ប៉ាគីស្ថាន និងអាហ្វហ្គានីស្ថាន បាញ់តបតគ្នាខ្លាំង បន្ទាប់ពីការចរចាសន្តិភាពបរាជ័យ

ទីភ្នាក់ងារ​ព័ត៍មាន​រ៉យទ័រ​​ បាន​រាយការណ៍​ថា ប៉ាគីស្ថាន និង​អាហ្វហ្គានីស្ថាន​បាន​បាញ់​តបត​គ្នា​យ៉ាងខ្លាំង​ឆ្លងកាត់​ព្រំដែន​រួម​របស់​ពួកគេ​កាលពី​យប់​ថ្ងៃ​សុក្រ​ទី​៥​ខែ​ធ្នូ​ឆ្នាំ​២០២៥ ដែល​ជា​ការ​ផ្ទុះ​ឡើង​នៃ​ភាព​តានតឹង​ចុងក្រោយ​បំផុត​ត្រឹមតែ​ប៉ុន្មាន​ថ្ងៃ​ប៉ុណ្ណោះ បន្ទាប់ពី​ការចរចា​សន្តិភាព​បាន​បញ្ចប់​ដោយ​គ្មាន​ការរីកចម្រើន​។ មិនមាន​របាយការណ៍​ភ្លាមៗ​អំពី​ចំនួន​អ្នកស្លាប់ ឬ​របួស​នោះទេ​។

អ្នកនាំពាក្យ​ក្រុម​តា​លី​បង់​អាហ្វហ្គានីស្ថាន​លោក Zabihullah Mujahid បាន​ចោទប្រកាន់​កងកម្លាំង​ប៉ាគីស្ថាន​ថា​បាន​បើក​ការវាយប្រហារ​នៅ​ស្រុក Spin Boldak នៃ​ខេត្ត Kandahar ភាគខាងត្បូង​។ រដ្ឋាភិបាល​ក្រុង​អ៊ីស្លាម៉ាបាដ​បាន​បដិសេធ​ការអះអាង​នេះ ដោយ​លោក Mosharraf Zaidi អ្នកនាំពាក្យ​ការិយាល័យ​នាយក​រដ្ឋមន្ត្រី បាន​​ប្រាប់​ថា កងទ័ព​អាហ្វហ្គានីស្ថាន​បាន​ចូលរួម​ក្នុង «ការបាញ់ប្រហារ​ដោយ​គ្មាន​ការបង្កហេតុ» នៅតាម​ច្រក​ព្រំដែន Chaman​។

លោក Zaidi បាន​និយាយ​នៅក្នុង​សេចក្តីថ្លែងការណ៍​មួយ​ថា «​ប៉ាគីស្ថាន​នៅតែ​មានការ​ប្រុងប្រយ័ត្ន​ពេញលេញ និង​ប្តេជ្ញា​ធានា​បូរណភាព​ទឹកដី​របស់ខ្លួន និង​សុវត្ថិភាព​របស់​ប្រជាពលរដ្ឋ​របស់​យើង​»​។

ការ​បាញ់តបត​គ្នា​នៅតាម​ព្រំដែន​នេះ​បាន​កើតឡើង​ពីរ​ថ្ងៃ​បន្ទាប់ពី​ការចរចា​ជុំ​ចុងក្រោយ ដែល​ធ្វើឡើង​នៅ​អារ៉ាប៊ីសាអូឌីត បន្ទាប់ពី​កិច្ចប្រជុំ​មុនៗ​ដែល​រៀបចំ​ដោយ​កាតា និង​តួ​ក​គី បាន​បញ្ចប់​ដោយ​គ្មាន​លទ្ធផល​ជា​ដុំ​កំភួន ប៉ុន្តែ​ភាគី​ទាំងពីរ​បាន​យល់ព្រម​រក្សា​បទ​ឈប់​បាញ់​ដ៏​ផុយស្រួយ​មួយ​នេះ​។

ចំណុចស្នូល​នៃ​ជម្លោះ គឺ​ប៉ាគីស្ថាន​បាន​ចោទប្រកាន់​ថា ក្រុម​សកម្មប្រយុទ្ធ​មាន​មូលដ្ឋាន​នៅ​អាហ្វហ្គានីស្ថាន​បាន​ធ្វើ​ការវាយប្រហារ​ជាច្រើន​​លើក​នៅ​ក្នុង​ទឹកដី​របស់ខ្លួន រួមទាំង​ការ​បំផ្ទុះ​គ្រាប់បែក​អត្តឃាត​ដែល​ពាក់ព័ន្ធ​នឹង​ពលរដ្ឋ​អាហ្វហ្គានីស្ថាន​។ រដ្ឋាភិបាល​ក្រុង​កាប៊ុល​បាន​បដិសេធ​ការចោទប្រកាន់​នេះ ដោយ​ទទូចថា​ ខ្លួន​មិនអាច​ទទួលខុសត្រូវ​ចំពោះ​ការវាយប្រហារ​ដែល​កើតឡើង​នៅក្នុង​ប្រទេស​ប៉ាគីស្ថាន​នោះទេ​។

ភាព​តានតឹង​នៅតែមាន​កម្រិត​ខ្ពស់ ចាប់តាំងពី​ការប៉ះទង្គិច​គ្នា​ដ៏​សាហាវ​ក្នុង​ខែតុលា ដែល​បានសម្លាប់​មនុស្ស​រាប់​សិប​នាក់​។ វា​ជា​ការផ្ទុះឡើង​នៃ​អំពើហិង្សា​ដ៏​អាក្រក់​បំផុត​នៅតាម​ព្រំដែន ចាប់តាំងពី​ក្រុម​តា​លី​បង់​បាន​កាន់អំណាច​នៅ​ឆ្នាំ២០២១​៕

ប្រែសម្រួល៖ ឈាង