ពូទីន ជួបមន្ត្រីអ៊ីរ៉ង់ ចំពេលត្រាំ ដាក់សម្ពាធធ្ងន់លើទីក្រុងតេហេរ៉ង់

វិមានក្រឹមឡាំងនិយាយថា ប្រធានាធិបតីរុស្ស៊ី វ្ល៉ាឌីមៀរ ពូទីន បានជួបជាមួយប្រធានស្ថាប័នសន្តិសុខកំពូលអ៊ីរ៉ង់នៅទីក្រុងមូស្គូកាលពីថ្ងៃសុក្រទី៣០ ខែមករា ខណៈដែលលោក ដូណាល់ ត្រាំ ដាក់សម្ពាធដោយព្យាយាមបង្ខំទីក្រុងតេហេរ៉ង់ ឲ្យធ្វើកិច្ចព្រមព្រៀងលើកម្មវិធីនុយក្លេអ៊ែររបស់ខ្លួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចុះផ្សាយដោយ TRT វិមានក្រឹមឡាំងបាននិយាយនៅក្នុងសេចក្តីថ្លែងការណ៍មួយលើគេហទំព័ររបស់ខ្លួនថា «ប្រមុខរដ្ឋបានទទួលលោក Ali Larijani លេខាធិការក្រុមប្រឹក្សាសន្តិសុខជាតិជាន់ខ្ពស់នៃសាធារណរដ្ឋអ៊ីស្លាមអ៊ីរ៉ង់ ដែលកំពុងបំពេញទស្សនកិច្ចនៅប្រទេសរុស្ស៊ី នៅក្នុងវិមានក្រឹមឡាំង»។

យ៉ាងណា កាលពីនៅថ្ងៃសុក្រ លោកត្រាំបានអះអាងថា អ៊ីរ៉ង់ ដែលជាសម្ព័ន្ធមិត្តជិតស្និទ្ធរបស់រុស្ស៊ី ចង់ធ្វើកិច្ចព្រមព្រៀងលើកម្មវិធីនុយក្លេអ៊ែររបស់ខ្លួន ដើម្បីចៀសវាងសកម្មភាពយោធា។ ជាងនេះ មេដឹកនាំអាមេរិកក៏បានបន្តការគំរាមកំហែងក្នុងការបើកការវាយប្រហារប្រឆាំងនឹងអ៊ីរ៉ង់ ដែលថ្មីៗនេះបានដាក់ចេញនូវការបង្ក្រាបលើក្រុមបាតុករផងដែរ។

ដោយឡែក ស្ថានទូតអ៊ីរ៉ង់នៅទីក្រុងមូស្គូបានបង្ហោះនៅលើប្រព័ន្ធផ្សព្វផ្សាយសង្គមថា «កិច្ចពិភាក្សាកាលពីថ្ងៃសុក្ររវាងលោកពូទីន និងលោក Larijani បានផ្តោតលើទំនាក់ទំនងសេដ្ឋកិច្ច និង បញ្ហាសំខាន់ៗក្នុងតំបន់ និងអន្តរជាតិ»។ ប៉ុន្តែមិនបានពន្យល់លម្អិតឡើយ។

ក្នុងពេលដែលប្រទេសអ៊ីរ៉ង់ បានលេចចេញជាសម្ព័ន្ធមិត្តសំខាន់មួយរបស់រុស្ស៊ី អំឡុងសង្គ្រាមជាមួយអ៊ុយក្រែន ទីក្រុងមូស្គូក៏បានផ្តល់ការគាំទ្រអន្តរជាតិដ៏សំខាន់ដល់ទីក្រុងតេហេរ៉ង់ ដោយស្នើសម្របសម្រួលរវាងទីក្រុងវ៉ាស៊ីនតោន និងទីក្រុងតេហេរ៉ង់ក្នុងជម្លោះបច្ចុប្បន្ននេះដែរ៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

កិច្ចប្រជុំរវាង ពូទីន -ហ្សេលេនស្គី នឹងធ្វើឡើងនៅទីក្រុងមូស្គូប៉ុណ្ណោះ