ត្រឹម​មួយ​ឆ្នាំ កម្ពុជាមាន​រោងចក្រ​ផលិត​ស្រាបៀ​​ធំ​ពីរ ចាយ​ទុន​រយ​លាន​ដុល្លារ​ចូល​មក​ទីផ្សារ​

ឆ្នាំ២០២០នេះ គម្រោង​រោងចក្រ​ផលិត​ស្រាបៀថ្មី​ចំនួន ២ បាន​សុំ​សិទ្ធិ​វិនិយោគ​​អាជីវកម្ម​​​នៅ​ទីផ្សារកម្ពុជា ក្រោយ​ទទួល​បាន​ការ​យល់ព្រម​ពីក្រុម​ប្រឹក្សាអភិវឌ្ឍន៍​កម្ពុជា (CDC)។

រោងចក្រ​របស់​​ក្រុមហ៊ុន​ក្រុមហ៊ុន វឌ្ឍនៈប្រូវើរី (VATTANAC BREWERY) បាន​​បើក​ការ​ដ្ឋាន​សាងសង់កាល​ពី​ថ្ងៃ ២៥ មិថុនា ឆ្នាំ ២០២០ មាន​ទីតាំង​នៅ​សង្កាត់​ព្រែកឯង ខណ្ឌ​ច្បារអំពៅ។

ប្រើ​ទុន​វិនិយោគ ១៣៩ លាន​ដុល្លារ អាច​ចាប់ផ្តើមខ្សែ​ចង្វាក់ផលិតកម្មនៅ​ឆ្នាំ ២០២១ ជាមួយសមត្ថភាពផលិតរហូតដល់ ៧៦ លានកេស ក្នុងមួយឆ្នាំ។ រោងចក្រនេះ រំពឹងនឹងបង្កើតឱកាសការងារដល់បុគ្គលិករហូតដល់ជាង ១,៥០០នាក់។

ក្រុម​ប្រឹក្សា​អភិវឌ្ឍន៍​កម្ពុជា CDC ក៏បាន​អនុញ្ញតិ​ឲ្យ​រោងចក្រផលិត​​ស្រាបៀនិងភេសជ្ជៈ​មួយ​ទៀត​របស់​ក្រុមហ៊ុន HANUMAN BEVERAGES ធ្វើ​​អាជីវកម្ម​ ដោយប្រើ​ទុន​វិនិយោគ​ ១៦០ លាន​ដុល្លារអាមេរិក។ រោងចក្រ​​ទី​ពីរ​នេះ​ មាន​ទីតាំង​នៅ​ភូមិ​ត្រពាំងវែង ឃុំឆក់ឈើនាង ស្រុកអង្គស្នួល ខេត្តកណ្តាលគ្រប់គ្រង​​ អាចបង្កើតការងារបានចំនួន ១.៥៤៥កន្លែង។

កម្ពុជាបាន​ក្លាយ​​មូលដ្ឋាន​នៃ​រោងចក្រ​ផលិត​ស្រាបៀ​យីហោ​ធំៗ​មាន​ទាំង​ក្នុង​ស្រុក​និង​មក​ពី​ក្រៅ​ប្រទេស​។ ​ទំនោរ​និយម​ការ​ទទួល​ទាន​ស្រាបៀរបស់​ពលរដ្ឋ​ក្នុង​ស្រុក​​ និង​កំណើន​ភ្ញៀវ​ទេសចរ​បរទេស​ប្រហែល ៦ លាន​នាក់​ក្នុង​មួយ​ឆ្នាំ នាំ​ឲ្យ​តម្រូវការ​​ស្រាបៀ​មាន​ការ​កើន​ឡើង​ជា​រៀង​រាល់​ឆ្នាំ​។

ឯកឧត្តម​អ៊ិត សំហេង រដ្ឋមន្រ្តី​ក្រសួង​ការងារ​ បណ្តុះបណ្តាល​វិជ្ជាជីវៈ បាន​លើក​ឡើង​ថា វិស័យ​គ្រឿង​ស្រវឹង បាន​រក​ចំណូល​ចូល​រដ្ឋ​ប្រហែល ៤០០ លាន​ដុល្លារ​ក្នុង​មួយ​ឆ្នាំ។

នៅ​កម្ពុជា​បច្ចុប្បន្ន​ក្រុមហ៊ុន​ផលិត​ស្រាបៀរ និង​ភេសជ្ជៈ​ដែល​បាន​ចុះបញ្ជី​នៅ​ក្រសួង​ឧស្សាហកម្ម វិទ្យាសាស្ត្រ បច្ចេកវិទ្យា និង​នវានុវត្តន៍​មាន​ចំនួន ១០ រួមមាន ក្រុមហ៊ុន Ana Water and Smiler Beverage Co.,Ltd ក្រុមហ៊ុន Asian Sunrise Co.,Ltd ក្រុមហ៊ុន Cambodia Brewery Ltd (CBL) ក្រុមហ៊ុន Cambrew Ltd ក្រុមហ៊ុន Daun Penh Food & Beverage Co., Ltd ក្រុមហ៊ុន Khmer Beverage Co.,Ltd ក្រុមហ៊ុន Far East Import Export Co.,Ltd ក្រុមហ៊ុន Kingdom Breweries (Cambodia) Limited ក្រុមហ៊ុន Media G.B Enterprise Co.,Ltd និង​ក្រុមហ៊ុន Phnom Penh Beer Co., Ltd៕