ជីវិតកម្សាន្ដ

តារាចម្រៀងពូកែក្បាច់រាំបញ្ចេញស្នាដៃOriginal Songត្រៀមអបអរបុណ្យចូលឆ្នាំខ្មែរ

Published

2 weeks ago

February 18, 2021

តារាចម្រៀងលោក ជុំ លីណូ បើតាមការកត់សម្គាល់មួយរយៈចុងក្រោយនេះ ទោះបីជាលោកពុំមានទ្រនុំពិតប្រាកដដូចមុនក៏ពិតមែន តែសម្រាប់ទីផ្សារចម្រៀងនិងប្រជាប្រិយភាពនៅតែមានសន្ទុះនៃការគាំទ្រដូចដើម ។

ចំពោះការរក្សាបានទីផ្សារគាំទ្រនិងប្រជាប្រិយភាពនេះ ក៏ដោយសារតែកន្លងមកលោក ជុំ លីណូ គឺជាតារាចម្រៀងប្រុសមួយដួងដែលស្ថិតក្នុងបេះដូងយុវវ័យរួចទៅហើយ។ ម្យ៉ាងទៀតក្រោយចាកចេញពីទ្រនំចាស់ជាច្រើនឆ្នាំមកនោះ លោក ជុំ លីណូ បានស្វះស្វែងផលិតនិងចេញបទចម្រៀងដោយខ្លួនឯងនៅលើបណ្តាញសង្គមយូធូបជាដើម។

យ៉ាងណាមិញនាអំឡុងរយៈកាលចុងក្រោយដែលកើតមានជំងឺកូវីដ-១៩នោះ ឃើញថាសម្រាប់ទីផ្សារចេញច្រៀងរបស់ ជុំ លីណូ ហាក់មានភាពស្ងប់ស្ងាត់ច្រើន ទាំងការឡើងប៉ុស្តិ៍ទូរទស្សន៍និងបណ្តាកម្មវិធីប្រគំតន្ត្រីនានាមិនខុសគ្នាពីតារាប្រុស-ស្រីរបស់ខ្មែរឯទៀតឡើយ។

ប៉ុន្តែទោះបីជាមានការស្ងប់ស្ងាត់លើទីផ្សារចេញច្រៀងបែបនេះក៏ពិតមែន ស្រាប់តែថ្មីៗនេះ លីណូ បានបញ្ចេញស្នាដៃបទថ្មីជាចង្វាក់ប្រពៃណីដើម្បីត្រៀមអបអរនិងស្វាគមន៍ឱកាសនៃពិធីបុណ្យចូលឆ្នាំខ្មែរដែលឈានចូលជិតដល់នាពេលខាងមុខឆាប់ៗនេះផងដែរ។ បើតាមការបញ្ជាក់ពីលោក ជុំ លីណូ ចំពោះចំណងដៃបទថ្មីរបស់លោកនេះ គឺមានចំណងជើងថា Live លុះក្ស័យ ជាចង្វាក់បែបកន្ទ្រឹម។

លោក ជុំ លីណូ បានឲ្យដឹងទៀតថា បទនេះទើបតែបញ្ចេញផ្សព្វផ្សាយនៅលើបណ្តាញសង្គមទើបមានរយៈពេលប៉ុន្មានថ្ងៃនេះប៉ុណ្ណោះ ខណៈការគាំទ្រក៏មានសន្ទុះកើនឡើងបណ្តើរផងដែរ។

លោកបន្ថែមថា សម្រាប់បទនេះដែរសង្ឃឹមថា នឹងមានការគាំទ្រកាន់តែច្រើនពីសំមហាជននិងបណ្តាយុវវ័យខ្មែរ ព្រោះវាជាចង្វាក់ប្រពៃណីដើម្បីអបអរពិធីបុណ្យចូលឆ្នាំខ្មែរផងដែរ។

សូមជម្រាបជូនដែរថា តារាចម្រៀងប្រុសពូកែខាងចាក់ក្បាច់រាំលោក ជុំ លីណូ បច្ចុប្បន្នលោកក៏កំពុងត្រៀមបញ្ចេញស្នាដៃបទចម្រៀងជាច្រើនទៀតតាមរយៈការបង្កើតស្នាដៃនិពន្ធបទOriginal Song ដោយបានបង្កើតក្រុមមួយមានឈ្មោះថា Share Medai៕

អត្ថបទ ៖ ចាន់រ៉ា