ថៃ ចាប់ផ្តើមចាក់វ៉ាក់សាំងកូវីដដល់ព្រះសង្ឃ ស្រួលបិណ្ឌបាត

ព្រះសង្ឃប្រហែល៥០០អង្គ បានទទួលការចាក់វ៉ាក់សាំងការពារជំងឺកូវីដ-១៩ នៅក្នុងទីក្រុងបាងកក កាលពីថ្ងៃអង្គា​រនិងថ្ងៃពុធ ដើម្បីឲ្យព្រះសង្ឃងាយស្រួលក្នុងការនិមន្តបិណ្ឌបាត និងធ្វើពិធីសាសនានានា។

លោក Montchai Chumnumnavin អនុប្រធានមន្ទីរពេទ្យ Priest បាននិយាយថា “សកម្មភាពទាំងនេះ កំពុងធ្វើឲ្យព្រះសង្ឃប្រឈមនឹងគ្រោះថ្នាក់ ព្រោះព្រះសង្ឃអាចទាក់ទងជាមួយអ្នកមានជំងឺកូវីដ។ ដូច្នេះ យើងបានពន្លឿនការចាក់វ៉ាក់សាំងដល់ព្រះសង្ឃ ដើម្បីបង្កើតភាពស៊ាំការពារព្រះសង្ឃពីការឆ្លងរោគ ពីអ្នកគោរពប្រណិប័តន៍”។

បន្ទាប់ពីទប់ស្កាត់បាននូវការផ្ទុះឡើងលើកមុនប្រកបដោយជោគជ័យ បច្ចុប្បន្ននេះ ប្រទេសថៃកំពុងដោះស្រាយជាមួយនឹងរលកកូវីដដ៏លំបាក ខណៈករណីឆ្លងបានកើនឡើងមួយគុណនិងបួន គិតចាប់តាំងពីដើមខែមេសាមក ហើយការស្លាប់បានកើនឡើងមួយគុណនិងប្រាំមួយ។

ប្រទេសនេះ មិនទាន់ចាប់ផ្តើមយុទ្ធនាការចាក់វ៉ាក់សាំងទ្រង់ទ្រាយធំនៅឡើយទេ ដោយគិតត្រឹមពេលនេះ មានប្រជាជនប្រមាណតែ១.៥លាននាក់ប៉ុណ្ណោះ ដែលបានទទួលការចាក់ថ្នាំបង្ការ ដោយភាគច្រើនគឺជាបុគ្គលិកសុខភាពជួរមុខឬក្រុមងាយរងគ្រោះ។

នៅថ្ងៃព្រហស្បតិ៍នេះ ក្រសួងសុខាភិបាលថៃ បានរាយការណ៍អំពីអ្នកស្លាប់ដោយសារជំងឺកូវីដ-១៩ ចំនួន២៥នាក់ទៀត ដោយធ្វើឲ្យចំនួនសរុបកើនដល់៧០៣នាក់។ 

ថៃ ក៏បានប្រកាសពីការរកឃើញអ្នកឆ្លងថ្មីចំនួន២,៦៣៦ករណីផងដែរ ដោយនាំឲ្យករណីសរុបកើនដល់១១៩,៥៨៥ករណី៕

ប្រែសម្រួល៖ Vann Vann

ប្រភព៖ Bangkok Post

ចុចអាន៖ ថ្ងៃនេះ ថៃ រកឃើញអ្នកឆ្លងកូវីដ ២,៦៣៦ករណី និងស្លាប់២៥នាក់ទៀត