ព័ត៌មានអន្ដរជាតិ

ជប៉ុនប្រកាសអាសន្នវីរុសបំប្លែងថ្មីមុនកីឡាអូឡាំពិក៣ខែ

បានផុស

៣ years មុន

នៅ

ថ្ងៃសៅរ៍ ២៤ មេសា ២០២១

ដោយ

ប្រទេសជប៉ុនបានប្រកាសពីស្ថានភាពអាសន្នវីរុសបំប្លែងថ្មីនៅក្នុងទីក្រុងតូក្យូ និងទីក្រុង៣ផ្សេងទៀតកាលពីថ្ងៃសុក្រម្សិលមិញ ខណៈប្រទេសកំពុងប្រយុទ្ធនឹងការឆ្លងកូវីដ-១៩ កើនឡើងមុនពេល៣ខែនៃព្រឹត្តិការណ៍កីឡាអូឡាំពិក។

ការផ្ទុះកូវីដ-១៩នៅក្នុងប្រទេសនេះនៅតែមានតិចជាងប្រទេសផ្សេងជាច្រើនទៀត ប៉ុន្តែការកើនឡើងនូវករណីវីរុសបំប្លែងថ្មីមួយចំនួនតូចបានធ្វើឲ្យមន្ត្រី និងផ្នែកសុខាភិបាលមានការព្រួយបារម្ភ ខណៈរដ្ឋាភិបាល និងអ្នករៀបចំព្រឹត្តិការណ៍កីឡាអូឡាំពិកនៅតែទទួចឲ្យកីឡារដូវក្តៅនេះនៅតែបន្តដំណើរការ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកនាយករដ្ឋមន្ត្រី Yoshihide Suga បានប្រកាសដោយស្រង់សំដីពីការកើនឡើងនៃករណីឆ្លងពាក់ព័ន្ធនឹងវីរុសបំប្លែងថ្មីថា ៖«ថ្ងៃនេះ ខ្ញុំបានសម្រេចប្រកាសពីស្ថានភាពអាសន្នមួយនៅក្នុងទីក្រុងតូក្យូ ក្យូតូ អូសាកា និងហ្សូហ្គូ»។ វិធានការនឹងចាប់ពីថ្ងៃទី២៥ ខែមេសា ដល់ថ្ងៃទី១១ ខែឧសភា។

រដ្ឋមន្ត្រីទទួលបន្ទុកវីរុសឆ្លងរបស់ជប៉ុនលោក Yasutoshi Nishimura បានព្រមានពីមុនថា មាន«អារម្មណ៍នៃវិបត្តិដ៏ខ្លាំងមួយ»ដោយមានប្រសាសន៍ថា ការរឹតត្បិតបច្ចុប្បន្ននេះមិនគ្រប់គ្រាន់ឡើយ។

វិធានការថ្មីនេះនឹងតឹងតែងជាងវិធានការអាសន្នកាលពីលើកមុន ដែលបានដាក់នៅតាមផ្នែកខ្លះនៃប្រទេសកាលពីខែមករា ប៉ុន្តែនៅតែមានរយៈពេលខ្លីជាងបំរាមបិទខ្ទប់នៅតាមបណ្តាប្រទេសផ្សេងៗក្នុងពិភពលោក។

អាជ្ញាធរចង់ឲ្យបារ និងភោជនីយដ្ឋានឈប់លក់គ្រឿងស្រវឹង ឬបិទតែម្តង និងបិទកន្លែងពាណិជ្ជកម្មសំខាន់ៗដូចជាផ្សារទំនើបជាដើម។

វិធានការថ្មីនឹងជាន់ថ្ងៃបុណ្យឈប់សម្រាក Golden Week ដែលជាពេលវេលាធ្វើដំណើរក៏មមាញឹកបំផុតរបស់ប្រទេសជប៉ុនប្រចាំឆ្នាំ និងអាចឈានដល់ការកាត់សេវាកម្មរថភ្លើង និងរថយន្តក្រុងមួយចំនួនទៀតផង។

សម្រាប់ព្រឹត្តិការណ៍កីឡា អ្នកគាំទ្រត្រូវហាមចូលទស្សនាផ្ទាល់ពោលគឺការប្រកួតបិទទ្វារ និងជំរុញឲ្យធ្វើការងារពីផ្ទះ។

ទោះជាវិធានការនឹងចាប់ផ្តើមថ្ងៃអាទិត្យនេះ ប៉ុន្តែអភិបាលក្រុងតូក្យូលោកស្រី Yuriko Koike បានជំរុញឲ្យប្រជាជនចាប់ផ្តើមមានការប្រុងប្រយ័ត្នជាបន្ទាន់ រាប់ទាំងជៀសវាងពិសាគ្រឿងស្រវឹងនៅតាមដងផ្លូវ បន្ទាប់ពីបារ និងភោជនីយដ្ឋានបានបិទលឿន។

ប្រទេសជប៉ុនបានជោគជ័យខ្លះពីការទប់ស្កាត់កូវីដ-១៩ដែលមានអ្នកស្លាប់តិចជាង១ម៉ឺននាក់ បើទោះជាមិនដែលដាក់បំរាមបិទខ្ទប់តឹងតែងក៏ដោយ។

កាលពីថ្ងៃ សុក្រ ម្សិលមិញ ទីក្រុងតូក្យូមានករណីឆ្លងកូវីដ-១៩ចំនួន៧៥៩នាក់ ខណៈទីក្រុងអូសាកាមានអ្នកឆ្លងចំនួន១១៦២នាក់ ដែលតួលេខ១ឆ្លងធ្លាក់ចុះតិចតូច បើប្រៀបធៀបនឹងពេលវេលាកាលពីដើមសប្តាហ៍នេះ។

មន្ត្រីបាននិយាយថា ស្ថានភាពនឹងមិនប៉ះពាល់ដល់ការរៀបចំព្រឹត្តិការណ៍កីឡាអូឡាំពិករដូវក្តៅនេះដែលលើកពីឆ្នាំ២០២០មកធ្វើនៅឆ្នាំ២០២១នេះ។ ប្រធានរៀបចំកីឡានេះលោកស្រី Seiko Hashimoto បញ្ជាក់នៅថ្ងៃសុក្រម្សិលមិញថា ៖«យើងមិនគិតពីការលុបចោកឡើយ»៕

ប្រែសម្រួល៖ វីរបុត្រ
ប្រភព៖ theguardian