កម្លាំងអាវុធហត្ថចុះនាំខ្លួនជនជាតិស្បែកខ្មៅម្នាក់ ក្រោយរត់ចេញពីកន្លែងព្យាបាល​កូវីដ-១៩

បុរសជនជាតិស្បែកខ្មៅម្នាក់ត្រូវបានកម្លាំងកងរាជអាវុធហត្ថខណ្ឌបឹងកេងកង សហការជាមួយអាវុធហត្ថខណ្ឌចំការមន និងអាវុធហត្ថខណ្ឌ៧មករា ធ្វើការបង្ខំខ្លួនឡើងរថយន្តឲ្យចូលកន្លែងព្យាបាលកូវីដ១៩ វិញ ក្រោយពេលគេចវេសមិនព្រមព្យាបាលជំងឺកូវីដ១៩ នាល្ងាចម្សិលមិញរួចមក។

មន្ត្រីអាវុធហត្ថរាជធានីបានឲ្យដឹងថា ក្រោយទទួលសេចក្តីរាយការណ៍ពីក្រុមគ្រូពេទ្យថា បុរសជនជាតិស្បែកខ្មៅម្នាក់ខាងលើបានរត់ចេញពីមណ្ឌលសម្រាកព្យាបាលជំងឺកូវីដ-១៩ នៃមន្ទីរពេទ្យព្យាបាលរោគរបេង ស្ថិតនៅក្នុង សង្កាត់បឹងកេងកង ខណ្ឌបឹងកេងកងរួចមកកម្លាំងអាវុធហត្ថខណ្ឌបឹងកេងកង សហការជាមួយអាវុធហត្ថខណ្ឌចំការមន និងអាវុធហត្ថខណ្ឌ៧មករា បំពាក់ដោយអាវការពារជំងឺកូវីដ-១៩ និងសម្ភារៈគ្រឿងបំពាក់សម្រាប់អន្តរាគមន៍ ធ្វើការឃាត់ខ្លួន និងបង្ខំឲ្យបុរសជនជាតិស្បែកខ្មៅម្នាក់ឡើងរថយន្ត ទៅកាន់ទីតាំងសម្រាកព្យាបាលជំងឺកូវីដ-១៩ វិញ បន្ទាប់ពីបុរសស្បែកខ្មៅរូបនេះ បានរត់ចេញពីមណ្ឌលសម្រាកព្យាបាលជំងឺកូវីដ-១៩ នៃមន្ទីរពេទ្យព្យាបាលរោគរបេង ស្ថិតនៅក្នុង សង្កាត់​បឹងកេងកង ខណ្ឌបឹងកេងកង។

មន្ត្រីអាវុធហត្ថរាជធានីបានបន្តថា ករណីរត់គេចនេះ បុរសជនជាតិស្បែកខ្មៅខាងលើនឹងប្រឈមចំពោះមុខច្បាប់ស្តីពីវិធានការទប់ស្កាត់ការឆ្លងរាលដាលនៃជំងឺកូវីដ១៩តែម្ដង ដែលជាហេតុនាំឲ្យចម្លងដល់អ្នកដទៃដោយច្ចេតនា ៕

អត្ថបទ ៖ វិមាន