វ៉េណេស៊ុយអេឡា ជាប្រទេសអាមេរិកឡាទីនដំបូងគេ អនុម័តប្រើប្រាស់វ៉ាក់សាំងចាក់តែមួយដូស Sputnik Light របស់រុស្ស៊ី

មូលនិធិវិនិយោគផ្ទាល់រុស្ស៊ី (RDIF) បាននិយាយថា ប្រទេសវ៉េណេស៊ុយអេឡា កាលពីថ្ងៃសៅរ៍បានអនុម័តប្រើប្រាស់វ៉ាក់សាំងការពារជំងឺកូវីដ ១៩ ចាក់តែមួយដូស Sputnik Light របស់រុស្ស៊ី ។

ការអនុម័តនេះធ្វើឡើងរយៈពេល ៤ ខែ បន្ទាប់ពីប្រទេសអាមេរិកខាងត្បូងមួយនេះបានអនុម័តវ៉ាក់សាំង Sputnik V សម្រាប់ការប្រើប្រាស់ជាបន្ទាន់ ។

យោងទៅតាម RDFI បានឲ្យដឹងថា វ៉ាក់សាំង Sputnik Light គឺជា​ប្រភេទ​វ៉ាក់សាំង Sputnik V ដែលមាន​កម្រិត​ស្រាល​ជាង​មុនដែលមាន​សមាសធាតុ​ផ្សំ​តែមួយ (rAd26) ​ហើយ​តម្រូវឲ្យមាន​ការចាក់​វ៉ាក់សាំង​តែមួយ​ដូ​សប៉ុណ្ណោះ ។

ទន្ទឹមនោះវ៉ាក់សាំង Sputnik Light បានបង្ហាញពីប្រសិទ្ធភាព ៧៩.៤ ភាគរយ យោងតាមទិន្នន័យដែលបានវិភាគរយៈពេល ២៨ ថ្ងៃ បន្ទាប់ពីការចាក់ ។

លោក Kirill Dmitriev នាយកប្រតិបត្តិ RDIF បាននិយាយថា “វ៉ាក់សាំង Sputnik Light នឹងជួយពន្លឿនយុទ្ធនាការចាក់វ៉ាក់សាំង និងអនុញ្ញាតឲ្យមនុស្សកាន់តែមានអារម្មណ៍សុវត្ថិភាពប្រឆាំងនឹងជំងឺរាតត្បាត” ។

គួររំឭកថា ក្រសួងសុខាភិបាលនៃប្រទេសរុស្ស៊ីបានអនុញ្ញាតឲ្យប្រើប្រាស់វ៉ាក់សាំងចាក់តែមួយដូស Sputnik Light កាលពីថ្ងៃទី ៦ ខែឧសភា ៕

ប្រែសម្រួលដោយ ៖ ជីវ័ន្ត

ប្រភព ៖ CGTN

ចុចអាន ៖ មិនធម្មតា! រុស្ស៊ី ក៏មានវ៉ាក់សាំង ចាក់តែមួយដូស ហើយកំពុងប្រើប្រាស់នៅក្នុងប្រទេសជាមួយប្រសិទ្ធភាពការពារកូវីដ ជិត ៨០ ភាគរយ