ដ្រូនរុស្ស៊ី វាយប្រហារចំទីតាំង​​ប្រេង​​នុយក្លេអ៊ែរ​ នៅ​ជិត​រោង​ចក្រ​នុយក្លេអ៊ែរ Chernobyl របស់​អ៊ុយក្រែន​

មន្ត្រីអ៊ុយក្រែន បានប្រកាសកាលពី ទី៧ ខែមិថុនា ថា ដ្រូនរុស្ស៊ីបានវាយប្រហារលើទីតាំង​ផលិត​​ប្រេងឥន្ធនៈនុយក្លេអ៊ែរមួយកន្លែង នៅជិតរោង​ចក្រ​ថាមពល​​​នុយក្លេអ៊ែរ​ Chernobyl ដែលជាទីតាំងធ្លាប់កើតមានគ្រោះមហន្តរាយនុយក្លេអ៊ែរដ៏ធំបំផុតក្នុងសតវត្សទី២០។ ការវាយប្រហារនេះបានកើតឡើង ចំពេលមានសេចក្តីរាយការណ៍ថា រដ្ឋបាលរបស់​ប្រធានាធិបតី ដូណាល់ ត្រាំ កំពុងបង្កកកិច្ចព្រមព្រៀងផ្តល់ដ្រូនដ៏សំខាន់មួយសម្រាប់អ៊ុយក្រែន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការចេញផ្សាយពីសារព័ត៌មាន thehill ប្រធានាធិបតីអ៊ុយក្រែន វ៉ូឡូឌីមៀរ ហ្សេលេនស្គី បានបញ្ជាក់ថា ទីតាំងនេះត្រូវបានវាយប្រហារដោយដ្រូនប្រភេទ Shahed ហើយលោកបានហៅសកម្មភាពនេះថា «គួរឲ្យស្អប់ខ្ពើមខ្លាំង»។ លោកបានបន្ថែមថា ក្រសួងការបរទេស, ក្រសួងថាមពល និងស្ថាប័នរដ្ឋាភិបាលផ្សេងទៀតរបស់អ៊ុយក្រែន កំពុងធ្វើការជាមួយដៃគូអន្តរជាតិ ដើម្បីស្វែងយល់ឲ្យច្បាស់ពីហេតុការណ៍នេះ ខណៈដែលភាគីរុស្ស៊ីមិនទាន់បានចេញមុខទទួលស្គាល់ការវាយប្រហារនេះជាសាធារណៈនៅឡើយទេ។

ប្រមុខមេដឹកនាំអ៊ុយក្រែន បានសរសេរនៅលើបណ្តាញសង្គម X ថា «គិតមកទល់ពេលនេះ មិនទាន់មានការបង្ហាញពីកម្រិតវិទ្យុសកម្មលើសពីធម្មតានៅឡើយទេ។ ប៉ុន្តែវាពិតជាបង្ហាញពីការកើនឡើងនៃភាពព្រហើនរបស់រុស្ស៊ី ដែលបានហួសព្រំដែនជាយូរមកហើយ។ ពិភពលោកត្រូវការវិធានការណ៍ថ្មីៗ និងពិតប្រាកដ ដើម្បីឲ្យរុស្ស៊ីដឹងថា សង្រ្គាមភេរវកម្មរបស់ពួកគេ នឹងផ្តល់ផលវិបាកត្រឡប់ទៅរកប្រទេសរុស្ស៊ីខ្លួនឯងវិញ»។

ទោះជាយ៉ាងណា ទីភ្នាក់ងារថាមពលអាតូមិកអន្តរជាតិ (IAEA) បានកត់សម្គាល់ថា ការវាយប្រហារនេះ បានបង្កឲ្យមានការខូចខាតយ៉ាងខ្លាំងដល់អគារទទួលប្រេងឥន្ធនៈ រួមមានផ្នែកខាងមុខ បង្អួច និងទ្វារ ហើយអគារនៅក្បែរនោះក៏រងផលប៉ះពាល់ដោយរលកបន្ទុះផងដែរ។ អគ្គនាយក IAEA លោក Rafael Grossi បាននិយាយថា ហេតុការណ៍នេះ «គួរឲ្យព្រួយបារម្ភយ៉ាងខ្លាំង» ការវាយប្រហារលើទីតាំងនុយក្លេអ៊ែរគឺជាសកម្មភាព មិនអាចទទួលយកបានទាល់តែសោះ និងរំលោភផ្ទាល់លើគោលការណ៍សុវត្ថិភាពនុយក្លេអ៊ែរ។

យ៉ាងណាមិញ ការវាយប្រហារចុងក្រោយនេះ បានកើតឡើងចំពេលដែលរដ្ឋបាលលោក ត្រាំ កំពុងពន្យារពេលចុះហត្ថលេខាលើកិច្ចព្រមព្រៀងដ្រូនដ៏ធំមួយជាមួយអ៊ុយក្រែន ទោះបីជាមានការអង្វរករពីលោក ហ្សេលេនស្គី  ក៏ដោយ។ កាលពីថ្ងៃអាទិត្យមុន ប្រធានាធិបតីអ៊ុយក្រែន បានបង្ហោះសារយ៉ាងវែងលើបណ្ដាញសង្គម X ដើម្បីអំពាវនាវសុំ «កិច្ចព្រមព្រៀងដ្រូនទ្វេភាគី ដែលជាឯកសារក្របខ័ណ្ឌដ៏ធំមួយ» រវាងសហរដ្ឋអាមេរិក និងអ៊ុយក្រែន៕

អត្ថបទ ៖ សាង ស្រីល័ក្ខ

ហ្សេលេនស្គី ផ្ញើលិខិតទៅ ពូទីន បបួលជួបចរចាទល់មុខគ្នា ដើម្បីបញ្ចប់សង្គ្រាម