អ៊ីស្រាអែល បញ្ជាឱ្យមន្ទីរពេទ្យទូទាំងប្រទេសប្តូរទៅក្រោមដីជា​បន្ទាន់ ក្រោយរងគ្រាប់ពីអ៊ីរ៉ង់

សង្គ្រាមដែលបានផ្ទុះឡើងវិញយ៉ាងទាន់ហន់ បានបង្ខំឱ្យក្រសួងសុខាភិបាលអ៊ីស្រាអែល ចេញបញ្ជាបន្ទាន់មួយ នា​ថ្ងៃចន្ទ ទី៨ ខែមិថុនា ឆ្នាំ២០២៦ នេះ ដោយបង្គាប់ឱ្យមន្ទីរពេទ្យទាំងអស់នៅទូទាំងប្រទេស ផ្លាស់ប្តូររាល់ប្រតិបត្តិការវេជ្ជសាស្ត្រ និងការព្យាបាលទាំងឡាយ ទៅកាន់អគារក្រោមដី និងបន្ទប់ជម្រកដែលមានប្រព័ន្ធការពាររឹងមាំបំផុត។

ការសម្រេចចិត្តនេះ ធ្វើឡើង បន្ទាប់ពីអ៊ីរ៉ង់បានបើកការវាយប្រហារបាញ់ស្រោចមីស៊ីលយ៉ាងខ្លាំងក្លាទៅ​លើភាគខាងជើងប្រទេសអ៊ីស្រាអែល ដែលវា​ជាការបាញ់ទម្លាក់គ្រាប់បែកចំៗលើកដំបូងបំផុត គិតចាប់តាំងពីបទឈប់បាញ់ដ៏ផុយស្រួយមួយ បានចាប់ផ្តើមអនុវត្ត កាលពីដើមខែមេសាកន្លងទៅ។

យោងតាមការចុះផ្សាយរបស់ប្រព័ន្ធផ្សព្វផ្សាយក្នុងស្រុក Yedioth Ahronoth ក្រសួងសុខាភិបាល​អ៊ីស្រាអែល បានណែនាំឱ្យមជ្ឈមណ្ឌលវេជ្ជសាស្ត្រទាំងអស់ ដំណើរការនីតិវិធីសង្គ្រោះបន្ទាន់ភ្លាមៗ ដោយសហការជាមួយបញ្ជាការដ្ឋានការពារជនស៊ីវិល។ ជាមួយគ្នានោះដែរ ប្រធានគ្រប់គ្រងមន្ទីរពេទ្យនានា ត្រូវបានបង្គាប់ឱ្យកៀរគរបុគ្គលិកពេទ្យបន្ថែម និងរៀបចំអនុញ្ញាតឱ្យអ្នកជំងឺណាដែលមានអាការស្រាល អាចត្រឡប់ទៅផ្ទះវិញបាន ដើម្បីទុកកន្លែងត្រៀមលក្ខណៈទទួលអ្នករងគ្រោះថ្នាក់។

ដើមចមនៃការផ្ទុះអាវុធដាក់គ្នានេះ គឺដោយសារតែអ៊ីរ៉ង់បានបាញ់មីស៊ីលជាច្រើនសំដៅទៅភាគខាងជើងអ៊ីស្រាអែល ដើម្បីសងសឹកនឹងការដែលយន្តហោះចម្បាំងអ៊ីស្រាអែល បានហោះទៅទម្លាក់គ្រាប់បែកលើតំបន់ជាយក្រុងភាគខាងត្បូងនៃទីក្រុងបេរូត ប្រទេសលីបង់ ដោយខាងទីក្រុង Tel Aviv អះអាងថា គោលដៅនោះ គឺជាមជ្ឈមណ្ឌលបញ្ជា និងរៀបចំផែនការរបស់ក្រុមហេសបូឡា។ ការបាញ់ប្រហារសងសឹកគ្នានេះ បានបំបែកភាពស្ងប់ស្ងាត់ដែលធ្លាប់មានជាច្រើនខែមកហើយ ក្រោមបទឈប់បាញ់កាលពីខែមេសា ខណៈដែលខាងក្រសួងសុខាភិបាលអ៊ីស្រាអែល ក៏មិនទាន់អាចបញ្ជាក់បាននៅឡើយទេថា តើមន្ទីរពេទ្យនានា នឹងអាចត្រឡប់មកដំណើរការជាធម្មតាវិញនៅពេលណានោះទេ៕

ប្រែសម្រួល៖ ឈាង