ប្រជាពលរដ្ឋខណ្ឌច្បារអំពៅទទួលអំណោយសម្តេចតេជោគ្រប់គ្រាន់ទើបពុំមានអ្នកតវ៉ា

ភ្នំពេញ៖ ប្រជាពលរដ្ឋចំនួន៨សង្កាត់ក្នុងមូលដ្ឋានខណ្ឌច្បារអំពៅ រាជធានីភ្នំពេញក្នុងអំឡុងពេលបិទខ្ទប់រាជធានីភ្នំពេញ និងក្រុងតាខ្មៅកន្លងទៅបានទទួលអំណោយរបស់សម្តេចតេជោ តាមរយៈអាជ្ញាធរខណ្ឌច្បារអំពៅគ្រប់គ្រាន់ ទើបពុំប្រជាពលរដ្ឋណាម្នាក់បង្ហោះសារទាមទារអំណោយនោះឡើយ។

យោងតាមសេចក្តីរាយការណ៍ពីលោក សំ សុធារី ប្រធានការិយាល័យ ផែនការ និងអភិវឌ្ឍន៍សាលាខណ្ឌច្បារអំពៅបានឱ្យដឹងថា ក្នុងអំឡុងពេលដែលរាជរដ្ឋាភិបាលសម្រេចបិទខ្ទប់ ក្នុងមូលដ្ឋានរាជធានីភ្នំពេញ និងក្រុងតាខ្មៅគិតចាប់តាំងពីថ្ងៃទី១៥ ខែមេសា ឆ្នាំ២០២១ ដោយសារតែជំងឺកូវីដ-១៩ ឆ្លងរាលដាលដល់សហគមន៍មកនោះ គឺបងប្អូនប្រជាពលរដ្ឋរស់នៅក្នុងខណ្ឌច្បារអំពៅបានទទួលអំណោយដ៏ថ្លៃថ្លារបស់សម្តេចតេជោ ដល់ដៃដែលសុទ្ធសឹងជាប្រជាពលរដ្ឋមានការខ្វះខាតក្នុងជីវភាព ពិសេសប្រជាពលរដ្ឋរស់នៅក្នុងតំបន់បិទខ្ទប់ (តំបន់ក្រហម និងតំបន់លឿងទុំ) ដែលសរុបចំនួន១២៩០០គ្រួសារ។

ក្នុងនោះមួយគ្រួសារៗទទួលបានអង្ករ២៥គីឡូក្រាម មីជាតិ១កេស ត្រីខ១យួរ និងទឺកស៊ីអីវ១យួរ។ ហើយក៏មានអំណោយរបស់សប្បុរសជាច្រើនបានផ្តល់ដល់អាជ្ញាធរខណ្ឌច្បារអំពៅសម្រាប់យកទៅផ្តល់ជូនប្រជាពលរដ្ឋដោយពុំមានប្រជាពលរដ្ឋណាម្នាក់បង្ហោះសារទាមទារអំណោយឡើយ។

លោក សំ សុធារី បានបញ្ជាក់យ៉ាងច្បាស់ថា មកដល់ថ្ងៃទី១៤ ខែឧសភានេះ អំណោយរបស់សម្តេចតេជោ រួមជាមួយអំណោយរបស់សប្បុរសជនគឺនៅពេញឃ្លាំងដែលអាជ្ញាធរត្រៀមចែកបន្ថែមទៀតចំពោះអ្នកខ្វះខាតជីវភាពដែលធ្លាប់ទទួលបានមួយលើកមកហើយ ឱ្យទទួលបានជាលើកទី២ ធ្វើយ៉ាងណាមិនឱ្យប្រជាពលរដ្ឋមានការខ្វះខាត៕

អត្ថបទ៖ នរា