មិនធម្មតា! រុស្ស៊ី ក៏មានវ៉ាក់សាំង ចាក់តែមួយដូស ហើយកំពុងប្រើប្រាស់នៅក្នុងប្រទេសជាមួយប្រសិទ្ធភាពការពារកូវីដ ជិត ៨០ ភាគរយ

ប្រទេសរុស្ស៊ី កាលពីថ្ងៃព្រហស្បតិ៍ បានអនុម័តប្រភេទវ៉ាក់សាំង ការពារជំងឺកូវីដ ១៩ Sputnik V របស់ខ្លួនមួយទៀត ដែលជាវ៉ាក់សាំងចាក់តែមួយដូស សម្រាប់ប្រើប្រាស់នៅក្នុងប្រទេសនេះ ។

មូលនិធិវិនិយោគផ្ទាល់របស់រុស្ស៊ី (RDIF) បាននិយាយ នៅក្នុងសេចក្តីថ្លែងការណ៍មួយថា វ៉ាក់សាំងចាក់តែមួយដូស Sputnik Light គឺមានសមត្ថភាពគ្រប់គ្រាន់ ក្នុងការបង្កឲ្យមានប្រព័ន្ធភាពស៊ាំខ្លាំងក្លា ។

RDIF បាននិយាយថា “វ៉ាក់សាំង Sputnik Light មានប្រសិទ្ធភាព ការពារជំងឺកូវីដ ១៩ ចំនួន ៧៩.៤ ភាគរយ រយៈពេល ២៨ ថ្ងៃ បន្ទាប់ពីទទួលការចាក់” ។

RDIF បន្តថា “អ្វីដែលសំខាន់នោះ អត្រាប្រសិទ្ធភាពជិត ៨០ ភាគរយនេះ គឺខ្ពស់ជាង វ៉ាក់សាំងជាច្រើនផ្សេងទៀត ដែលតម្រូវឲ្យចាក់ ២ ដូស” ។

ទន្ទឹមនោះ អត្រាប្រសិទ្ធភាពនេះ ត្រូវបានគណនា ផ្អែកលើទិន្នន័យ ពីដំណាក់កាលទី ១ និងទី ២ នៃការសាកល្បងព្យាបាល ដែលបានធ្វើឡើងចាប់ពីថ្ងៃទី ៥ ខែធ្នូ ឆ្នាំ ២០២០ រហូតដល់ថ្ងៃទី ១៥ ខែមេសា ឆ្នាំ ២០២១ ។

ចំណែក ដំណាក់កាលទី ៣ នៃការសាកល្បងព្យាបាល ដែលមានមនុស្សចូលរួម ៧,០០០ នាក់ កំពុងប្រព្រឹត្តទៅនៅប្រទេសរុស្ស៊ី អារ៉ាប់រួម ហ្គាណា និងប្រទេសមួយចំនួនទៀត ជាមួយនឹងលទ្ធផលបណ្តោះអាសន្ន ដែលត្រៀមបញ្ចេញក្នុងអំឡុងខែឧសភានេះ ។

គួរបញ្ជាក់ថា បច្ចុប្បន្នប្រទេសរុស្ស៊ី មានវ៉ាក់សាំងការពារជំងឺកូវីដ ១៩ ចំនួន ៣ ប្រភេទគឺ Sputnik V ត្រូវបានអភិវឌ្ឍដោយវិទ្យាស្ថាន Gamaleya ដែលមានមូលដ្ឋាននៅទីក្រុងម៉ូស្គូ វ៉ាក់សាំង EpiVacCorona បង្កើតដោយមជ្ឈមណ្ឌលស្រាវជ្រាវស៊ីបេរី និងវ៉ាក់សាំង CoviVac ដែលបង្កើតឡើងដោយវិទ្យាស្ថានស្រាវជ្រាវ Chumakov ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ រុស្ស៊ី ត្រៀមបញ្ជូនវ៉ាក់សាំង Sputnik V ទៅឥណ្ឌាដែលកំពុងរងគ្រោះខ្លាំងដោយកូវីដ ខណៈដូសដំបូងនឹងមកដល់នៅដើមខែក្រោយ

ចុចអាន ៖ វ៉ាក់សាំងកូវីដ Sputnik V របស់រុស្ស៊ី ត្រៀមទទួលបានភ្លើងខៀវប្រើប្រាស់ពី WHO នាខែក្រោយ