នាយករដ្ឋមន្រ្តីថៃ គាំទ្រឲ្យយករុក្ខជាតិម្យ៉ាងនេះ ទៅព្យាបាលអ្នកជំងឺកូវីដ

អ្នកនាំពាក្យរដ្ឋាភិបាលលោក Anucha Burapachaisri បាននិយាយកាលពីថ្ងៃពុធថា លោកនាយករដ្ឋមន្រ្តី ប្រាយុទ្ធ ចាន់អូចា គាំទ្រការប្រើប្រាស់រុក្ខជាតិ ដើមប្រមាត់មនុស្ស ដើម្បីព្យាបាលអ្នកជំងឺកូវីដ-១៩។

លោកនិយាយថា ដើមប្រមាត់មនុស្សឬជនជាតិថៃស្គាល់ថា Fa Talai Jone អាចបន្ថយការរលាកនិងពង្រឹងប្រព័ន្ធភាពស៊ាំបាន។ លោកបន្ថែមថា រុក្ខជាតិនេះ គួរតែត្រូវបានផ្សំជាមួយថ្នាំប្រឆាំងវីរុស Favipiravir ដើម្បីព្យាបាលអ្នកជំងឺកូវីដ-១៩ ជាពិសេសអ្នកដែលមានការរលាក។

លោក Anucha បន្តថា នាយកដ្ឋានឱសថបុរាណនិងវេជ្ជសាស្ត្រថៃ បានបញ្ជាក់ពីលក្ខណៈសម្បត្តិរបស់វា ប៉ុន្តែក៏បានព្រមានផងដែរថា ដើមប្រមាត់មនុស្ស មិនអាចការពារការឆ្លងកូវីដបានទេ។

លោកអះអាងថា ដើមប្រមាត់មនុស្សមានផ្ទុកសារធាតុ Andrographolide ដែលជាសារធាតុ ត្រូវបានគេបង្ហាញថា អាចសម្លាប់មេរោគនិងបាក់តេរីមួយចំនួន៕

ប្រែសម្រួល៖ Vann Vann

ប្រភព៖ Bangkok Post

ចុចអាន៖ ថ្ងៃនេះ ថៃ ប្រកាសមានអ្នកស្លាប់ដោយសារកូវីដ ក្នុងកម្រិតបំបែកកំណត់ត្រាថ្មី