កូវីដ-១៩
រដ្ឋបាលខេត្តកោះកុងសម្រេចយកទីតាំង២ជាផ្លូវការ ដើម្បីសង់ឈាបនដ្ឋាន
កោះកុង៖ បន្ទាប់ពីជ្រើសរើសប៉ុន្មានកន្លែងកន្លងមកនោះ រដ្ឋបាលខេត្តកោះកុង បានកំណត់យកទីតាំងចំនួន២កន្លែងធ្វើជាឈាបនដ្ឋានបូជាសពស្លាប់ដោយជំងឺកូវីឌ-១៩។
លោកស្រី មិថុនា ភូថង អភិបាលខេត្តកោះកុង នៅថ្ងៃទី៣ ខែឧសភា ឆ្នាំ២០២១នេះបានដឹកនាំក្រុមការងារមន្រ្តីមន្ទីរជំនាញចំណុះក្រោមខេត្តចុះសិក្សាពិនិត្យរកទីតាំងដែលសមស្របមិនបង្កផលប៉ះពាល់ដល់បរិស្ថានសោភណ្ឌភាព និងការរស់នៅរបស់ប្រជាពលរដ្ឋ តាមរយៈសង់ឈាបនដ្ឋានសម្រាប់បូជាសពអ្នកស្លាប់ដោយសារជំងឺកូវីដ-១៩នាពេលបច្ចុប្បន្ន។
ក្រោយពិនិត្យ លោកស្រីអភិបាល យល់ថា ទីតាំងដីបម្រុងទុករបស់ស្រុកបូទុមសាគរ និងស្រុកមណ្ឌលសីមា អំណោយផលដល់ការធ្វើឈាបនដ្ឋាន។ ដូច្នេះលោកស្រីជំរុញឱ្យមន្រ្តីមន្ទីរជំនាញពន្លឿនការងារវាស់វែងរៀបចំទីតាំង និងគូសប្លង់ឈាបនដ្ឋានឱ្យបានលឿន មុននឹងផ្តើមដំណើរការសាងសង់នៅពេលខាងមុខឆាប់ៗ។
លោក ឃឹម ច័ន្ទឌី អភិបាលរងខេត្តកោះកុង លើកឡើងថា រដ្ឋបាលខេត្តកំណត់យកទីតាំងទី១តាមបណ្តោយផ្លូវជាតិលេខ៤៨ ត្រង់ចំណុចបង្គោលគីឡូម៉ែត្រលេខ១៣៦ ភូមិទួលគគីរលើ ឃុំទួលគគីរ ស្រុកមណ្ឌលសីមា និងទី២ ដីបម្រុងទុករបស់ស្រុកនៅឃុំជីត្រេះ ស្រុកបូទុមសាគរ។
បើតាមលោកអភិបាលរងខេត្ត ដោយសារតែលក្ខណៈភូមិសាស្រ្តខេត្តរវាងទីរួមខេត្ត និងបណ្តាស្រុកឆ្ងាយពីគេ និងមន្ទីរពេទ្យព្យាបាលអ្នកជំងឺកូវីដ-១៩ផងនោះ ទើបមានការផ្លាស់ប្តូរទីតាំងជាបន្តបន្ទាប់។ ពោលគឺទើបថ្ងៃនេះ លោកស្រីអភិបាលខេត្តឯកភាពយកទីតាំង២ខាងលើជាផ្លូវការតែម្តង។
សម្រាប់ផ្ទៃដីធ្វើឈាបនដ្ឋាន ត្រូវកំណត់យកដីប្រើប្រាស់២ហិចតាក្នុងមួយឈាបនដ្ឋាន រីឯថវិកាដែលត្រូវចំណាយលើដំណើរការសាងសង់ គឺរដ្ឋបាលខេត្តជាអ្នកទទួលបន្ទុកគៀងគរមូលនិធិពីសប្បុរសជនឱ្យបានឆាប់រហ័ស។
គួរជម្រាបថា បច្ចុប្បន្នខេត្តកោះកុង ពុំទាន់រកឃើញថាមានមនុស្សស្លាប់ដោយសារជំងឺកូវីដ-១៩នោះទេ តែជាការមិនធ្វេសប្រហែសបានឡើយចាំបាច់ផ្សព្វផ្សាយឱ្យពលរដ្ឋបន្តចូលរួមទប់ស្កាត់ជាប្រចាំ។
ជាការសិក្សា និងស្រង់បទពិសោធន៍ខេត្តផ្សេងៗ ឈាបនដ្ឋានមួយអាចចំណាយចាប់ពី៧ពាន់ដុល្លារដល់ទៅជាង១ម៉ឹនដុល្លារ ប៉ុន្តែភូមិសាស្រ្តខេត្តកោះកុងវិញ អាចចំណាយច្រើនជាងនេះ តាមរយៈការចាក់ដីបំពេញចំណុចខ្វះខាតសងខាងផ្លូវចូលទីតាំង៕
អត្តបទ៖ សិរីវឌ្ឍនៈ
-
កីឡា៧ ថ្ងៃ ago
ឈ្នះខ្សែក្រវាត់ថ្ងៃជាមួយ ឈឿង ល្វៃ កីឡាករ Erdene ក៏មានរថយន្តទទួល
-
ព័ត៌មានជាតិ៦ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
ព័ត៌មានអន្ដរជាតិ១ ថ្ងៃ ago
Breaking News! បណ្ដាញសង្គម Facebook មានបញ្ហានៅទូទាំងពិភពលោកជាថ្មី
-
សន្តិសុខសង្គម១ សប្តាហ៍ ago
ដកហូតមុខតំណែង មេបញ្ជាការរងស្រុកស្វាយជ្រុំ៣នាក់ ពាក់ព័ន្ធករណីទារប្រាក់ពីអ្នកប្រើប្រាស់គ្រឿងញៀនជាង១ពាន់ដុល្លារ
-
ព័ត៌មានជាតិ៦ ថ្ងៃ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ព័ត៌មានអន្ដរជាតិ៦ ថ្ងៃ ago
អ្នកវិទ្យាសាស្ត្រស្កុតឡែនរកឃើញហ្វូស៊ីលចម្លែករូបរាងដូចសត្វនាគចិនអាយុកាល ២៤០ លានឆ្នាំ
-
ជីវិតកម្សាន្ដ៧ ថ្ងៃ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ
-
ព័ត៌មានអន្ដរជាតិ១ សប្តាហ៍ ago
នាវាចម្បាំងថៃ ច្រឡំដៃបាញ់កាំភ្លើងធំ ចំនាវាគ្នាឯង