កូវីដ សម្លាប់មនុស្សលើសកលលោក ខ្ពស់ជាងតួលេខរបស់ WHO ដល់ទៅទ្វេដងឯណោះ

ការសិក្សាមួយបានអះអាងថា ជំងឺកូវីដ-១៩ បានសម្លាប់មនុស្សច្រើនជាងចំនួនដែលត្រូវបានរាយការណ៍ជាផ្លូវការ រហូតដល់ទៅទ្វេដងឯណោះ។

ក្រុមអ្នកវិភាគនៅសហរដ្ឋអាមេរិកបានប៉ាន់ស្មានថា ជំងឺនេះបានបណ្តាលឲ្យមនុស្សស្លាប់ចំនួន៦.៩លាននាក់នៅទូទាំងពិភពលោក ផ្ទុយពីចំនួន៣.២លាននាក់ដែលត្រូវបានប្រកាសដោយអង្គការសុខភាពពិភពលោក (WHO)។

ពួកគេបានព្រមានថា កម្រិតនៃការធ្វើតេស្តទាប និងប្រព័ន្ធថែទាំសុខភាពអន់ខ្សោយនៅក្នុងប្រទេសកំពុងអភិវឌ្ឍន៍ គឺជាផ្នែកមួយនៅពីក្រោយស្ថិតិដ៏គួរឲ្យសង្ស័យនេះ។

ប៉ុន្តែចំនួនដ៏លើសលប់នៃរបាយការណ៍មិនគ្រប់គ្រាន់ បានកើតឡើងនៅក្នុងបណ្តាប្រទេសលោកខាងលិចរួមមានចក្រភពអង់គ្លេស សហរដ្ឋអាមេរិកនិងអ៊ីតាលី។ ភាគច្រើនគឺដោយសារតែកង្វះការធ្វើតេស្ត នៅពេលជំងឺរាតត្បាតចាប់ផ្តើម ពោលគឺនៅពេលដែលអ្នកជំងឺកូវីដជាច្រើន បានស្លាប់ដោយគ្មានការបញ្ជាក់។

វិទ្យាស្ថានវាស់វែងនិងវាយតម្លៃសុខភាពនៅសកលវិទ្យាល័យវ៉ាស៊ីនតោន បានព្រមានថា ទិន្ន​ន័យបានបង្ហាញថា ចំនួនអ្នកឆ្លងជំងឺរាតត្បាត គឺពិតជាអាក្រក់ណាស់ក្នុងការទទួលយក។

យោងតាមការវិភាគបានបង្ហាញថា សហរដ្ឋអាមេរិកជាប្រទេសមានអ្នកស្លាប់ដោយសារកូវីដខ្ពស់ជាងគេបំផុតនៅលើពិភពលោក ដោយមានចំនួន៩០៥,២៨៩នាក់ ពោលគឺខ្ពស់ជាងចំនួន៥៧៤,០៤៣ដែលត្រូវបានកត់ត្រាជាផ្លូវការ។

បន្ទាប់មកគឺប្រទេសឥណ្ឌានិងម៉ិកស៊ិក ដែលត្រូវបានគេប៉ាន់ស្មានថាមានរងគ្រោះដោយសារវីរុសកូវីដ-១៩ ជាង៦០ម៉ឺននាក់ ដែលខ្ពស់ជាងតួលេខរបស់ WHO​ រហូតដល់ទៅ៣ដងឯណោះ៕

ប្រែសម្រួលដោយ៖ Vann Vann

ប្រភព៖ Daily Mail

ចុចអាន៖ ស្ថានភាពយ៉ាប់យ៉ឺន! អ្នកជំងឺកូវីដឥណ្ឌា ត្រូវដាក់ឲ្យដេកគ្រែមួយ៤នាក់ ហើយគ្រូពេទ្យបង្ខំចិត្តយកសពទៅបូជាដោយខ្លួនឯង