ម្នាក់ទៀតហើយ ដេកស្លាប់ក្នុងផ្ទះ លុះគ្រូពេទ្យចុះទៅពិនិត្យឃើញវិជ្ជមានកូវីដ-១៩

ភ្នំពេញ៖ បុរសម្នាក់ត្រូវក្រុមគ្រួសារអះអាងថាដេកមិនក្រោកសោះទើបនាំគ្នាទៅដាស់ក៏ស្រាប់តែរឹងខ្លួនស្លាប់ទៅហើយ។

ហេតុការណ៍នេះបានកើតឡើង នៅរសៀលថ្ងៃទី២៦ ខែមេសា នេះ នៅក្នុងភូមិដើមស្លែង សង្កាត់ច្បារអំពៅទី២ ខណ្ឌច្បារអំពៅ រាជធានីភ្នំពេញ។ ជនរងគ្រោះដែលបានបាត់បង់ជីវិតនោះឈ្មោះ ផាត់ សំអូន ភេទប្រុស អាយុ៥៦ឆ្នាំ។

តាមសេចក្តីរាយការណ៍ពីលោក យ៉ិន វុធ ចៅសង្កាត់ច្បារអំពៅទី២បានឱ្យដឹងថា ក្រុមគ្រួសារជនរងគ្រោះបានទៅដាស់ជនរងគ្រោះឱ្យងើប ក៏ស្រាប់តែដងខ្លួនរឹងបាត់ទៅហើយ ទើបរាយការណ៍ឱ្យសមត្ថកិច្ច និងគ្រូពេទ្យចុះទៅពិនិត្យ និងយកសំណាកសពធ្វើពិសោធន៍ ទើបរកឃើញជនរងគ្រោះមានវិជ្ជមានកូវីដ-១៩។

ក្រុមគ្រួសារសពបាននិយាយថាសព្វថ្ងៃនេះជនរងគ្រោះមានជំងឺក្រឹនថ្លើម ហើយប៉ុន្មានថ្ងៃនេះគាត់មានជំងឺផ្តាសាយ ប៉ុន្តែពុំបានដឹងថាជាជំងឺកូវីដ-១៩ សោះ។

នេះជាសញ្ញាគួរឱ្យភ័យខ្លាចក្នុងមូលដ្ឋានសង្កាត់ច្បារអំពៅទី២ ខណ្ឌច្បារអំពៅ ដែលមានមនុស្ស២នាក់ស្លាប់នៅក្នុងផ្ទះ ក្នុងអំឡុង២ថ្ងៃជាប់គ្នានៅពេលដែលគ្រួសារមិនដឹងថាជាអ្នកដែលស្លាប់មានជំងឺកូវីដ-១៩នោះ៕

អត្ថបទ៖ នរា