ព័ត៌មានអន្ដរជាតិ

ប្រមុខការពារជាតិថៃ៖ កម្ពុជាត្រូវបំពេញ២លក្ខខណ្ឌដើម្បីដោះលែងទាហានខ្មែរ និង៤លក្ខខណ្ឌសម្រាប់ការបើកព្រំដែន

បានផុស

៧ ខែ មុន

នៅ

ថ្ងៃសុក្រ ៧ វិច្ឆិកា ២០២៥

ដោយ

Chheang

ចេញផ្សាយនាថ្ងៃទី៧ខែវិច្ឆិកាឆ្នាំ២០២៥ សារព័ត៍មាន Khaosod បានឲ្យដឹងថា យោងតាមរដ្ឋមន្ត្រីក្រសួងការពារជាតិលោក Natthapol Nakpanich ការគ្រោងដោះលែងអ្នកទោសសង្គ្រាមកម្ពុជា១៨នាក់នឹងដំណើរការបានលុះត្រាតែលក្ខខណ្ឌដែលបានព្រមព្រៀងចំនួនពីរក្នុងចំណោមបួនត្រូវបានបំពេញជាមុនសិន។

លោក Natthapol Nakpanich (រូបថត៖ The Nation)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រមុខការពារថៃរូបនេះ បានអះអាងថា របាយការណ៍អំពីការដោះលែងនៅថ្ងៃទី១២ខែវិច្ឆិកា គឺកើតចេញពីការសន្យារបស់កម្ពុជាក្នុងការបញ្ចប់ការបោសសម្អាតមីននៅត្រឹមកាលបរិច្ឆេទនោះ។ បន្ថែមពីនេះ លោក Natthapol បានសង្កត់ធ្ងន់ថា ប្រទេសថៃនឹងមិនបើកច្រកព្រំដែនឡើងវិញទេ រហូតដល់លក្ខខណ្ឌទាំងអស់ចំនួន៤ត្រូវបានបំពេញ រួមទាំងការសាងសង់របង និងការដោះស្រាយបញ្ហាប្រាសាទតាក្របី។

មុនការបញ្ជាក់របស់លោក Natthapol កាលពីព្រឹកថ្ងៃសុក្រនេះ លោក Sihasak Puangketkeow រដ្ឋមន្ត្រីការបរទេសថៃ នៅក្នុងសន្និសីទសារព័ត៌មាននៅអាកាសយានដ្ឋានដនមឿងក្នុងទីក្រុងបាងកក ក៏បានប្រកាសក្ដែងៗដែរថា គម្រោងដោះលែងទាហានកម្ពុជា១៨នាក់ ដែលឃុំខ្លួនក្នុងប្រទេសថៃ នឹងធ្វើឡើងនៅថ្ងៃទី១២ខែវិច្ឆិកា ហើយការដោះលែងនេះទៀតសោតមិនមែនមកពីសម្ពាធពីបរទេសណាមួយឡើយ ដោយបដិសេធរបាយការណ៍ដែលថា ការដោះលែងនេះអាចត្រូវបានផ្សាភ្ជាប់ទៅនឹងបញ្ហាពាណិជ្ជកម្ម ឬសម្ពាធពន្ធរបស់សហរដ្ឋអាមេរិក។ លោក Sihasak បានលើកឡើងថា ការដោះលែងនឹងបន្ត«ស្របតាមលក្ខខណ្ឌដែលកំណត់ដោយអាជ្ញាធរថៃ» ដែលរួមមាន ការដកអាវុធធុនធ្ងន់ និងការអនុញ្ញាតឲ្យថៃចូលទៅកាន់តំបន់បោសសម្អាតមីននៅតាមព្រំដែន៕

ប្រែសម្រួល៖ ឈាង