ្លាប់ប្រឡូកក្នុងវិស័យដីធ្លីនៅកម្ពុជាជិត ២០ឆ្នាំរូបនេះ ពន្យល់ទៀតថា៖ រឿងទិញដីចំណេញនេះ មានហេង មានស៊យដែរទេ គ្មានអ្នកជំនាញច្បាស់លាស់១០០ភាគរយទេ ត្រូវជឿលើហុងស៊ុយខ្លះផង។ ដីខ្លះ មុនពេលទិញ យើងមើលឃើញថាទំនងល្អខ្លាំងណាស់ ដល់តែពេលទិញហើយ ល្អមែន គឺល្អនៅមួយកន្លែងហ្នឹង ជាប់គាំងលក់អត់ខ្ចីចេញក៏មានដែរ។ និយាយដោយឡែក ដីខ្លះយើងទិញទុកចោល មិនរំពឹងថានឹងទទួលបានផលចំណេញខ្ពស់ផង ស្រាប់តែតម្លៃទីផ្សារអាចលក់ចេញវិញ បានចំណេញ១គុណនឹង៥ ទៅវិញ។
យ៉ាងណាក៏ដោយ លោកបណ្ឌិត គឹម ហ៊ាង ផ្ដល់ជាយោបល់ខ្លះៗថា បើចង់វិនិយោគលើវិស័យដីធ្លីនេះ ក្រៅធាតុផ្សំចេញពី ហុង ស៊ុយ អ្វីដែលអ្នកទិញត្រូវស្វែងយល់ មានដូចជា៖
គោលបំណងក្នុងការទិញ
តើអ្នកមានបំណងទិញដី ដើម្បីទុកលក់យកប្រាក់ចំណេញ ឬទុកសាងសង់សំណង់ផ្សេងៗ? ហើយទិញទុកលក់រយៈពេលខ្លី ឬរយៈពេលវែង? លោក គឹម ហ៊ាង បញ្ជាក់ថា មុនទិញដី ត្រូវកំណត់គោលដៅឱ្យបានច្បាស់លាស់ ថាតើការទិញដីនោះក្នុងគោលបំណងជាការវិនិយោគ លើការអភិវឌ្ឍគម្រោងដូចជារីសត ឬលំនៅដ្ឋាន, ទិញដើម្បីវិនិយោគបង្កើតជាលំហូរសាច់ប្រាក់ ឬទិញទុកដើម្បីលក់យកចំណេញ ពេលដែលអចលនទ្រព្យនោះឡើងថ្លៃ?
ទីតាំងយុទ្ធសាស្រ្ត
ចំណុចនេះសំខាន់ខ្លាំងណាស់ សម្រាប់អ្នកទិញអចលនទ្រព្យ ទាំងកត្តាតម្លៃ ទាំងតំបន់ត្រូវប៉ាន់ គឺអាស្រ័យលើទីតាំងសក្តានុពលនៃទីតាំងដី។ ដូច្នេះហើយ អ្នកទិញគួរសម្លឹងមើលទីតាំងដីដែលជាជម្រើសល្អខ្លាំង អាចជាដីនៅជិត ឬតាមបណ្តោយផ្លូវធំ ឬក៏ទីតាំងឋិតនៅកែងកាច់ជ្រុងជាដើម។ លើសពីនេះ មុនសម្រេចចិត្តទម្លាក់កញ្ចប់លុយទិញ យើងក៏ត្រូវគិតទៅដល់ ទីតាំងមានសក្ដានុពលដែរទេ នៅជាប់ ឬក្បែរគម្រោងអចលនទ្រព្យផ្សេងៗ ដែលអាចនឹងទាញហាងឆេងដីយើងឱ្យឡើងថ្លៃ ទាំងពេលបច្ចុប្បន្ន និងថ្ងៃអនាគតដែរទេ?
ប្រភពទុនសម្រាប់ទិញដី
ការវិនិយោគដីធ្លី គឺជាការវិនិយោគដ៏ត្រឹមត្រូវមួយ ប្រសិនជាលោកអ្នកសល់លុយដោយខ្លួនឯង មិនដឹងយកទៅវិនិយោគអ្វី ប៉ុន្តែប្រសិនជាយកលុយបង្វិល ឬយកលុយពីធនាគារដើម្បីទិញដីវិនិយោគ អ្នកជំនាញរូបនេះលើកឡើងថា “កុំប្រថុយអីល្អជាង” ព្រោះបើសិនជាយកលុយពីធនាគារ អ្នកខ្លះអាចគិតថា អត្រាការប្រាក់ធនាគារក្នុង ១ឆ្នាំ ត្រឹម៨ភាគរយ ហើយដីឡើងថ្លៃ២០ភាគរយក្នុងមួយឆ្នាំ គឺអាចខ្ចីឥណទានពីធនាគារយកមកទិញបាន ប៉ុន្តែបញ្ហានៅត្រង់ថា រឿងដីធ្លីនេះ មិនងាយចេះតែចង់លក់ចេញភ្លាម លក់បានលុយភ្លាមទេ វាអាចមានភាពជាប់គាំងយូរ ឬឆាប់ អាស្រ័យទៅតាមពេលវេលា និងហុង ស៊ុយទៀតផង។
ហេដ្ឋារចនាសម្ព័ន្ធ
ប្រសិនបើលោកអ្នកទិញដីនៅតំបន់ឆ្ងាយៗ មិនមែនជាយក្រុង ឬប្រជុំជន មិនជាបញ្ហាប៉ុន្មានទេ តែបើទិញដីក្នុងបំណងអភិវឌ្ឍទៅជាគម្រោងណាមួយ ចាំបាច់ត្រូវមើលទៅលើទីតាំងដីនោះថា មានហេដ្ឋារចនាសម្ព័ន្ធគ្រប់គ្រាន់ដែរឬទេ ដូចជាបណ្តាញគមនាគមន៍ (ផ្លូវថ្នល់) បណ្តាញទឹក(ស្អាត) ភ្លើង និងបណ្តាញលូជាដើម៕
-
កីឡា៦ ថ្ងៃ ago
ឈ្នះខ្សែក្រវាត់ថ្ងៃជាមួយ ឈឿង ល្វៃ កីឡាករ Erdene ក៏មានរថយន្តទទួល
-
ព័ត៌មានជាតិ៥ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
ព័ត៌មានអន្ដរជាតិ១៩ ម៉ោង ago
Breaking News! បណ្ដាញសង្គម Facebook មានបញ្ហានៅទូទាំងពិភពលោកជាថ្មី
-
សន្តិសុខសង្គម១ សប្តាហ៍ ago
ដកហូតមុខតំណែង មេបញ្ជាការរងស្រុកស្វាយជ្រុំ៣នាក់ ពាក់ព័ន្ធករណីទារប្រាក់ពីអ្នកប្រើប្រាស់គ្រឿងញៀនជាង១ពាន់ដុល្លារ
-
ព័ត៌មានជាតិ៦ ថ្ងៃ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ព័ត៌មានអន្ដរជាតិ៥ ថ្ងៃ ago
អ្នកវិទ្យាសាស្ត្រស្កុតឡែនរកឃើញហ្វូស៊ីលចម្លែករូបរាងដូចសត្វនាគចិនអាយុកាល ២៤០ លានឆ្នាំ
-
ជីវិតកម្សាន្ដ៦ ថ្ងៃ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ
-
ព័ត៌មានអន្ដរជាតិ១ សប្តាហ៍ ago
នាវាចម្បាំងថៃ ច្រឡំដៃបាញ់កាំភ្លើងធំ ចំនាវាគ្នាឯង