ខេត្តព្រះសីហនុ អ្នក​ស្លាប់​កើន​ដល់ ៩នាក់ ជាជនជាតិខ្មែរទាំងអស់

លោក ឃាង ភារម្យ អ្នកនាំពាក្យសាលាខេត្តព្រះសីហនុបានមានប្រសាសន៍នៅរសៀលថ្ងៃទី៩ឧសភានេះថា គិតត្រឹមថ្ងៃទី៨ខែឧសភាឆ្នាំ២០២១នេះ ខេត្តព្រះសីហនុមានអ្នកឆ្លងជំងឺកូវីដ ១៩ ក្នុងព្រឹត្តិការណ៍សហគមន៍២០កម្ភៈចំនួន​២៣១០​នាក់ ស្រី១៣១៦នាក់ និងស្លាប់ចំនួន៩នាក់។

ក្នុងចំណោមអ្នកឆ្លងចំនួន២៣១០នាក់ ក្នុងនោះមានជនជាតិខ្មែរចំនួន២០២៨នាក់ ជនជាតិចិនចំនួន២៣៣នាក់ជនជាតិវៀតណាមចំនួន៣០នាក់ជនជាតិន័រវ៉េ១នាក់ជនជាតិ ភូមាចំនួន១៣នាក់ ជនជាតិថៃចំនួន២នាក់ ហ្វីលីពីន១នាក់ និងជនជាតិឥណ្ឌូណេស៊ីចំនួន២នាក់។

លោកបានបន្តទៀតថា មានអ្នកជាសះស្បើយចំនួន១០៣៥នាក់ស្រី៦៦៣នាក់ ក្នុងនោះជនជាតិខ្មែរចំនួន៨២៤នាក់ ចិន១៨៣នាក់ វៀតណាម១៣នាក់ ន័រវ៉េ១នាក់ភូមា១១នាក់ហ្វីលីពីន១នាក់ថៃ១នាក់ និងឥណ្ឌូនេស៊ី១នាក់។ ចំណែក​អ្នកកំពុងសម្រាកព្យាបាលនៅមន្ទីរពេទ្យវិញ មានចំនួន១២៦៦នាក់ស្រី៦៤៨នាក់ ក្នុងនោះខ្មែរចំនួន​១១៩៥នាក់ ចិន៥០នាក់ វៀតណាម១៧នាក់ ភូមា២នាក់ ថៃ១នាក់ ឥណ្ឌូនេស៊ី១នាក់ និងស្លាប់ចំនួន៩នាក់ ជាជនជាតិខ្មែរទាំងអស់។

លោក ឃាងភារម្យបានបន្តឲ្យដឹងថា តួលេខខាងលើនេះ ដោយរាប់បញ្ចូលចំនួនអ្នកឆ្លងថ្មីនៅថ្ងៃទី៨ឧសភាចំនួន១២៦នាក់ ស្រី៤២នាក់ និងមានអ្នកជាសះស្បើយចំនួន១៣០នាក់ផងដែរ។

គួរបញ្ជាក់ថា គិតត្រឹមថ្ងៃទី០៩ខែឧសភាឆ្នាំ២០២១នេះ កម្ពុជាមានអ្នកឆ្លងជំងឺកូវីថ‑១៩សរុបចំនួន១៩២៣៧នាក់ ក្នុងនោះមានអ្នកជាសះស្បើយចំនួន៧៦៤១នាក់ និងស្លាប់បាត់បង់ជីវិតចំនួន១២០នាក់៕

អត្ថបទ៖ សំអឿន