ជីវិតកម្សាន្ដ

នាយ កុយ ភ្ញាក់ផ្អើលពេលជួបលោកតាវ័យជាង៨០ឆ្នាំពីរនាក់អាចនៅបញ្ជាស៊ីក្លូបាន

Published

2 weeks ago

February 11, 2021

តារាកំប្លែងជើងចាស់មានប្រជាប្រិយភាពនាយ កុយ បានបង្ហាញអារម្មណ៍រំភើបនិងសប្បាយចិត្តខ្លាំងដែលបានជួបហើយធ្វើបុណ្យជាមួយលោកតាវ័យជរា២រូបដោយចៃដន្យ។

ក្រៅតែបង្ហាញអារម្មណ៍រំភើបតារាកំប្លែងល្បីឈ្មោះនាយ កុយ ក៏បានបំផុសស្មារតីដល់មហាជននិងយុវវ័យឲ្យនាំគ្នាធ្វើបុណ្យចែករំលែកក្តីស្រលាញ់ ឬដាក់ទានដល់ជនចាស់ជរាព្រមទាំងអ្នកដែលមានជីវភាពខ្សត់ខ្សោយជាងខ្លួនផងដែរ។

នាយ កុយ បានរៀបរាប់ភ្ជាប់ជាមួយរូបភាព២សន្លឹកដោយបង្ហាញស្នាមញញឹមថា អត់ពីលោក ឪពុកអ្នកម្ដាយទៅមានតែធ្វើបុណ្យជាមួយចាស់ៗទៅ ក្រែងជាតិក្រោយយើងមានសំណាងដូចជាតិនេះទៀត អំពើល្អវាមិនសាបសូន្យទេកូនក្មួយអរគុណសន្តិភាព។

នាយ កុយ បានបញ្ជាក់ថា ពេលមកទិញឥវ៉ាន់នៅផ្សារធំថ្មីខ្ញុំក៏ជួបអ៊ុំម្នាក់គាត់ជាកម្មករធាក់ស៊ីក្លូអាយុគាត់៨៤ឆ្នាំ។ ខ្ញុំក៏បានជូនថវិកាគាត់ហើយខ្ញុំសូមកោតសរសើរចំពោះសុខភាពគាត់នៅបញ្ជាស៊ីក្លូបានទៀត។ នាយបានបន្តទៀតថាក្រោយមកទៀតខ្ញុំបានចេញមកពីផ្សារថ្មីមកដល់ម្ដុំវិមានឯករាជ្យក៏បានជួបអ៊ុំម្នាក់ទៀតកំពុងតែបញ្ជាស៊ីក្លូ។ ភ្លាមនោះខ្ញុំក៏បានបក់ដៃហៅគាត់ឈប់ក៏ជូនថវិកាគាត់មួយចំនួនហើយខ្ញុំសួរអាយុគាត់ទៀត គាត់ក៏ប្រាប់អាយុគាត់៨៦ឆ្នាំ ហើយខ្ញុំសួរគាត់ថាអ៊ុំអត់ដែលឈឺអីទេ គាត់ឆ្លើយថាគាត់អត់ដែលឈឺអីទេក្មួយ អញ្ចឹងបានថាអាយុគ្រាន់តែតួលេខទេសំខាន់សុខភាពអាចបញ្ជាស៊ីក្លូបាន។ តាមរយៈនេះមានមហាជនជាច្រើនបានបង្ហាញការគាំទ្រគ្រប់គ្នា៕

អត្ថបទ ៖ ចាន់រ៉ា