បណ្ដាធនាគារវៀតណាមបញ្ឈប់បុគ្គល​ ៣ ០០០ នាក់ ដោយកំណើនប្រើប្រាស់ AI

ក្នុងឆមាសទីមួយនៃឆ្នាំ ២០២៥ នេះ​ បណ្ដា​ធនាគារវៀតណាមចំនួន ២៨ ស្ថាប័ន​ បានកាត់បន្ថយបុគ្គលិក​របស់ខ្លួន​ជិត ៣ ០០០ នាក់ មកនៅសរុប​ត្រឹមប្រហែល ២៨០ ០០០ ចំពេលដែលពួកគេបង្កើនការប្រើប្រាស់​បញ្ញាសិប្បនិម្មិត (AI) ។

ធនាគារធំៗដែលបញ្ឈប់បុគ្គលិករបស់ខ្លួនរួមមាន​ LPBank, VIB, ACB, ABBank, Vietcombank និង VietinBank ជាដើម។

អ្នកជំនាញផ្នែកយុទ្ធសាស្ត្រធនាគារ លោក Le Hoai An បានប្រាប់កាសែត Tuoi Tre ​ថា រលកនៃការកាត់បន្ថយបុគ្គលិកនាពេលថ្មីៗនេះ ភាគច្រើនជាលទ្ធផលនៃកិច្ចខិតខំប្រឹងប្រែង​ឌីជីថលបនីយកម្ម។

ធនាគារលក់រាយមើលឃើញពីការបោះជំហានបែបនេះច្រើនជាងគេ ​នៅពេលពួកគេ​ផ្ដោតលើ​ការ​ផ្តល់​ឥណទាន​ផ្ទាល់ខ្លួន​ជាជាង​ឥណទានសម្រាប់​សាជីវកម្ម ដោយ​ដំណើការផ្ដល់ដូចជា​កម្ចីទិញផ្ទះ និង​រថយន្តជាដើមនោះ ត្រូវបាន​រៀបចំឡើងដោយស្វ័យប្រវត្តិ។ ​

ជាឧទាហរណ៍ មន្រ្តីឥណទានដែលធ្លាប់តែគ្រប់គ្រងលើ​ឥណទានសម្រាប់ទិញរថយន្ត​ចំនួន​ ៥ ករណីក្នុងមួយខែ​ ឥឡូវនេះ​អាច​ធ្វើការបាន​ច្រើនករណីជាងមុខ ដោយសារតែធនាគារងាកទៅប្រើប្រាស់ឌីជីថល ជាជាងក្រដាសស្នាម។

​អ្នកជំនាញក្នុងវិស័យធនាគារនៅវៀតណាមបាន​បន្តថា ផលប៉ះពាល់ AI លើ​ការងារនៃធនាគារ​ធំៗនៅអឺរ៉ុប និងសហរដ្ឋអាមេរិក បាន​រីកចេញឡើងហើយ ខណៈនៅវៀតណាម វាស្ថិតនៅដំណាក់កាលដំបូងនៅឡើយ​ ហើយ​រំពឹងថានឹង​កើនឡើងនាថ្ងៃអនាគត។ អ្នកជំនាញព្យាករថា ធនាគារវៀតណាម​នឹ​ងមើលឃើញពីការផ្លាស់ប្ដូរធំក្នុងរយៈពេល​ ៣ ឆ្នាំទៅមុខទៀត នៅពេលដែល AI កាន់តែកើនឡើង។

ប្រធានផ្នែកធនធានមនុស្សនៅធនាគារ​ HSBC Vietnam លោក Tran Thi Nguyet Oanh ​បាននិយាយថា បុគ្គលិកធនាគារ រួមទាំងបម្រើអតិថិជន និងលេខា ​ស្ថិតនៅក្នុងចំណោមការងារធនាគារ​ដែលមានហានិភ័យបំផុតដោយសារ AI។ នេះបើយោងតាមវេទិកាសេដ្ឋកិច្ចពិភពលោក។

​លោកស្រីបានកត់សម្គាល់ថា ការបើកគណនីឌីជីថល​ លែងត្រូវការ​ការធ្វើឯកសារ​នៅធនាគារផ្ទាល់ ខណៈ​ AI ឥឡូវនេះ គ្រប់គ្រងភារកិច្ចដូចជាការវិភាគទិន្នន័យ ការ​ចាប់ការ​ក្លែងបន្លំ និងការសរសេររបាយការណ៍ជាដើម។

​