វណ្ណា ស័ក្តិ ប្រាប់ស្ថានភាពសុខភាពលោកយាយ ណយ សំណាង

ភ្នំពេញ៖ ដើម្បីឱ្យមហាជនបានដឹង និងឆ្លើយតបចំពោះការព្រួយបារម្ភខណៈមានអ្នកគាំទ្រជាច្រើនចង់ដឹងពីស្ថានភាពជំងឺលោកយាយ ណយ សំណាង តារាចម្រៀង វណ្ណា ស័ក្ដិ បានបញ្ជាក់ថា បន្ទាប់ពីបានមកសម្រាកព្យាបាកនៅមន្ទីរពេទ្យរុស្ស៊ីប៉ុន្មានថ្ងៃមកនេះ ម្តាយរបស់លោកគឺលោកយាយ ណយ សំណាង មានសុខភាពបានធូរស្រាលជាងមុនខ្លះហើយ។

ស្ថិតនៅចំពោះមុខ លោកយាយ ណយ សំណាង ដែលកំពុងសម្រាកព្យាបាលលើគ្រែ លោក វណ្ណា ស័ក្តិ និយាយទៀតថា៖ “អ្នកម៉ែលោកអត់អីទេ គាត់នឹងជាឆាប់ៗដោយសារតែបានបងប្អូនជូនពរគាត់ ហើយគាត់បានធូរខ្លះហើយ”។

លោក  វណ្ណា ស័ក្ត ក៏បានបញ្ជាក់បន្ថែមពីស្ថានភាពសុខភាពលោកយាយ ណយ សំណាង ថា៖ “ម៉ាក់គាត់បានរាងធូរជាងមុនបន្តិចហើយដោយសារតែគាត់បាត់ស្លេស ហើយគាត់ហូបអីបានបន្តិចបន្តូច តែអត់បានច្រើនទេ គាត់បានហូបទឹកតិចៗ”។

គួរបញ្ជាក់ថា លោកយាយ ណយ សំណាង ដែលជាតារាកំប្លែង និងចម្រៀងអាយ៉ៃជើងចាស់ព្រមទាំងកូនប្រុសគឺតារាចម្រៀង វណ្ណា ស័ក្តិ ត្រូវបានបញ្ជូនទៅព្យាបាលនៅអាគារដឹព្រេមៀ សែន សុខ កាលពីរសៀលថ្ងៃទី១៤ ខែឧសភា ឆ្នាំ២០២១ បន្ទាប់ពីតេស្ដរកឃើញឆ្លងជំងឺកូវីដ-១៩។

ប៉ុន្តែដោយសារពេលទៅដល់កន្លែងសម្រាកព្យាបាល ស្ថានភាពសុខភាពជំងឺរបស់លោកយាយ ណយ សំណាង បានធ្វើទុក្ខខ្លាំងនោះ ក៏ត្រូវបញ្ជូនបន្តមកសម្រាកព្យាបាលនៅមន្ទីពេទ្យរុស្ស៊ីវិញជាមួយនឹងតារាតារាចម្រៀង វណ្ណា ស័ក្ដិ៕

អត្ថបទ៖ ចាន់រ៉ា