មេដឹកនាំអឺរ៉ុប ចាប់ដៃគ្នាជួយអ៊ុយក្រែន ជំរុញ​ការផលិតអាវុធធុនធ្ងន់វាយបកទៅរុស្ស៊ី

កាលពីល្ងាចថ្ងៃអាទិត្យ ទី​៧ ខែ​មិថុនា ឆ្នាំ​២០២៦ ក្នុងកិច្ចប្រជុំ​​នៅ​ទីក្រុងឡុងដ៍ លោកនាយករដ្ឋមន្ត្រីអង់គ្លេស Keir Starmer បានបើកទ្វារស្វាគមន៍យ៉ាងកក់ក្តៅ ចំពោះប្រធានាធិបតីអ៊ុយក្រែន លោក វ៉ូឡូឌីមៀរ ហ្សេលេនស្គី រួមជាមួយប្រធានាធិបតីបារាំង លោក Emmanuel Macron និងអធិការបតីអាល្លឺម៉ង់ លោក Friedrich Merz ដើម្បីអង្គុយជជែកគ្នាយ៉ាងតានតឹង អំពីវាសនានៃសង្គ្រាម ដែលកំពុងឆាបឆេះ។

យោងតាមការផ្សាយ​នា​ថ្ងៃ​ចន្ទ នេះ របស់​សារព័ត៌មាន iPaper នៅក្នុងជំនួបដ៏មានសារៈសំខាន់នោះ មេដឹកនាំទាំងបួនរូប បានឯកភាពគ្នាយ៉ាងមុតមាំថា ពួកគេចាំបាច់ត្រូវតែរួមដៃគ្នា ជំរុញ​ការផលិតអាវុធការពារខ្លួន និងប្រព័ន្ធមីស៊ីល ដែលអាចបាញ់បានឆ្ងាយឱ្យបានលឿនបំផុត តាមដែលអាចធ្វើទៅបាន។ ការសម្រេចចិត្តនេះ ធ្វើឡើង បន្ទាប់ពីរុស្ស៊ី បានបង្កើនការវាយប្រហារតាមអាកាសយ៉ាងខ្លាំងក្លា ដោយថែមទាំងបានបាញ់មីស៊ីលល្បឿនលឿនជាងសំឡេងជំនាន់ថ្មី Oreshnik ទៅលើទីក្រុងនានារបស់អ៊ុយក្រែន រួមទាំងទីក្រុងកៀវផងដែរ ដែលបង្កជាការភ័យខ្លាចដល់ប្រជាជនយ៉ាងខ្លាំង។

ជាមួយគ្នានោះដែរ លោក ហ្សេលេនស្គី បានបង្ហើបថា លោកបានស្នើសុំមីស៊ីលការពារអាកាសបន្ថែមពីអង់គ្លេស ពីព្រោះទោះបីជាអ៊ុយក្រែន អាចទប់ទល់ការរំកិលខ្លួនរបស់ទ័ពរុស្ស៊ីនៅលើសមរភូមិបានខ្លះ និងបានប្រើដ្រូនវាយបកទៅដល់ទីក្រុង St. Petersburg របស់រុស្ស៊ីវិញក៏ដោយ ក៏អ៊ុយក្រែននៅតែត្រូវការខែលការពារខ្លួនពីមីស៊ីលដ៏សាហាវរបស់រុស្ស៊ីដែរ។ លោក ហ្សេលេនស្គី បាននិយាយទៅកាន់អ្នកសារព័ត៌មានទាំងការតាំងចិត្តខ្ពស់ថា ពួកគេនឹងមិនព្រមអង្គុយរង់ចាំសេចក្តីស្លាប់ ដោយស្ងៀមស្ងាត់ឡើយ ពោលគឺរុស្ស៊ីបាញ់មកប៉ុណ្ណា អ៊ុយក្រែននឹងវាយបកទៅវិញប៉ុណ្ណឹង ហើយនឹងកាន់តែខ្លាំងឡើងពីមួយថ្ងៃទៅមួយថ្ងៃ។

ក្រៅពីការជជែករឿងអាវុធ មេដឹកនាំទាំងអស់ ក៏បានដាក់ចេញនូវលក្ខខណ្ឌសំខាន់ៗមួយចំនួន ដើម្បីស្វែងរកសន្តិភាពមួយដ៏យុត្តិធម៌ និងយូរអង្វែង។ ពួកគេបានអំពាវនាវឱ្យប្រធានាធិបតីរុស្ស៊ី លោក វ៉្លាឌីមៀរ ពូទីន យល់ព្រមផ្អាកការបាញ់បោះគ្នាជាបន្ទាន់ ដោយយកខ្សែបន្ទាត់សមរភូមិបច្ចុប្បន្នជាចំណុចចាប់ផ្តើមនៃការចរចា។ លើសពីនេះ អ៊ុយក្រែនត្រូវតែមានការធានាសន្តិសុខផ្នែកច្បាប់ ដោយមានការដាក់ពង្រាយទ័ពចម្រុះជាតិសាសន៍មកជួយការពារ ហើយទ្រព្យសម្បត្តិរបស់រុស្ស៊ីដែលត្រូវបានបង្កកទាំងអស់ នឹងមិនត្រូវបញ្ចេញ​ឡើយ លុះត្រាតែរុស្ស៊ីព្រមសងការខូចខាតសង្គ្រាមទាំងអស់ដល់អ៊ុយក្រែន។

សូម​ជម្រាប​ថា នៅពេលដែលចំថ្ងៃជួបប្រជុំនោះ ដ្រូនរបស់រុស្ស៊ីបានហោះទៅបុកចំមជ្ឈមណ្ឌលផ្ទុកកាកសំណល់នុយក្លេអ៊ែរ ដែលស្ថិតនៅចម្ងាយតែ៩ម៉ាយល៍ពីដេប៉ូនុយក្លេអ៊ែរ Chernobyl ដ៏ល្បីល្បាញ បង្កជាអគ្គិភ័យយ៉ាងសន្ធោសន្ធៅ ទោះជាសំណាងល្អដែលគេពន្លត់ទាន់ និងមិនមានការលេចធ្លាយសារធាតុវិទ្យុសកម្មក៏ដោយ។ ទោះជា​បែប​នេះក្ដី លោក Keir Starmer នាយករដ្ឋមន្ត្រីអង់គ្លេស បានផ្ញើសារយ៉ាងមុតមាំទៅកាន់ពិភពលោកវិញថា ជំហររបស់អង់គ្លេសក្នុងការគាំទ្រអ៊ុយក្រែន គឺរឹងមាំដូចដែកថែប ពីព្រោះសន្តិសុខរបស់អ៊ុយក្រែន ក៏ជាសន្តិសុខរបស់អឺរ៉ុបទាំងមូលផងដែរ៕

ប្រែសម្រួល៖ ឈាង