អនុទីន ប្រកាសថា កិច្ចព្រមព្រៀង​នឹងនៅតែផ្អាក ទាល់តែកម្ពុជាទទួលស្គាល់ការបំពាន និងចេញសុំទោស

យោង​តាម​ការ​​បង្ហោះ​នៅ​លើ​គណនី​ហ្វេសប៊ុក​របស់លោក អានុទីន ឆានវីរៈគុល​ នាថ្ងៃសៅរ៍ទី១៥វិច្ឆិកានេះ ប្រទេសថៃបានបញ្ជាក់ជាថ្មីថា ខ្លួននឹង​នៅ​តែ​ផ្អាករាល់សកម្មភាពទាំងអស់ក្រោមសេចក្តីថ្លែងការណ៍ក្រុងកូឡាឡាំពួរ រហូតទាល់តែកម្ពុជាទទួលខុសត្រូវចំពោះការបំពានកិច្ចព្រមព្រៀង និងសុំទោសចំពោះឧបទ្ទវហេតុគ្រាប់មីនដែលបានធ្វើ​ឲ្យ​ទាហានថៃម្នាក់រងរបួស។

នាយករដ្ឋមន្ត្រីថៃ អានុទីន បានរៀបរាប់​ថា លោកបានផ្តល់សារនេះក្នុងអំឡុងពេលហៅទូរសព្ទកាលពីយប់ថ្ងៃសុក្រជាមួយប្រធានាធិបតីសហរដ្ឋអាមេរិក លោក ដូណាល់ ត្រាំ និងនាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម ដែលមេដឹកនាំទាំងពីរបានជំរុញទីក្រុងបាងកកឲ្យបន្តរក្សាការប្តេជ្ញាចិត្តរបស់ខ្លួនចំពោះកិច្ចខិតខំប្រឹងប្រែងសន្តិភាព ដែលបានគូសបញ្ជាក់នៅក្នុងសេចក្តីថ្លែងការណ៍ដែលបានចុះហត្ថលេខាកាលពីថ្ងៃទី២៦ខែតុលាឆ្នាំ២០២៥។

លោកអានុទីន​ បានបញ្ជាក់​​​ថា ប្រទេសថៃនឹងមិនបន្តកិច្ចសហប្រតិបត្តិការក្រោមសេចក្តីថ្លែងការណ៍នោះទេ រហូតទាល់តែកម្ពុជាទទួលស្គាល់ការបំពាន និងចេញមុខសុំទោសជាសាធារណៈចំពោះប្រជាជនថៃចំពោះហេតុការណ៍​ជាន់មីន​របស់​ទាហានថៃ​កាល​ពី​ពេល​ថ្មីៗ​នេះ។

លោកក៏បានសង្កត់ធ្ងន់ថា ប្រទេសថៃរក្សាសិទ្ធិក្នុងការចាត់វិធានការណាមួយដែលចាំបាច់ ដើម្បីការពារអធិបតេយ្យភាព និងសុវត្ថិភាពរបស់ប្រជាពលរដ្ឋខ្លួន។

ទន្ទឹម​នោះ លោកព្រមានថា ការបដិសេធរបស់កម្ពុជាក្នុងការទទួលស្គាល់កំហុសបានធ្វើឲ្យបាត់បង់ការជឿទុកចិត្តរបស់សាធារណជនក្នុងប្រទេសថៃ ហើយអាចធ្វើឲ្យកិច្ចខិតខំប្រឹងប្រែងសន្តិភាពនាពេលអនាគតកាន់តែពិបាក។

សូម​ជម្រាប​ថា ការ​លើក​ឡើង​របស់​លោក​អានុទីន បាន​ធ្វើ​ឡើង​មួយ​ថ្ងៃ​​​ក្រោយ​នាយករដ្ឋមន្ត្រីម៉ាឡេស៊ីនិងជាប្រធានអាស៊ានឆ្នាំ២០២៥បានជជែកតាមទូរសព្ទជាមួយប្រធានាធិបតីអាមេរិក ដោយលោកបានស្វាគមន៍តួនាទីដ៏សកម្មរបស់មហាអំណាចផុតលេខ ក្នុងការដោះស្រាយជម្លោះព្រំដែនកម្ពុជា-ថៃ។

ជាមួយក្តីសង្ឃឹមថាកម្ពុជា-ថៃ នឹងឈានដល់ដំណោះស្រាយយូរអង្វែងលើបញ្ហាព្រំដែន លោកអាន់វ៉ាបានបង្ហោះលើទំព័រហ្វេសប៊ុក​ថា៖ «ខ្ញុំសូមសង្កត់ធ្ងន់ថា ប្រទេសទាំងពីរបានដកកងទ័ពចេញពីព្រំដែនហើយ ស្របតាមវិធីសាស្រ្តដែលបានឯកភាពគ្នាក្រោមក្របខណ្ឌកិច្ចព្រមព្រៀងសន្តិភាពទីក្រុងគូឡាឡាំពួ។ ដូច្នេះខ្ញុំសូមស្វាគមន៍ចំពោះតួនាទីយ៉ាងសកម្មរបស់លោកប្រធានាធិបតី ត្រាំ ដែលក៏បានទាក់ទងទៅនាយករដ្ឋមន្ត្រីកម្ពុជានិងថៃផងដែរ ដើម្បីធានាថា រាល់ការខ្វែងគំនិតគ្នាគឺត្រូវបានដោះស្រាយដោយរបៀបរៀបរយ ដើម្បីធានាបាននូវស្ថិរភាពនិងភាពសុខដុមរមនាក្នុងតំបន់»៕