សេដ្ឋកិច្ច
អភិបាលខេត្ត៖ ទីក្រុងរណបមានលំនៅដ្ឋាន៥,០០០ខ្នងនឹងផ្លាស់ប្ដូរមុខមាត់ខេត្តកំពង់ស្ពឺ
ខេត្តកំពង់ស្ពឺ ដែលមានទីតាំងភូមិសាស្រ្តមិនឆ្ងាយប៉ុន្មានពីរាជធានីភ្នំពេញគឺជាតំបន់ឧស្សាហកម្មដ៍មានសក្ដានុពលមួយនៅប្រទេសកម្ពុជា ហើយបច្ចុប្បន្នខេត្តមួយនេះមានតំបន់សេដ្ឋកិច្ចពិសេសចំនួនពីរ ដែលមានរោងចក្រជាច្រើននៅក្នុងនោះនិងបានបង្កើតការងារមួយចំនួនធំដល់ប្រជាជន។
មិនតែប៉ុណ្ណោះ នៅថ្ងៃអនាគតអាចនឹងមានគម្រោងទីក្រុងរណបថ្មីមួយ ដែលនឹងលេចជារូបរាងឡើងនៅក្នុងខេត្តឧស្សាហកម្មមួយនេះ។
ឯកឧត្តម វ៉ី សំណាង អភិបាលខេត្តកំពង់ស្ពឺបានមានប្រសាសន៍ថា៖ «គម្រោងទីក្រុងរណបថ្មីមួយទំហំប្រមាណជា ១២០ហិកតា ដែលមានលំនៅដ្ឋានដល់ទៅ ៥,០០០ ខ្នងនឹងលេចរូបរាងឡើងក្នុងពេលឆាប់ៗនេះ ដែលនឹងផ្លាស់ប្ដូរមុខមាត់ខេត្តកំពង់ស្ពឺ ហើយគម្រោងនេះនឹងទាក់ទាញប្រជាជនថ្មីៗជាច្រើនទៀតមកប្រកបការងារ និងរស់នៅក្នុងខេត្តរបស់យើង។»
លោកអភិបាលខេត្តបានបន្តថា ខេត្តកំពង់ស្ពឺមានទីតាំងអំណោយផល ដោយសារតែវានៅចន្លោះទីក្រុងភ្នំពេញ និងខេត្តព្រះសីហនុ ដូច្នេះហើយទើបវិនិយោគិននាំគ្នាបង្កើតរោងចក្រផលិតនៅទីនេះ ដែលងាយស្រួលក្នុងការដឹកជញ្ជូនទំនិញទៅមក និងចំណាយតិច។ ម្យ៉ាងទៀត ហេដ្ឋារចនាសម្ព័ន្ធសំខាន់ៗដូចជា ផ្លូវជាតិលេខ៣ ផ្លូវជាតិលេខ៤ ផ្លូវជាតិលេខ ៥១ ផ្លូវជាតិលេខ៤១ និងផ្លូវល្បឿនលឿនតភ្ជាប់ពីខេត្តព្រះសីហនុ និងរាជធានីភ្នំពេញកាត់ខេត្តកំពង់ស្ពឺប្រហែលជា ៩០គ.ម នឹងទាក់ទាញវិនិយោគិនជាតិ និងអន្តរជាតិបន្ថែមទៀតឱ្យមកវិនិយោគនៅទីនេះ។
ភាពអំណោយផលផ្នែកភូមិសាស្រ្ត ឧស្សាហកម្ម និងហេដ្ឋារចនាសម្ព័ន្ធនៃខេត្តកំពង់ស្ពឺបានធ្វើឱ្យវិស័យអចនទ្រព្យមានសកម្មភាពគួរឱ្យចាប់អារម្មណ៍នៅឆ្នាំនេះ ។
លោក ច្រឹក សុខនីម ប្រធានសមាគមន៍អ្នកវាយតម្លៃ និងអចនទ្រព្យកម្ពុជាមានប្រសាសន៍ថា៖ «តម្លៃដីធ្លីនៅខេត្តកំពង់ស្ពឺមានភាពល្អប្រសើរនៅឆ្នាំនេះ ដោយសារតែមានបណ្ដុំរោងចក្រជាច្រើននៅទីនោះ ហើយរោងចក្រជាច្រើនទៀតនៅរាជធានីភ្នំពេញនឹងផ្លាស់ទៅខេត្តកំពង់ស្ពឺផងដែរ។ ក្រៅពីនេះ គម្រោងធំៗមួយចំនួនផ្សេងទៀតដូចជាគម្រោងទីក្រុងរណបក៏នឹងជួយជំរុញវិស័យអចលនទ្រព្យនៅក្នុងខេត្តមួយនេះឱ្យមានសន្ទុះកាន់តែខ្លាំងនៅថ្ងៃអនាគត»។
លោក សុខ នីម បន្តថា បច្ចុប្បន្នដីសម្រាប់ធ្វើរោងចក្រនៅតាមផ្លូវ៥១ មានតម្លៃថ្លៃជាងគេ ចន្លោះពី៥០ ទៅ១០០ដុល្លារ ក្នុងមួយម៉ែត្រការ៉េ ចំណែកដីស្ថិតនៅខាងក្នុងមានតម្លៃធូរជាងចន្លោះពី៧ ទៅ២០ដុល្លារប៉ុណ្ណោះ ក្នុងមួយម៉ែត្រការ៉េ។ ដូច្នេះ អ្នកវិនិយោគដីធ្លី អាចមានឱកាសចំណេញច្រើន បើពួកគេទិញដីតម្លៃធូរថ្លៃសម្រាប់វិនិយោគនៅខេត្តកំពង់ស្ពឺ។
អ្នកវិនិយោគដីធ្លីមួយរូប លោក ហោ ហេង ដែលបានទិញដីធ្លីជាច្រើនកន្លែងទុកនៅខេត្តកំពង់ស្ពឺកាលពីឆ្នាំ២០២០មានភាពជឿជាក់ចំពោះការអភិវឌ្ឍន៍វិស័យអចលនទ្រព្យនៅក្នុងខេត្តមួយនេះ ដោយលោករំពឹងថាតម្លៃដីធ្លី ដែលលោកបានទិញនឹងមានតម្លៃថ្លៃជាងនេះនៅឆ្នាំនេះ និងឆ្នាំក្រោយ។
លោក ហេង រំពឹងថា នឹងទទួលបានផលចំណេញច្រើនពីការវិនិយោគដីធ្លីនៅទីនោះ ជាមួយនឹងការបង្កើតតំបន់សេដ្ឋកិច្ចពិសេស និងគម្រោងទីក្រុងរណបថ្មីមួយនៅថ្ងៃអនាគត រួមទាំងហេដ្ឋារចនាសម្ព័ន្ធផ្លូវជាតិសំខាន់ៗជាច្រើនផ្សេងទៀត ដែលតភ្ជាប់ពីខេត្តកំពង់ស្ពឺទៅក្រុងភ្នំពេញ។
អត្ថបទ៖ វ៉ាត វិន
-
កីឡា៦ ថ្ងៃ ago
ឈ្នះខ្សែក្រវាត់ថ្ងៃជាមួយ ឈឿង ល្វៃ កីឡាករ Erdene ក៏មានរថយន្តទទួល
-
ព័ត៌មានជាតិ៥ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
ព័ត៌មានអន្ដរជាតិ១២ ម៉ោង ago
Breaking News! បណ្ដាញសង្គម Facebook មានបញ្ហានៅទូទាំងពិភពលោកជាថ្មី
-
សន្តិសុខសង្គម១ សប្តាហ៍ ago
ដកហូតមុខតំណែង មេបញ្ជាការរងស្រុកស្វាយជ្រុំ៣នាក់ ពាក់ព័ន្ធករណីទារប្រាក់ពីអ្នកប្រើប្រាស់គ្រឿងញៀនជាង១ពាន់ដុល្លារ
-
ជីវិតកម្សាន្ដ១ សប្តាហ៍ ago
មនុស្សស្និទ្ធស្នាលទម្លាយពីស្ថានភាព Ngoc Trinh ក្រោយចេញពីពន្ធនាគារជាង៣ខែ
-
ព័ត៌មានជាតិ៦ ថ្ងៃ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ព័ត៌មានអន្ដរជាតិ៥ ថ្ងៃ ago
អ្នកវិទ្យាសាស្ត្រស្កុតឡែនរកឃើញហ្វូស៊ីលចម្លែករូបរាងដូចសត្វនាគចិនអាយុកាល ២៤០ លានឆ្នាំ
-
ជីវិតកម្សាន្ដ៦ ថ្ងៃ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ