ព្រះសង្ឃគង់នៅ ៣ វត្តជិត១០០​អង្គក្នុងខេត្តតាកែវ ឆ្លងកូវីដ១៩

យ៉ាងហោចណាស់ ព្រះសង្ឃប្រមាណជិត ១០០ អង្គ គង់នៅវត្តចំនួន ៣ ក្នុងខេត្តតាកែវ រកឃើញ​វិជ្ជ​មានជំងឺកូវីដ១៩។

ប្រធានមន្ទីរសុខាភិបាលខេត្តតាកែវ លោក នុត ស៊ីណាត បានប្រាប់កម្ពុជាថ្មី នៅថ្ងៃសុក្រនេះថា គិតត្រឹមថ្ងៃនេះ មានព្រះសង្ឃចំនួន ៣ វត្តរកឃើញវិជ្ជមានជំងឺកូវីដ១៩ បន្ទាប់ពីការធ្វើតេស្តយក​សំណាក​រាប់រយអង្គក្នុងវត្តចំនួន ៣ ក្នុងនោះមានវត្តសីហរតន​រាម​ក្នុង​ក្រុង​ដូន​កែវរកឃើញចំនួន ៤៩ អង្គ វត្តអង្គប្រិយ៍ស្ថិតនៅឃុំលំចង់ ស្រុកសំរោងចំនួន ១៤ អង្គ និងវត្តប្រាសាទនាងខ្មៅ ជិត ៣០ អង្គ។

បើតាមលោក នុត ស៊ីណាត ដើមឡើយ ព្រះសង្ឃគង់នៅវត្តសីហ មានអាពាធ ហើយទៅពេទ្យ ទើបស្រាវជ្រាវទៅដឹងថា មានករណីវិជ្ជមាននៅលើព្រះសង្ឃគង់ក្នុងវត្ត។

ក្រោយពីការឆ្លង ទីតាំងវត្តត្រូវបាន​បិទ​ខ្ទប់ ខណៈព្រះសង្ឃ​ដែល​មាន​វិជ្ជមាន​ និងអ្នកជាប់ពាក់ព័ន្ធ ត្រូវបានគ្រូពេទ្យដាក់ឱ្យព្យាបាល និងធ្វើចត្តាឡីស័កក្នុងវត្ត ដោយដាក់គ្រូពេទ្យប្រចាំការព្យាបាល៕