ប្រធានាធិបតី ប៉ាឡេស្ទីន ឲ្យអាមេរិកឈប់គាំទ្រ អ៊ីស្រាអែល និងធ្វើអន្តរាគមន៍បញ្ឈប់ការវាយប្រហារលើប្រជាជនខ្លួន

ប្រព័ន្ធផ្សព្វផ្សាយផ្លូវការ របស់ប៉ាឡេស្ទីន បានរាយការណ៍ថា ប្រធានាធិបតីលោក Mahmoud Abbas ក្នុងពេលនិយាយទូរស័ព្ទ ជាមួយប្រធានាធិបតីអាមេរិក Joe Biden បានជំរុញឲ្យសហរដ្ឋអាមេរិកធ្វើអន្តរាគមន៍ បញ្ឈប់ការវាយប្រហាររបស់អ៊ីស្រាអែល ប្រឆាំងនឹងប្រជាជនប៉ាឡេស្ទីន ។

របាយការណ៍ប្រព័ន្ធផ្សព្វផ្សាយ បាននិយាយថា លោក Biden បានបញ្ជាក់ពីការប្រឆាំងរបស់សហរដ្ឋអាមេរិក ចំពោះការបណ្តេញជនជាតិប៉ាឡេស្ទីន ចេញពីផ្ទះរបស់ពួកគេ នៅក្រុង East Jerusalem ដែលអ៊ីស្រាអែលកាន់កាប់ ។

អំពើហិង្សានាពេលបច្ចុប្បន្ននេះកើតឡើង បន្ទាប់ពីមានការប៉ះទង្គិចគ្នាជាបន្តបន្ទាប់ នៅឯក្រុង East Jerusalem ។

ទន្ទឹមនោះ អ៊ីស្រាអែលនិយាយថា លោកនាយករដ្ឋមន្រ្តី Benjamin Netanyahu បានប្រាប់លោក Biden ថា ប្រទេសនេះកំពុងធ្វើអ្វីគ្រប់យ៉ាង ដែលអាចធ្វើបាន ដើម្បីការពារជនស៊ីវិលរបស់យើង និងរក្សាជនស៊ីវិលប៉ាឡេស្ទីន ឲ្យរួចផុតពីគ្រោះថ្នាក់ ។

បន្ថែមពីនេះ លោកនាយករដ្ឋមន្រ្តី ក៏បានពន្យល់ដែរថា ជនស៊ីវិលអាចចាកចេញពីអគារ ដែលយោធាបានកំណត់គោលដៅ ក្នុងការវាយប្រហារ ដើម្បីបញ្ចៀសការស្លាប់ និងរងរបួស ។

គួរបញ្ជាក់ថា នៅតំបន់ហ្គាហ្សាស្ទ្រីប យ៉ាងហោចណាស់ មនុស្សជាង ២០០ នាក់ ក្នុងនោះមានកុមារ ៥៨ នាក់ត្រូវបានសម្លាប់ ខណៈមានអ្នករងរបួស ១,២៣៥ នាក់ នៅក្នុងការវាយប្រហារតាមអាកាសរបស់អ៊ីស្រាអែល ចាប់តាំងពីអំពើហិង្សាបានចាប់ផ្តើមកាលពីថ្ងៃទី១០ ខែឧសភា ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ អ៊ីស្រាអែល ដាក់មីស៊ីល ២ គ្រាប់ទៀត បំផ្លាញមណ្ឌលសុខភាពនៅតំបន់ហ្គាហ្សា ខ្ទេចស្ទើរគ្មានសល់ មិនឲ្យព្យាបាលអ្នករងរបួស

ចុចអាន ៖ ក្រោយឲ្យក្រុមហាម៉ាស ឈប់បាញ់គ្រាប់រ៉ុកកែត ហើយគាំទ្រអ៊ីស្រាអែល ប្រធានាធិបតីអាមេរិក និយាយបែបត្រជាក់ថា ប្រជាជនសមនឹងរស់នៅដោយសុវត្ថិភាព និងសន្តិសុខ