កូវីដ-១៩
រដ្ឋបាលរាជធានីភ្នំពេញ គ្រោងអនុញ្ញាតឱ្យក្រុមគ្រួសារបញ្ចុះសពអ្នកជំងឺកូវីដ-១៩ ប្រសិនមានការស្នើសុំនិងអនុវត្តតាមវិធានសុខាភិបាល
លោក ម៉េត មាសភក្តី អ្នកនាំពាក្យរដ្ឋបាលរាជធានីភ្នំពេញ បានបញ្ជាក់ថា រដ្ឋបាលរាជធានីភ្នំពេញ គ្រោងនឹងអនុញ្ញាតអោយក្រុមគ្រួសារសាច់ញាតិ បងប្អូនរបស់សពអ្នកជំងឺកូវីដ-១៩ អាចយកសពទៅបញ្ចុះបាន ប្រសិនបើមានការស្នើសុំ និងមានការគោរពតាមបច្ចេកទេសសុខាភិបាលត្រឹមត្រូវ។
លោក ម៉េត មាសភក្តី បានបន្តថា រដ្ឋបាលរាជធានីភ្នំពេញ គ្រោងបើកកិច្ចប្រជុំពិភាក្សាលំអិតលើការងារនេះបន្ថែមទៀត ដើម្បីឱ្យការអនុវត្តមានសុវត្ថិភាព បញ្ចៀសហានិភ័យ មិនឱ្យមានការឆ្លងរាលដាលជំងឺកូវីដ-១៩។
សូមរំឭកថា ដោយសារទីតាំងបូជាសពអ្នកជំងឺកូវីដ១៩ ដែលរៀបចំនៅក្នុងខេត្តកំពង់ស្ពឺ មិនទាន់មានការសាងសង់ហេដ្ឋារចនាសម្ព័ន្ធរួចរាល់ ចំពោះមុខបច្ចុប្បន្ននេះ រដ្ឋបាលរាជធានីភ្នំពេញ បានសាងសង់ជួសជុលម៉ាស៊ីនបូជាសពដោយចរន្តអគ្គីសនីសម្រាប់បូជាសពអ្នកជំងឺកូវីដ១៩ នៅវត្តចំនួន៣ ហើយក្នុងសប្តាហ៍នេះម៉ាស៊ីនបូជាសពដោយចរន្តអគ្គីសនី២គ្រឿងបន្ថែមទៀតនឹងដឹកមកដល់រាជធានីភ្នំពេញផងដែរ។
កាលពីថ្ងៃទី១១ ខែកក្កដា លោក ម៉ម ប៊ុនហេង រដ្ឋមន្ត្រីក្រសួងសុខាភិបាល បានណែនាំដល់អភិបាលរាជធានី-ខេត្ត ឱ្យយកចិត្តទុកដាក់បន្ថែមអំពីសុវត្ថិភាព ក្នុងការគ្រប់គ្រង និងការចាត់ចែងសាកសព ដែលមានផ្ទុកមេរោគកូវីដ១៩។
ក្នុងនោះឯកឧត្តមរដ្ឋមន្ត្រី បានណែនាំ ដោយពុំអនុញ្ញាតឱ្យធ្វើកោសល្យវិច័យ ឬវះកាត់ពិនិត្យគ្រប់សាកសពអ្នកជំងឺកូវីដ-១៩ឡើយ។
សាកសពត្រូវបានរៀបចំដោយរុំក្រណាត់រួចដាក់ក្នុងថង់ប្លាស្ទិកបិទជិតយ៉ាងត្រឹមត្រូវដោយបុគ្គលិកក្នុងមន្ទីរពេទ្យ ហើយសាកសពខ្លះត្រូវបានដាក់បង្កករក្សាទុកមុនពេលដាក់ទៅក្នុងមឈូសមុនយកទៅបូជាឬបញ្ចុះ។
ដើម្បីសុវត្ថិភាព ឯកឧត្តមក្រសួងសុខាភិបាល ក៏បានណែនាំ អោយអ្នករៀបចំ និងអ្នកដឹកជញ្ជូនសាកសព អ្នកលើកសាកសពដាក់ចូលក្នុងមឈូស និងដាក់លើទីតាំងបូជា ឬអ្នកសែងមឈូសយកទៅបញ្ចុះត្រូវពាក់សម្ភារៈការពារខ្លួន (PPE) ឱ្យបានត្រឹមត្រូវ ។
ដោយឡែក ចំពោះសមាជិកគ្រួសារ ឬអ្នកចូលរួម ត្រូវពាក់ម៉ាស់ការពារឱ្យបានត្រឹមត្រូវ និងត្រូវកំណត់ចំនួនមិនឱ្យលើសពី ១០នាក់ ព្រមទាំងត្រូវរក្សាគម្លាតរវាងអ្នកចូលរួម ចំងាយ ១.៥ម៉ែត្រ ពីគ្នា និងចំងាយ ៣ម៉ែត្រ ពីសាកសព។ លើសពីនេះ មិនអនុញ្ញាតឱ្យមានការហែក្បួនឡើយ។ អត្ថបទ៖ ពុធិកា
-
កីឡា៦ ថ្ងៃ ago
ឈ្នះខ្សែក្រវាត់ថ្ងៃជាមួយ ឈឿង ល្វៃ កីឡាករ Erdene ក៏មានរថយន្តទទួល
-
ព័ត៌មានជាតិ៥ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
ព័ត៌មានអន្ដរជាតិ១៩ ម៉ោង ago
Breaking News! បណ្ដាញសង្គម Facebook មានបញ្ហានៅទូទាំងពិភពលោកជាថ្មី
-
សន្តិសុខសង្គម១ សប្តាហ៍ ago
ដកហូតមុខតំណែង មេបញ្ជាការរងស្រុកស្វាយជ្រុំ៣នាក់ ពាក់ព័ន្ធករណីទារប្រាក់ពីអ្នកប្រើប្រាស់គ្រឿងញៀនជាង១ពាន់ដុល្លារ
-
ព័ត៌មានជាតិ៦ ថ្ងៃ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ព័ត៌មានអន្ដរជាតិ៥ ថ្ងៃ ago
អ្នកវិទ្យាសាស្ត្រស្កុតឡែនរកឃើញហ្វូស៊ីលចម្លែករូបរាងដូចសត្វនាគចិនអាយុកាល ២៤០ លានឆ្នាំ
-
ជីវិតកម្សាន្ដ៦ ថ្ងៃ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ
-
ព័ត៌មានអន្ដរជាតិ១ សប្តាហ៍ ago
នាវាចម្បាំងថៃ ច្រឡំដៃបាញ់កាំភ្លើងធំ ចំនាវាគ្នាឯង