អឺរ៉ុប ត្រៀមអនុម័តប្រើប្រាស់វ៉ាក់សាំង Sinovac របស់ចិន ក្រោយវាយតម្លៃពីប្រសិទ្ធភាព និងសុវត្ថិភាព

និយតករឱសថ របស់សហភាពអឺរ៉ុប (EU) បានចាប់ផ្តើមពិនិត្យឡើងវិញ នូវវ៉ាក់សាំង CoronaVac ដែលផលិតដោយ ក្រុមហ៊ុនឱសថចិន Sinovac ដើម្បីវាយតម្លៃពីប្រសិទ្ធភាព និងសុវត្ថិភាព ហើយវាជាជំហានដំបូង ឆ្ពោះទៅរកការយល់ព្រម សម្រាប់ការប្រើប្រាស់ នៅក្នុងប្លុកប្រទេសទាំង ២៧ មួយនេះ ។

ទីភ្នាក់ងារឱសថអឺរ៉ុប (EMA) បាននិយាយកាលពីថ្ងៃព្រហស្បតិ៍ថា ការសម្រេចចិត្តរបស់ខ្លួន ដើម្បីចាប់ផ្តើមការពិនិត្យឡើងវិញ នូវវ៉ាក់សាំង Sinovac គឺផ្អែកលើលទ្ធផលបឋម ពីការសិក្សាមន្ទីរពិសោធន៍ និងការព្យាបាល ដែលពាក់ព័ន្ធនឹងសត្វ និងមនុស្ស ក៏ដូចជាការបង្ហាញថា វ៉ាក់សាំងនេះ បង្កើតការឆ្លើយតបភាពស៊ាំ ប្រឆាំងនឹងវីរុសនេះប្រាកដមែន ។

ទីភ្នាក់ងារនេះ បាននិយាយនៅក្នុងសេចក្តីថ្លែងការណ៍មួយថា “ការសិក្សាទាំងនេះ បានបង្ហាញថា វ៉ាក់សាំង Sinovac ជំរុញការផលិតអង់ទីគ័រ ហើយអាចជួយការពារ ប្រឆាំងនឹងជំងឺនេះ” ។

វ៉ាក់សាំង Sinovac មានផ្ទុកវីរុសអសកម្ម ឬងាប់ នៃវីរុស SARS-CoV-2 ដើម្បីជួយប្រព័ន្ធភាពស៊ាំ របស់រាងកាយមនុស្ស បង្កើតអង់ទីគ័រ ហើយវាបានបង្ហាញ អត្រាប្រសិទ្ធភាពចន្លោះពី ៥០ ភាគរយ ទៅ ៩០ ភាគរយ នៅក្នុងការសិក្សាផ្សេងៗគ្នា ។

គួររំឭកថា បច្ចុប្បន្ននេះ វ៉ាក់សាំង Sinovac ត្រូវបានអនុញ្ញាត ឲ្យប្រើប្រាស់នៅក្នុងប្រទេសចិន កម្ពុជា ឥណ្ឌូនេស៊ី ប្រេស៊ីល និងទួរគី ជាដើម ។

កាលពីខែមេសា ក្រុមហ៊ុន Sinovac បាននិយាយថា រោងចក្រសម្រាប់វ៉ាក់សាំង CoronaVac ផលិតទី ៣ របស់ខ្លួន នៅតាមតំបន់មួយចំនួន បានត្រៀមរួចរាល់ហើយ ហើយមានសមត្ថភាព ផលិតវ៉ាក់សាំងប្រចាំឆ្នាំទ្វេដង ដល់ទៅ ២ ពាន់លានដូសឯណោះ ។

ក្រុមហ៊ុនបាននិយាយថា រហូតមកដល់ពេលនេះ វ៉ាក់សាំងរបស់ក្រុមហ៊ុន Sinovac ជាង ២០០ លានដូស ត្រូវបានចែកចាយទូទាំងពិភពលោក ៕

ប្រែសម្រួលដោយ ៖ ជីវ័ន្ត

ប្រភព ៖ Al Jazeera

ចុចអាន ៖ ក្រោយប្រទេសជាច្រើនបើកយុទ្ធនាការចាក់របស់ចិន ពេលនេះ WHO ផ្ដល់តម្រុយអនុម័តប្រើប្រាស់ជាបន្ទាន់ វ៉ាក់សាំង Sinopharm និង Sinovac

ចុចអាន ៖ មូលហេតុដែលអ្នកចាំបាច់ត្រូវតែចាក់វ៉ាក់សាំង Sinovac ឲ្យគ្រប់ ២ដូស