ព័ត៌មានអន្ដរជាតិ

គ្រែសង្គ្រោះបន្ទាន់នៅម៉ាឡេស៊ីពេញលើសដោយអ្នកជំងឺកូវីដ

បានផុស

៣ years មុន

នៅ

ថ្ងៃពុធ ៩ មិថុនា ២០២១

ដោយ

គ្រែសង្គ្រោះបន្ទាន់សម្រាប់អ្នកជំងឺកូវីដ-១៩នៅក្នុងប្រទេសម៉ាឡេស៊ីពេញដោយអ្នកជំងឺ និងលើសពីសមត្ថភាពហើយ។ នេះបើតាមលោកអគ្គនាយកសុខាភិបាលរបស់ប្រទេសបានឲ្យដឹង និងបានបញ្ជាក់ថា ស្ថានភាពនៅតែអាក្រក់ ទោះករណីឆ្លងថ្មីថយចុះតិចតូច។

ប្រទេសម៉ាឡេស៊ីបានចាប់ផ្តើមដាក់បំរាមបិទខ្ទប់ស្ទើរពេញបន្ទុកទូទាំងប្រទេសចាប់ពីថ្ងៃទី១ ខែមិថុនា បន្ទាប់ករណីឆ្លងប្រចាំថ្ងៃបានហក់ឡើងប្រចាំថ្ងៃដល់ជាង៩ពាន់ក្នុងខែចុងក្រោយនេះ។ ការកើនឡើងបណ្តាលមកពីវីរុសបំប្លែងខ្លួនថ្មី និងការជួបជុំគ្នាក្នុងពិធីបុណ្យ Eid al-Fitr។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងការធ្វើបច្ចុប្បន្នភាពកូវីដ-១៩ប្រចាំថ្ងៃ អគ្គនាយកសុខាភិបាលម៉ាឡេស៊ី លោក Noor Hisham Abdullah បានព្រមានប្រជាជនម៉ាឡេស៊ីកុំទាន់ត្រេកត្រអាលនឹងករណីឆ្លងថ្មីធ្លាក់ចុះតិចតួច ពីព្រោះស្ថានភាពនៅតែអាក្រក់។

លោកថា ៖«ចំនួននៃអ្នកឆ្លងនៅតែខ្ពស់ដល់ ៨២ ៧៩៧នាក់ ដោយសារការផ្ទុះកំឡុងពេលសប្តាហ៍ទី២០ និងទី២១។ ការប្រើប្រាស់គ្រែសង្គ្រោះបន្ទាន់ (ICU) បានកើនឡើងពី៩៦%នៅថ្ងៃទី២៤ ខែឧសភា ដល់ទៅ ១០៤%ត្រឹមថ្ងៃទី៦ ខែមិថុនា»។ លោកបានបញ្ជាក់។

លោកបន្តថា ៖«ការប្រើប្រាស់គ្រែសង្គ្រោះបន្ទាន់ជាង១០០%គឺជាស្ថានភាពកំពុងព្រួយបារម្ភ ខណៈអ្នកជំងឺកូវីដ-១៩មិនទាន់ចូលកន្លែងសង្គ្រោះបន្ទាន់ទាំងអស់ផង។ មន្ទីរពេទ្យទូទាំងប្រទេសកំពុងឃើញករណីឆ្លងកូវីដ-១៩កើនឡើងជាលំដាប់ដែលស្ថិតនៅក្នុងប្រភេទទី៤ និងទី៥»។

កន្លែងសង្គ្រោះបន្ទាន់នៅមន្ទីរពេទ្យម៉ាឡេស៊ី

លោកលើកឡើងថា អ្នកជំងឺទាំងនោះត្រូវការពេលវេលាយូរដើម្បីព្យាបាលឲ្យធូរស្រាលឡើងវិញ ពីព្រោះពួកគាត់បានទទួលរងធ្ងន់ធ្ងរពីកូវីដ-១៩។

«ជាមធ្យម អ្នកជំងឺប្រភេទ៤ត្រូវប្រើពេលព្យាបាលចន្លោះពី១៤ទៅ១៦ថ្ងៃ ខណៈអ្នកជំងឺប្រភេទ៥ត្រូវការពេលព្យាបាលពី១៩ទៅ២៦ថ្ងៃ។ ដោយសារបញ្ហានេះហើយ ក្រសួងសុខាភិបាលសូមរំលឹកដល់ពលរដ្ឋម៉ាឡេស៊ីថា ស្ថានភាពកូវីដ-១៩នៅតែធ្ងន់ធ្ងរ។

ស្ថិតក្នុងបំរាមបិទទូទាំងប្រទេស សាលារៀន និងផ្សារត្រូវបានបិទ។ អនុញ្ញាតឲ្យមនុស្ស២នាក់ប៉ុណ្ណោះពីគ្រួសារនីមួយៗអាចចេញទៅទិញវត្ថុចាំបាច់ដែលបានចម្ងាយ១០គីឡូម៉ែត្រពីផ្ទះប៉ុណ្ណោះ។ យ៉ាងណា វិស័យផលិតកម្មនៅបន្តដំណើរការដោយកាត់បន្ថយកម្លាំងពលកម្ម។

ម៉ាឡេស៊ីបានចាប់ផ្តើមចាក់វ៉ាក់សាំងកាលពីខែកុម្ភៈ និងទើបតែបាន៧%នៃប្រជាជនប៉ុណ្ណោះដែលទទួលបានការចាក់វ៉ាក់សាំងហោចណាស់១ដូស៕