សមត្ថកិច្ចកំពុងស្រាវជ្រាវមុខសញ្ញា ចាប់ខ្លួនអ្នកប្រឌិតព័ត៌​មានក្លែងក្លាយ​ថា​យកសពអ្នកកើតកូវីដទៅប្លុងចោល

សមត្ថកិច្ចកំពុងស្រាវជ្រាវរកមុខសញ្ញា ឈានទៅចាប់ខ្លួន អ្នកបង្កើតព័ត៌មានក្លែងក្លាយ ដែលបាន​ចែក​ចាយរូបភាពតៗគ្នា ហើយចោទប្រកាន់ថាប្រជាពលរដ្ឋដែលបានស្លាប់ដោយសារកូវីដ១៩ ត្រូវ​បានក្រសួងសុខាភិបាល​យកសាកសពទៅប្លុងចោលនៅភ្នំប្រាសាទ ស្ថិតនៅស្រុក កំពង់ត្រាច ខេត្ត​កំពត។

លោក ម៉ៅ ចន្ទមធុរិទ្ធិ ស្នងការខេត្តកំពត បានប្រាប់កម្ពុជាថ្មីថា សមត្ថកិច្ចរង់ចាំវិធានការ​ពីមន្ទីរ​សុខាភិ​បាល ខណៈសមត្ថកិច្ចកំពុងស្រាវជ្រាវពីតម្រុយអ្នកថតរូបភាព ហើយបង្ហោះខ្លឹម​សារក្លែង​ក្លាយ។

លោក គឹម សន្តិភាព រដ្ឋលេខាធិការ និងជាអ្នកនាំក្រសួងយុត្តិធម៌បានថ្លែងឱ្យដឹងថា បច្ចុប្បន្ន​អាជ្ញា​ធរ​សមត្ថកិច្ច កំពុងស្រាវជ្រាវរកមុខសញ្ញា អ្នកបង្កើតព័ត៌មានក្លែងក្លាយករណីប្រឌិត​ថាគ្រូពេទ្យ​បាន​យកសាកសពអ្នកជំងឺកូវីដ១៩ ទៅចោល​ក្នុងព្រៃ។

លោកថា សមត្ថកិច្ចនឹងឈានទៅធ្វើការចាប់ខ្លួន មុខសញ្ញាទាំងអស់នេះ យកមក​ផ្ដន្ទា​ទោស​តាមច្បាប់ ខណៈដែលលោកអះអាងថា ករណីនេះជាករណីធ្ងន់ធ្ងរ។

លោកបង្ហើបថា អាជ្ញាធរសមត្ថកិច្ច មានសាក្សីមួយចំនួនហើយ ដែលបានផ្ដល់ព័ត៌មាន ពីប្រភពនៃ​អ្នកប្រឌិតព័ត៌មាន និងប្រភពនៃរូបថត ដែលបានថតយកមកផ្សព្វផ្សាយធ្វើឱ្យមានការភ័ន្តច្រឡំ​គឺ​សមត្ថកិច្ចមានព័ត៌មានមួយចំនួននៅក្នុងដៃ។

កាលពីថ្ងៃទី ៨ ខែមិថុនា មានការចែកចាយរូបភាព​មួយចំនួនអំពីពលរដ្ឋស្លាប់ដោយសារជំងឺកូវីដ១៩ ហើយចោទថា ក្រសួងសុខាភិបាល បានយកសាកសពទៅប្លុងចោលនៅភ្នំប្រាសាទ យ៉ាងអានា​ធិបតេយ្យ ស្ថិតនៅស្រុកកំពង់ត្រាច ខេត្តកំពត។

រដ្ឋបាលខេត្តកំពតបានអះអាងថា ពាក់ព័ន្ធនឹងការស្លាប់របស់អ្នកជំងឺកូវីដ១៩ ចំនួន ២ នាក់ ក្នុង​ខេត្តកំពត អាជ្ញាធរស្រុកកំពង់ត្រាច បានចាត់ចែងរៀបចំមេន សម្រាប់បូជាសពបានត្រឹមត្រូវ តាម​ព្រះពុទ្ធសាសនា និងវិធានការសុខាភិបាល នៅកន្លែងឆ្ងាយពីប្រជាពលរដ្ឋ ដោយមិនបានទុក​សព​ប្លុងចោល ដូចសារព័ត៌មានមួយចំនួនចុះផ្សាយខុសពីការពិតឡើយ៕