កូវីដ-១៩
ហេតុអ្វីមន្ត្រីថាការបិទខ្ទប់ជោគជ័យ ទន្ទឹមពេលចំនួនឆ្លងកូវីដកើនឡើង?
មន្ត្រីជាន់ខ្ពស់នៃរដ្ឋបាលរាជធានីភ្នំពេញ បង្ហាញថា ការបិទខ្ទប់រាជធានីកន្លងទៅនេះទទួលបានផ្លែផ្កាជោគជ័យ បើទោះជាឃើញចំនួនឆ្លងកូវីដ-១៩កើនឡើងមែនពិត ដោយសារក្រុមការងារបានគ្រប់គ្រង និងទប់ស្កាត់មិនឱ្យមានការឆ្លងរីករាលដាលនៃមេរោគកូវីដ-១៩ ចេញពីតំបន់ហានិភ័យខ្ពស់។
ការបកស្រាយនេះធ្វើឡើងនៅក្នុងសន្និសីទសារព័ត៌មានផ្សព្វផ្សាយសេចក្តីសម្រេចរបស់រដ្ឋបាលរាជធានីភ្នំពេញ ស្តីពីការដាក់ចេញវិធានការរដ្ឋបាលសម្រាប់ភូមិសាស្ត្រ រាជធានីភ្នំពេញ ដើម្បីទប់ស្កាត់ការឆ្លងរាលដាលជំងឺកូវីដ១៩ នៅថ្ងៃទី០៦ ខែឧសភា ឆ្នាំ២០២១ នេះ។
លោក នួន ផារ័ត្ន អភិបាលរងរាជធានីភ្នំពេញ មានប្រសាសន៍បកស្រាយថា ការបិទខ្ទប់រាជធានី១៤ថ្ងៃ ធ្វើឱ្យទប់ស្កាត់ការឆ្លងរាលដាលមេរោគកូវីដ១៤នៅរាជធានី ព្រមទាំងអាជ្ញាធរអាចកំណត់ និងគ្រប់គ្រងបាននូវតំបន់ ក្រហមដែលមានការឆ្លងធ្ងន់ធ្ងរ លឿងទុំមានការធ្លងខ្ពស់ និងលឿងមានលក្ខណៈឆ្លងស្រាល។
លោក មានប្រសាសន៍បន្ថែមថា៖ “៧ថ្ងៃក្រោយនៃការបិទខ្ទប់នេះ ក៏មានសារៈសំខាន់ និងទទួលបានផ្លែផ្កាគួរជាទីមោទនៈដែរ ព្រោះអាជ្ញធរបានបង្រួមតំបន់ក្រហមឱ្យកាន់តែតូច ដែលកាលដើមឡើងមាន៣សង្កាត់នៃខណ្ឌមានជ័យ មកនៅតែប៉ុន្មានភូមិប៉ុណ្ណោះ ហើយប៉ុន្មានភូមិទាំងនោះ គឺផ្នែកខ្លះនៃភូមិរបស់សង្កាត់ស្ទឹមមានជ័យ៣ ស្ទឹងមានជ័យ២ ស្ទឹងមានជ័យ១ និងប៉ុន្មានភូមិផ្សេងទៀតទៅប្រែពីតំបន់ក្រហមទៅជាតំបន់លឿងទុំ”។
លោក នួន ផារ័ត្ន លើកឡើងថា អាជ្ញាធរ និងមន្ត្រីជំនាញ បានធ្វើការយ៉ាងហ្មត់ចត់ និងបានឆ្កៀលចេញនៅតំបន់ដែលមិនពាក់ព័ន្ធ ព្រោះនៅតំបន់ក្រហម ក៏មានតំបន់ខ្លះមិនពាក់ព័ន្ធដែរ ដើម្បីបង្រួមបញ្ហាឱ្យចំចំណុច និងផលប៉ះពាល់នៃការបិទខ្ទប់នេះ ឱ្យកាន់តែរួមតូច។
លោក មានប្រសាន៍ដោយចោទជាសំណួរថា៖ “តួលេខចំនួនឆ្លងនៅតែមានកម្រិតខ្ពស់ ហេតុអ្វីយើងនៅតែបន្តដកតំបន់ក្រហម និងតំបន់លឿងទុំឱ្យកាន់តែរួមតូច និងពង្រីកតំបន់លឿងឱ្យកាន់តែច្រើន?”។
លោក នួន ផារ័ត្ន បញ្ជាក់ថា តួលេខជាបញ្ហាមួយ តែការឆ្លងជំងឺកូវីដ-១៩ ក្នុងរាជធានីភ្នំពេញនេះ មិនមានការឆ្លងរីករាលដាលទេ ហើយក៏មិនមានការកើនឡើងដែរ។
លោក បង្ហាញទៀតថា៖ “អ្នកដែលទើបរកឃើញមានវិជ្ជមាន ក៏មិនប្រាកដថា ពួកគាត់ទើបតែឆ្លងដែរ។ អ៊ីចឹងអ្វីដែលសំខាន់ គឺយើងបានរកឃើញប្រភពបញ្ហា ទីតាំងដែលមានអ្នកផ្ទុកមេរោគកូវីដ-១៩ ច្រើននៅតំបន់ណា”។
លោក កើត ឆែ អភិបាលរងរាជធានីភ្នំពេញ លើកឡើងថា បើមើលតួលេខពីម្សិលមិញ និងម្សិលម៉្ងៃ ក្នុងចំណោមតួលេខអ្នកឆ្លងមេរោគកូវីដ-១៩ ពី៥០០ជាង ទៅជិត៦០០នាក់នោះ ចំនួនអ្នកមានចំនួន៩០ភាគរយជាងស្ថិតនៅតំបន់ក្រហម និងតំបន់លឿងទុំដែលរដ្ឋបាលរាជធានីបានកំណត់ ហើយមានតែតិចជាង១០ភាគរយដែលកើតនៅតំបន់លឿង ហើយអាចគ្រប់គ្រងបាន។
លោក កើត ឆែ បញ្ជាក់បន្ថែមថា រដ្ឋបាលរាជធានីបានធ្វើការដោយយកចិត្តទុកដាក់ដើម្បីកំណត់ផែនទីភូមិសាស្ត្រ ដែលបង្រួមបញ្ហានេះឱ្យកាន់តែរួមតូចទៅរកការបញ្ចប់នាពេលដ៏ខ្លីខាងមុខ។ ចំពោះនៅតំបន់ក្រហម នៅតែបន្តវិធានការ និងអនុវត្តឱ្យកាន់តែតឹងរឹងជាងការអនុវត្តនូវវិធានការមុនៗ ដោយសារឈានទៅរកការកាត់ផ្ដាច់ទាំងស្រុងនូវឫសគល់នៃការឆ្លងរីករាលដាលនៃជំងឺកូវីដ-១៩ កើតចេញពីព្រឹត្តិការណ៍ ២០កុម្ភៈ”។
គួរបញ្ជាក់ថា ថ្ងៃទី៥ ខែឧសភា ម្សិលមិញ សាលារាជធានីភ្នំពេញបានចេញសេចក្ដីជូនដំណឹងថា នៅថ្ងៃទី០៤ ខែឧសភា ឆ្នាំ២០២១ នៅរាជធានីភ្នំពេញ រកឃើញករណីវិជ្ជមានកូវីដ-១៩ ចំនួន ៥៩៤នាក់ ដែលជាករណីឆ្លងក្នុងសហគមន៍។ ចំណែកម្សិលម៉្ងៃថ្ងៃទី៤ ខែឧសភា រាជធានីភ្នំពេញ រកឃើញករណីវិជ្ជមានកូវីដ-១៩ ចំនួន ៦១៣នាក់ រីឯថ្ងៃទី៣ ខែឧសភា រកឃើញ ៥២៤នាក់៕
អត្ថបទ៖ ច័ន្ទវីរៈ
-
ព័ត៌មានជាតិ១ សប្តាហ៍ ago
អ្នកឧកញ៉ា គួច ម៉េងលី÷ បើមិននាំខ្លួនមេខ្លោងក្រុមហ៊ុន CIC Plc មកផ្ដន្ទាទោសទេ ពលរដ្ឋនឹងលែងជឿប្រព័ន្ធយុត្តិធម៌កម្ពុជា
-
ព័ត៌មានជាតិ៥ ថ្ងៃ ago
ទ្រព្យសកម្មរបស់ក្រុមហ៊ុន CIC Plc ប្រមាណ ៩០% នៃចំនួនទឹកប្រាក់សរុប ត្រូវបានប្រមូលមកវិញ
-
ព័ត៌មានជាតិ៥ ថ្ងៃ ago
បណ្ឌិត គិន ភា៖ «ហេតុអីមិនបន្ទោសអ្នកបោកគេ បែរជាបន្ទោសអ្នកត្រូវគេបោកទៅវិញ?»
-
ចរាចរណ៍២ ថ្ងៃ ago
បឋម៖ រថភ្លើងបុករថយន្ដក្រុងដឹកអ្នកដំណើររបួសច្រើននាក់
-
ព័ត៌មានជាតិ៦ ថ្ងៃ ago
កម្ពុជានឹងមានភ្លៀងធ្លាក់ ១៥% ដល់ថ្ងៃទី ២៧ ដំណាច់ខែមីនា
-
ព័ត៌មានជាតិ៦ ថ្ងៃ ago
ដីជាង ៤៣ ហិកតា នៅភូមិសាស្ត្រភ្នំ ១៥០០ ត្រៀមដាំស្ដារព្រៃឈើឡើងវិញ
-
សេដ្ឋកិច្ច៧ ថ្ងៃ ago
មន្ត្រីជាន់ខ្ពស់ធនាគារជាតិ៖ ក្រដាសប្រាក់ ៥ម៉ឺន រៀល មានគូសឆ្នូតកណ្តាលអាចប្តូរយកប្រាក់ថ្មីបានដោយឥតគិតថ្លៃ
-
ព័ត៌មានជាតិ៦ ថ្ងៃ ago
កសិដ្ឋានវៃឆ្លាតដាំដំណាំពោតលើផ្ទៃដីប្រមាណ ១ពាន់ហិកតា នៅខេត្តសៀមរាប ត្រូវបានសម្ពោធជាផ្លូវការ