កុយ អេនណា សម្តែងការអរគុណដែលក្រសួងកិច្ចការនារីផ្តល់តម្លៃដល់សកម្មភាពមនុស្សធម៌របស់ខ្លួន

កុយ អេនណា ទទួលបានការកោតសរសើរពីក្រសួងកិច្ចការនារី ក្នុងបេសកកម្មដំណើរថ្មើរជើង ពីរាជធានីភ្នំពេញ ទៅកាន់ខេត្តសៀមរាប ក្រោមយុទ្ធការ «ដើរដើម្បីក្តីសង្ឃឹម ដើរដើម្បីទេសចរណ៍» ដើម្បីរៃអង្គាសថវិកាជួយដល់ក្មេងៗ និងជនមានពិការភាពក្នុងមណ្ឌលខ្វះខាត ដែលទើបនឹងបញ្ចប់កាលពីកញ្ញាកន្លងទៅថ្មីៗនេះ។

តាមរយៈទំព័រហ្វេសប៊ុកផ្លូវការរបស់បវរកញ្ញារូបនេះ ក៏បានសម្តែងក្តីគោរពអរគុណចំពោះ ក្រសួងកិច្ចការនារី Ministry of Women’s Affairs of Cambodia ផងដែរ ដែលបានយកចិត្តទុកដាក់ និងផ្តល់តម្លៃដល់ខ្លួន ពិសេសគឺបានរួមចំណែកគាំទ្រយ៉ាងពេញទំហឹងលើយុទ្ធនាការរបស់នាង។

ជាមួយគ្នានេះ កុយ អេនណា ក៏បង្ហើបពីកម្មវិធីសប្បុរសធម៌ថ្មីមួយទៀត ដែលខ្លួននិងក្រុមការងារ គ្រោងនឹងរៀបចំឡើងឆាប់ៗផងដែរ ដោយគូសបញ្ជាក់ថា “ជួបគ្នាក្នុងក្តីសង្ឃឹមជាថ្មី ក្នុងកម្មវិធីសប្បុរសធម៌ និងការផ្តល់មូលនិធិជូនដល់កុមារ ឬជនមានពិការភាពនៅកម្ពុជា ដែលនាងខ្ញុំ រួមទាំងក្រុមការងារ នឹងរៀបចំឡើងនាពេលឆាប់ៗនេះ”។

បេសកកម្មដើរជាង ៣០០គីឡូម៉ែត្រ ពីភ្នំពេញទៅសៀមរាបនេះ គឺចាប់ចេញដំណើរតាំងពីថ្ងៃទី ០៤ខែកញ្ញាមកម្ល៉េះ ដោយ បវរកកញ្ញារូបស្រស់កម្ពុជារូបនេះ ប្រើពេល ១៩ថ្ងៃ ដើរឆ្លងកាត់រាជធានី-ខេត្តចំនួន ៥ ហើយបញ្ចប់គោលដៅដើររបស់ខ្លូននៅមុខប្រាសាទអង្គរវត្ត។ ខណៈគោលបំណងនៃយុទ្ធនាការនេះ គឺដើម្បីរៃអង្គាសថវិកាជួយកុមារ ​និងជនពិការ​ក្នុងមណ្ឌលខ្វះខាត ហើយទទួលបានស្វាគមន៍យ៉ាងកក់ក្តៅពីសាធារណជនខ្មែរ។

យ៉ាងណា ក្រោយបិទបញ្ចប់បេសកកម្មដើរដោយថ្មើរជើងពីភ្នំពេញ ទៅកាន់ខេត្តសៀមរាប ក្រោមប្រធានបទ “ដើរដោយក្តីសង្ឃឹម ដើរដើម្បីទេសចរណ៍” កញ្ញា កុយ អេនណា ក៏បានរួមចំណែកផ្សព្វផ្សាយតំបន់សក្តានុពលទេសចរណ៍ដ៏ទាក់ទាញក្នុងទឹកដីខេត្តសៀមរាប និងផ្សព្វផ្សាយវប្បធម៌ផងដែរ តាមរយៈការបង្ហាញខ្លួនក្នុងឈុតប្រណិតរបស់ជាតិ៕ ចាន់រ៉ា