ជប៉ុន ត្រៀមប្រើប្រាស់វ៉ាក់សាំង AstraZeneca ហើយនឹងចេញថ្លៃព្យាបាល បើមានករណីដុំកំណកឈាមលើអ្នកចាក់

រដ្ឋមន្រ្តីក្រសួងសុខាភិបាលជប៉ុន ទំនងជានឹងអនុញ្ញាតឲ្យចាក់វ៉ាក់សាំង AstraZeneca នៅថ្ងៃសុក្រនេះ ក្រោយវ៉ាក់សាំង Moderna ត្រូវបានអនុម័តដោយក្រុមជំនាញ របស់ក្រសួងកាលពីថ្ងៃព្រហស្បតិ៍ ។

ប៉ុន្តែប្រភពបាននិយាយថា បច្ចុប្បន្នក្រសួងមិនមានផែនការបន្ថែម ការចាក់វ៉ាក់សាំង AstraZeneca ទៅក្នុងបញ្ជីវ៉ាក់សាំងរបស់ប្រទេសនោះទេ បើទោះជាមានការអនុញ្ញាតឲ្យចាក់ក៏ដោយ ។

ទន្ទឹមនោះ រដ្ឋាភិបាលនឹងផ្តល់មូលនិធិយ៉ាងពេញលេញ ដល់ការប្រើប្រាស់វ៉ាក់សាំង ដែលត្រូវបានអនុម័តនេះ ហើយក៏នឹងចំណាយប្រាក់ សម្រាប់ការព្យាបាលបញ្ហាសុខភាពណាមួយ ដែលបង្កឡើងដោយវ៉ាក់សាំងនេះ ។

ការផ្ដល់ការចំណាយលើការព្យាបាលនេះ កើតឡើងក្រោយ ទីភ្នាក់ងារឱសថអឺរ៉ុប បាននិយាយកាលពីខែមុនថា “ករណីដុំកំណកឈាមមិនធម្មតា ដែលមានប្លាកែតឈាមទាប គួរតែត្រូវបានចុះបញ្ជីជាផលប៉ះពាល់ដ៏កម្របំផុត នៃវ៉ាក់សាំងនេះ” ។

បន្ថែមពីនេះ ក្រសួងគ្រោងនឹងបង្កើតគោលការណ៍ណែនាំ សម្រាប់ព្យាបាលករណីដុំកំណកឈាមបែបនេះ ខណៈក្រសួងក៏នឹងវិភាគទិន្នន័យនៅបរទេស ដើម្បីកំណត់កម្រិតអាយុដែលបានណែនាំសម្រាប់ការវ៉ាក់សាំងនេះ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ វ៉ាក់សាំង AstraZeneca ចំនួន ២ ដូសមានប្រសិទ្ធភាព ៨៥ ទៅ ៩០ ភាគរយប្រឆាំងរោគសញ្ញាឆ្លងកូវីដ

ចុចអាន ៖ វ៉ាក់សាំង AstraZeneca អាចទប់ទល់នឹងវីរុសបំប្លែងខ្លួនឥណ្ឌាបាន ទោះឆ្លង ក៏មិនឈឺធ្ងន់ដែរ