កូវីដ-១៩

វ៉ាក់សាំងស៊ីណូវ៉ាក់ចំនួន៥០ម៉ឺនដូសបន្ថែមទៀតនឹងដឹកមកដល់កម្ពុជានៅព្រឹកស្អែកនេះ

បានផុស

៣ years មុន

នៅ

ថ្ងៃសៅរ៍ ១៥ ឧសភា ២០២១

ដោយ

លោកស្រី យក់ សម្បត្តិ រដ្ឋលេខាធិការក្រសួងសុខាភិបាល និងជាប្រធានក្រុមការងារប្រតិបត្តិការបច្ចេកទេស និងផ្គត់ផ្គង់នៃគណៈកម្មការអន្តរក្រសួង ដើម្បីប្រយុទ្ធនឹងជំងឺកូវីដ-១៩ បានឲ្យដឹងថាវ៉ាក់សាំងកូវីដ-១៩ ប្រភេទស៊ីណូវ៉ាក់ចំនួន៥០ម៉ឺនដូសទៀតដែលរាជរដ្ឋាភិបាលកម្ពុជាបានបញ្ជាទិញពីរដ្ឋាភិបាលចិន នឹងដឹកមកដល់កម្ពុជានៅថ្ងៃទី១៦ ខែឧសភា ឆ្នាំ២០២១ វេលាម៉ោង១០ និង១៥នាទីព្រឹកស្អែកនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កម្ពុជាទទួលបានវ៉ាក់សាំងការពារជំងឺកូវីដ១៩ ដែលជាការបញ្ជាទិញ និងជំនួយសរុបជាង ៤ លានដូស (៤ ៥២៤ ០០០)។ វ៉ាក់សាំងទាំងនោះ រួមមានវ៉ាក់សាំងស៊ីណូហ្វាម (Sinonpharm) ដែលជាជំនួយរបស់រដ្ឋាភិបាលចិនចំនួន ១.៧ លានដូស វ៉ាក់សាំងស៊ីណូវ៉ាក់ (Sinovac) ដែលជាការបញ្ជាទិញពីប្រទេសចិនចំនួន ២.៥ លានដូស និងវ៉ាក់សាំងអាស្ត្រាហ្សេនីកា (AstraZeneca ) ៣២៤,០០០ដូស ជាជំនួយរបស់ខូវ៉ាក់ តាមរយៈអង្គការសុខភាពពិភពលោក(WHO)។

លោកស្រី យក់ សម្បត្តិ បញ្ជាក់ថាវ៉ាក់សាំង១លានដូសបន្ថែមទៀតនឹងមកដល់កម្ពុជានៅថ្ងៃទី២៣ ខែឧសភា ខណៈដែល ប្រភេទវ៉ាក់សាំងស៊ីណូវ៉ាក់ នឹងមាន ចំនួនដល់ ៨ លានដូស បន្ទាប់ពីរាជរដ្ឋាភិបាលគ្រោងបញ្ជាទិញបន្ថែម៥លានដូស។

លោកស្រី យក់ សម្បត្តិ បានបន្តទៀតថាក្រៅពីនេះកម្ពុជាគ្រោងបញ្ជាទិញវ៉ាក់សាំងស៊ីណូហ្វាមចំនួន៤លានដូសបន្ថែមទៀតដែរខណៈរហូតមកដល់បច្ចុប្បន្ននេះភាគីមិត្តចិនបានផ្តល់ជំនួយឱ្យកម្ពុជាបានចំនួន១លាន៧សែនដូសរួចហើយ។

លោកស្រី បានបញ្ជាក់ថាការបញ្ជាទិញបន្ថែមនេះបូកជាមួយនឹងជំនួយកូវ៉ាក់របស់អង្គការសុខភាពពិភពលោកទៀតនឹងធ្វើឱ្យកម្ពុជាមានវ៉ាក់សាំងរហូតដល់ទី២៦លានដូស សម្រាប់ចាក់ជូនពលរដ្ឋប្រមាណ១៣លាននាក់នៅទូទាំងប្រទេស។

ចាប់ពីថ្ងៃទី១០ខែកម្ភៈ រហូតមកដល់យប់ថ្ងៃទី១៤ ខែឧសភា ឆ្នាំ២០២១ ក្រសួងសុខាភិបាល និងក្រសួងការពារជាតិ បានចាក់វ៉ាក់សាំងការពារកូវីដ១៩ជូនមន្រ្តីរាជការ ប្រជាពលរដ្ឋ និងកងកម្លាំងប្រដាប់អាវុធ នៅទូទាំងប្រទេសជាង២លាននាក់(២,០៤០,២៥៥)៕ អត្ថបទ៖សំអឿន

Related Topics:

Up Next

រកឃើញអ្នកឆ្លងថ្មី៣៣៥ នាក់ និងជាសះស្បើយជាង ៨ រយនាក់

Don't Miss

ខេត្តកំពង់ស្ពឺ៖ អ្នកឆ្លងកូវីដ‑១៩កើនឡើងដល់ជិត២០០នាក់ អ្នកស្លាប់៧នាក់