អាជ្ញាធរខេត្តបន្ទាយមានជ័យ​ប្រកាសរកឃើញករណីវិជ្ជមានកូវីដ-១៩​ថ្មីចំនួន២នាក់

រដ្ឋបាលខេត្តបន្ទាយមានជ័យ នៅថ្ងៃទី៧ ខែ​ឧសភា​ ឆ្នាំ២០២១នេះ បានចេញសេក្ដីប្រកាសស្ដីពីការ​រក​ឃើញ​ករណី​ឆ្លងថ្មីជំងឺកូវីដ-១៩ ចំនួន២នាក់បន្ថែម ដែលជាករណីឆ្លងក្នុងព្រឹត្តិការណ៍​សហគមន៍​២០​កុម្ភៈ លើបុរស​និងស្ត្រីជនជាតិខ្មែរ ដែលធ្វើដំណើរមកពីរាជធានីភ្នពេញ។

រដ្ឋបាលខេត្តបានបញ្ជាក់ថា ស្ត្រី​និងបុរសដែលមានវិជ្ជមានកូវី១៩ខាងលើនេះមានទី១ ឈ្មោះ ធី ប៊ុនឡេង ភេទប្រុស អាយុ២៦ឆ្នាំ។ ទី២ ឈ្មោះ សិម សាឡៃ ភេទស្រី អាយុ២៥ឆ្នាំ។ អ្នកទាំងមាន​អាសយដ្ឋាន នៅភូមិរោងម៉ាស៊ីន ឃុំអូរអំបិល ស្រុកសិរីសោភ័ណ។

ក្នុងសេក្ដីជូនដំណឹងបានបញ្ជាក់ថា កាលពីថ្ងៃទី៦ ខែ​ឧសភា​ ឆ្នាំ២០២១ បុរសស្ត្រីខាងលើនេះបាន​ធ្វើ​ដំណើរចេញពីកន្លែងស្នាក់នៅ ចំណុចផ្សារទឹកថ្លា សង្កាត់ទឹកថ្លា ខណ្ឌសែនសុខ រាជធានី​ភ្នំពេញ តាមរថយន្ដរបស់ក្រុមហ៊ុន សុភាព មកដល់ស្រុកក្រឡាញ់ ខេត្តសៀមរាប និងបន្តដំណើរ​តាម​ម៉ូតូ​មក​កាន់​ក្រុងសិរីសោភ័ណ។

នៅថ្ងៃទី៧ ខែឧសភា​ ឆ្នាំ២០២១ បុរសស្ត្រីខាងខាងលើត្រូវបានក្រុមគ្រូពេទ្យតេស្ដសំណាក​រហ័ស​(Rapid Test) ជាលិតផលមានវីជ្ជ​មាន​កូវីដ១៩។

រដ្ឋបាលខេត្តបន្ទាយមានជ័យ សូមអំពាវនាវប្រជាពលរដ្ឋដែលបានប្រាស្រ័យទាក់ទងដោយផ្ទាល់ ឬ​ប្រយោល ជាមួយអ្នកផ្ទុកមេរោគកូវីដ១៩ ទាំង២នាក់នេះ សូមរួសរាន់មកជួបក្រុមគ្រូពេទ្យ​ដើម្បីធ្វើ​តេស្ដសំណាក និងធ្វើចត្តាឡីស័ករយៈពេល១៤ថ្ងៃ ដើម្បីទប់ស្កាត់ការឆ្លងរីករាលដាល​ចូលក្នុង​សហគមន៍កាន់ធ្ងន់ធ្ងរ៕

អត្ថបទ ៖ សុខុម