តម្លៃប្រេងពិភពលោក កើនឡើងទៀតហើយ!

នៅថ្ងៃចន្ទនេះ តម្លៃប្រេង បានកើនឡើងជាបន្តទៀត ដោយប្រេងឆៅរបស់សហរដ្ឋអាមេរិក បានឡើងដល់កម្រិតខ្ពស់រយៈពេលប្រាំពីរឆ្នាំ ដោយសារការផ្គត់ផ្គង់ជាសកលនៅតែតានតឹង ចំពេលមានតម្រូវការខ្លាំង ទូទាំងពិភពលោក ខណៈសេដ្ឋកិច្ចបានងើបឡើងវិញបន្ទាប់ពី ធ្លាក់ចុះដោយសារវិបត្តិជំងឺរាតត្បាតកូវីដ-១៩។

តម្លៃប្រេងឆៅម៉ាក Brent បានឡើង ២៦សេន ឬ ០,៣ ភាគរយដល់ ៨៥.៧៩ដុល្លារក្នុងមួយបារ៉ែល។ តម្លៃ​នេះ ​គឺឡើង​ជិតដល់​កម្រិត​ខ្ពស់​រយៈ​ពេល​បី​ឆ្នាំ ​ដែលកាលនោះមានតម្លៃ ៨៦.១០ដុល្លារ​អាមេរិកក្នុងមួយបារ៉ែល។

ចំណែកប្រេងឆៅ West Texas Intermediate (WTI) របស់អាមេរិក បានកើនឡើង៤៨សេន ឬ ០,៦ភាគរយដល់ ៨៤.២៤ ដុល្លារក្នុងមួយបារ៉ែល។ វាបានឡើងដល់កម្រិតខ្ពស់បំផុតគិតចាប់តាំងពីខែតុលាឆ្នាំ២០១៥មក ដែលកាលនោះមានតម្លៃ៨៤.២៨ដុល្លារក្នុងមួយបារ៉ែល។

លោក Toshitaka Tazawa អ្នកវិភាគនៅក្រុមហ៊ុន Fujitomi Securities Co Ltd បាននិយាយថា “តម្លៃប្រេងនៅតែបន្តកើនឡើង ដោយសារការផ្គត់ផ្គង់ជាសកលនៅតែតឹងតែង ស្របពេលមានតម្រូវការខ្លាំង បន្ទាប់ពីពិភពលោកធូរស្បើយពីជំងឺរាតត្បាត”។

គួរបញ្ជាក់ថា តម្លៃ​ប្រេងកើនឡើង ​ក៏បណ្តាលមកពីការ​ព្រួយ​បារម្ភ​អំពី​កង្វះ​ខាត​ធ្យូងថ្ម និង​ឧស្ម័ន​នៅ​ក្នុង​ប្រទេស​ចិន ឥណ្ឌា និង​អឺរ៉ុប ផងដែរដែលជាហេតុ​ជំរុញឲ្យមានការងាកទៅប្រើប្រាស់​ប្រេងម៉ាស៊ូត និង​ប្រេង​ឥន្ធនៈវិញ ​សម្រាប់​ថាមពល៕

ប្រែសម្រួល៖ Vann Vann

ប្រភព៖ CNA

ចុចអាន៖ ឃើញប្រេងសាំងឡើងថ្លៃកុំឆ្ងល់! នេះជាមូលហេតុ