ព័ត៌មានអន្ដរជាតិ
ទោះជួបសង្គ្រាមស៊ីវិល ១០ ឆ្នាំ ប្រជាជនស៊ីរីនៅតែពេញចិត្តបោះឆ្នោតឲ្យលោក Assad ជាប់ជាប្រធានាធិបតីអាណត្តិទី ៤ ជាមួយសំឡេងជិត ១០០ ភាគរយ
សភាស៊ីរីបានប្រកាសកាលពីថ្ងៃព្រហស្បតិ៍ថា ប្រធានាធិបតីស៊ីរីលោក Bashar al-Assad បានឈ្នះឆ្នោតអាណត្តិ ៧ ឆ្នាំរបស់លោក ជាលើកទី ៤ ក្នុងការប្រកួតប្រជែងតំណែងប្រធានាធិបតីឆ្នាំ ២០២១ ។
លោក Hamoudeh Sabbagh ប្រធានសភាបាននិយាយថា លោក Assad បានឈ្នះសំឡេងឆ្នោត ៩៥.១ ភាគរយ ផ្ទុយពីសំឡេង ៨៨.៧ ភាគរយ នៅក្នុងការបោះឆ្នោតឆ្នាំ ២០១៤ ។ លោកបាននិយាយថា ប្រហែល ១៤ លាននាក់ នៃអ្នកមានសិទ្ធិបោះឆ្នោតប្រមាណ ១៨ លាននាក់ទាំងក្នុង និងក្រៅប្រទេសស៊ីរី បានបោះឆ្នោតរបស់ពួកគេ ខណៈអត្រាអ្នកទៅបោះឆ្នោតមានរហូតដល់ ៧៨.៦៤ ភាគរយ ។
ទន្ទឹមនោះ លោក al-Assad បានសរសេរនៅលើទំព័រហ្វេសប៊ុក នៃយុទ្ធនាការឃោសនារបស់លោកថា “អរគុណដល់ប្រជាជនស៊ីរីទាំងអស់ ចំពោះការយល់ដឹងខ្ពស់នៃគំនិតជាតិនិយម និងការចូលរួមគួរឲ្យកត់សម្គាល់របស់ពួកគេ សម្រាប់អនាគតកុមារ និងយុវជនរបស់ប្រទេសស៊ីរី សូមចាប់ផ្តើមពីថ្ងៃស្អែក នូវយុទ្ធនាការការងាររបស់យើង ដើម្បីកសាងក្តីសង្ឃឹម និងកសាងប្រទេសស៊ីរី” ។
ការបោះឆ្នោតត្រូវបានធ្វើឡើងកាលពីថ្ងៃពុធ ដោយការិយាល័យបោះឆ្នោតបើករហូតដល់ពាក់កណ្តាលអធ្រាត្រ ។
រដ្ឋាភិបាលស៊ីរីបាននិងកំពុងលើកទឹកចិត្តដល់អ្នកបោះឆ្នោត ឲ្យបោះឆ្នោតគាំទ្រអនាគតរបស់ប្រទេសស៊ីរី ។ ការបោះឆ្នោតបង្ហាញថា ប្រទេសស៊ីរីកំពុងដំណើរការជាធម្មតា ទោះបីជាជម្លោះអូសបន្លាយដែលបានចាប់ផ្តើមនៅក្នុងឆ្នាំ ២០១១ ក៏ដោយ ។
នៅថ្ងៃទី ១៧ ខែកក្កដា ឆ្នាំ ២០០០ លោក Assad បានស្នងតំណែងឪពុករបស់លោកគឺលោក Hafez al-Assad ជាប្រធានាធិបតីស៊ីរី ។ យោងតាមរដ្ឋធម្មនុញ្ញស៊ីរីបច្ចុប្បន្ន ដែលត្រូវបានអនុម័តក្នុងឆ្នាំ ២០១២ ប្រធានាធិបតីស៊ីរីមានសិទ្ធិឈរឈ្មោះ ជាប្រធានាធិបតី ២ ដងដែលមានន័យថា នេះជាអាណត្តិចុងក្រោយរបស់លោក Assad ក្នុងតំណែង ។
ការបោះឆ្នោតនៅឆ្នាំនេះ គឺជាការបោះឆ្នោតប្រធានាធិបតីទី ២ នៅក្នុងប្រទេសស៊ីរី ចាប់តាំងពីការចាប់ផ្តើមនៃជម្លោះស៊ីវិល អស់រយៈពេលមួយទសវត្ស ដែលបានសម្លាប់មនុស្សជាង ៣៨៨,០០០ នាក់ ផ្លាស់ទីលំនៅរាប់លាននាក់ និងបានបំផ្លាញហេដ្ឋារចនាសម្ព័ន្ធរបស់ប្រទេស ៕
ប្រែសម្រួលដោយ ៖ ជីវ័ន្ត
ប្រភព ៖ CGTN
-
ព័ត៌មានជាតិ៧ ថ្ងៃ ago
អ្នកឧកញ៉ា គួច ម៉េងលី÷ បើមិននាំខ្លួនមេខ្លោងក្រុមហ៊ុន CIC Plc មកផ្ដន្ទាទោសទេ ពលរដ្ឋនឹងលែងជឿប្រព័ន្ធយុត្តិធម៌កម្ពុជា
-
ព័ត៌មានជាតិ៥ ថ្ងៃ ago
ទ្រព្យសកម្មរបស់ក្រុមហ៊ុន CIC Plc ប្រមាណ ៩០% នៃចំនួនទឹកប្រាក់សរុប ត្រូវបានប្រមូលមកវិញ
-
ព័ត៌មានជាតិ៥ ថ្ងៃ ago
បណ្ឌិត គិន ភា៖ «ហេតុអីមិនបន្ទោសអ្នកបោកគេ បែរជាបន្ទោសអ្នកត្រូវគេបោកទៅវិញ?»
-
ចរាចរណ៍២១ ម៉ោង ago
បឋម៖ រថភ្លើងបុករថយន្ដក្រុងដឹកអ្នកដំណើររបួសច្រើននាក់
-
ព័ត៌មានជាតិ៥ ថ្ងៃ ago
កម្ពុជានឹងមានភ្លៀងធ្លាក់ ១៥% ដល់ថ្ងៃទី ២៧ ដំណាច់ខែមីនា
-
សេដ្ឋកិច្ច៦ ថ្ងៃ ago
មន្ត្រីជាន់ខ្ពស់ធនាគារជាតិ៖ ក្រដាសប្រាក់ ៥ម៉ឺន រៀល មានគូសឆ្នូតកណ្តាលអាចប្តូរយកប្រាក់ថ្មីបានដោយឥតគិតថ្លៃ
-
ព័ត៌មានជាតិ៥ ថ្ងៃ ago
ដីជាង ៤៣ ហិកតា នៅភូមិសាស្ត្រភ្នំ ១៥០០ ត្រៀមដាំស្ដារព្រៃឈើឡើងវិញ
-
ព័ត៌មានអន្ដរជាតិ៣ ថ្ងៃ ago
លម្អិតហេតុការណ៍រន្ធត់ កប៉ាល់ដឹកកុងតឺន័រ បុកបាក់ស្ពាននៅទីក្រុង Baltimore