WHO ថា ជំងឺកូវីដ ១៩ បំប្លែងខ្លួនថ្មី ក៏មិនថមថយដែរ នៅតែបន្តរាលពាសពេញពិភពលោក

អង្គការសុខភាពពិភពលោក (WHO) និយាយថា ជំងឺកូវីដ ១៩ បំប្លែងខ្លួនប្រភេទថ្មីដែលត្រូវបានរកឃើញដំបូងនៅចក្រភពអង់គ្លេស និងអាហ្វ្រិកខាងត្បូង នៅតែបន្តរាលដាលពាសពេញពិភពលោក ។

នៅក្នុងការធ្វើបច្ចុប្បន្នភាព រោគរាតត្បាតប្រចាំសប្តាហ៍របស់ខ្លួន ដែលត្រូវបានចេញផ្សាយកាលពីថ្ងៃពុធ អង្គការសុខភាពពិភពលោកនិយាយថា វ៉ារ្យ៉ង់ចក្រភពអង់គ្លេស ឥឡូវនេះត្រូវបានបញ្ជាក់នៅក្នុងប្រទេស និងដែនដីចំនួន ១៣៧ ហើយ ពោលគឺកើនឡើងចំនួន ៥ ពីសប្តាហ៍មុន ។

វ៉ារ្យ៉ង់អាហ្រ្វិកខាងត្បូង ត្រូវបានបញ្ជាក់នៅក្នុងប្រទេស និងទឹកដីចំនួន ៨៥ ពោលគឺកើនឡើងចំនួន ៣ ។ ចំណែក វ៉ារ្យ៉ង់ប្រេស៊ីល ត្រូវបានបញ្ជាក់នៅក្នុងប្រទេស និងដែនដីចំនួន ៥២ ពោលមិនមានការប្រែប្រួលពីសប្តាហ៍មុននោះទេ ។

ស្ថាប័នសុខភាពអន្តរជាតិបានកំណត់វ៉ារ្យង់ទាំងបីថាជា “វ៉ារ្យង់នៃការព្រួយបារម្ភ” ។ ទីភ្នាក់ងារនេះកំពុងតាមដានវ៉ារ្យង់ទាំងនេះយ៉ាងដិតដល់ ព្រោះការវិវត្តរបស់ពួកវាអាចប៉ះពាល់ដល់ភាពស៊ាំរបស់មនុស្ស ហើយវីរុសនេះអាចឆ្លងកាន់តែខ្លាំងឡើង ។

ទន្ទឹមនោះ WHO និយាយថា ចំនួនករណីឆ្លងថ្មីនៃជំងឺកូវីដ ១៩ ក៏កំពុងកើនឡើងផងដែរនៅទូទាំងពិភពលោក ។ WHO បន្តថា ការរីករាលដាល និងការកើនឡើងនៃវ៉ារ្យង់នេះកំពុងកើតឡើងយ៉ាងធ្ងន់ធ្ងរក្នុងចំណោមយុវវ័យ ។

គួរបញ្ជាក់ថា គិតត្រឹមពេលនេះនៅលើពិភពលោកមានករណីឆ្លងជំងឺកូវីដ ១៩ សរុប ១៤៤,៤៣០,៤៧៧ ករណី និងមានអ្នកស្លាប់ចំនួន ៣,០៧១,៥៨៩ នាក់ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ មេ WHO ចែករំលែកវិធី ៥ យ៉ាងដល់ប្រជាជនទូទាំងពិភពលោកអនុវត្ត អំឡុងជំងឺកូវីដ ១៩

ចុចអាន ៖ មេ WHO ចេញមុខប្រកាសហើយថា ពិភពលោកអាចគ្រប់គ្រងកូវីដបានក្នុងរយៈពេលប៉ុន្មានខែខាងមុខ