កូវីដផ្ទុះឡើងជាថ្មីនៅវៀតណាម ២៤ម៉ោងចុងក្រោយ រកឃើញការឆ្លងក្នុងសហគមន៍ជាង ១០០ករណី

ក្រសួងសុខាភិបាលវៀតណាម បានប្រកាសពីការឆ្លងជំងឺកូវីដ-១៩ក្នុងសហគមន៍ចំនួន១១៥ករណី នារយៈពេល២៤ម៉ោងចុងក្រោយ។

ក្រសួងសុខាភិបាលបាននិយាយនៅក្នុងរបាយការណ៍មួយថា ការឆ្លងជាសហគមន៍ចំនួន៣៣ករណី ត្រូវបានកត់ត្រានៅព្រឹកថ្ងៃព្រហស្បតិ៍នេះ ដោយក្នុងនោះមាន២២ករណីនៅទីក្រុង Da Nang។ ការឆ្លងក្នុងសហគមន៍ចំនួន ៨២ករណីទៀត ត្រូវបានកត់ត្រាកាលពីថ្ងៃពុធ។

ប្រទេសវៀតណាម បានបញ្ជាក់ពីការឆ្លងជំងឺកូវីដ-១៩ក្នុងសហគមន៍ចំនួន ៦៤៤ករណីនៅខេត្តនិងក្រុងចំនួន២៦ ចាប់តាំងពីរលកទី៤បានផ្ទុះឡើងកាលពីថ្ងៃទី២៧ខែមេសា។

ទីក្រុង ហាណូយ កំពុងនាំមុខគេដោយមាន ១៦៦ករណី បន្ទាប់មកគឺ Bac Ninh មាន១២៧ករណី, Da Nang ១០២ករណី, Bac Giang ៨៣ករណី និង Vinh Phuc ៧៥ករណី។

ចំណែកឯទីក្រុងហូជីមិញ បានកត់ត្រាការឆ្លងត្រឹមតែមួយករណីគត់ នៅក្នុងរលកនេះ។

គួរបញ្ជាក់ថា គិតត្រឹមព្រឹកថ្ងៃព្រហស្បតិ៍នេះ ប្រទេសវៀតណាម បានកត់ត្រាការឆ្លងកូវីដសរុប ៣,៦៥៨ករណី ជាសះស្បើយ២,៦៣៦នាក់និងស្លាប់ ៣៥នាក់៕

ប្រែសម្រួលដោយ៖ Vann Vann

ប្រភព៖ VN Explorer

ចុចអាន៖ កូវីដ – ១៩ វាយ លុក ពន្ធនាគារ ថៃ ២ កន្លែង ឆ្លង ជិត ៣ ពាន់ នាក់