ព័ត៌មានអន្ដរជាតិ

ជប៉ុនអនុញ្ញាតអត្តពលិកពិសាគ្រឿងស្រវឹងក្នុងបន្ទប់ភូមិកីឡា តែមិនចែកស្រោមអនាម័យ

បានផុស

៣ years មុន

នៅ

ថ្ងៃចន្ទ ២១ មិថុនា ២០២១

ដោយ

គណៈកម្មាធិការរៀបចំព្រឹត្តិការណ៍កីឡាអូឡាំពិករដូវក្តៅនៅប្រទេសជប៉ុនបានអនុញ្ញាតឲ្យអត្តពលិកទទួលទានគ្រឿងស្រវឹងនៅក្នុងបន្ទប់ស្នាក់នៅរបស់ពួកគេឯភូមិកីឡាបាន ប៉ុន្តែមិនមានការចែកចាយស្រោមអនាម័យឡើយដែលជាផ្នែកទប់ស្កាត់ការរាលដាលកូវីដ-១៩។

ម្សិលមិញនេះ អ្នករៀបចំកីឡាអូឡាំពិកបានរៀបរាប់ពីភូមិកីឡាដែលមានទំហំ៤៤ហិចតាដល់អ្នកសារព័ត៌មានដែលមានវិធានការជាច្រើនត្រូវបានដាក់ចេញដើម្បីកាត់បន្ថយហានិភ័យនៃកូវីដ-១៩ ក្នុងនោះមានដូចជា ការកាត់បន្ថយកៅអីនៅសាលទទួលទានអាហារ និងអេក្រង់ការពារចន្លោះតុនីមួយៗជាដើម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមអ្នករៀបចំនិយាយថា អត្តពលិកអាចយកគ្រឿងស្រវឹងទៅទទួលទានបាននៅក្នុងបន្ទប់ស្នាក់នៅរបស់ខ្លួន ប៉ុន្តែមិនអនុញ្ញាតនៅទីសាធារណៈ ឬបរិវេណភូមិកីឡាឡើយដែលទាំងនេះជាវិធានការបង្ការកូវីដ-១៩។

ការហាមគ្រឿងស្រវឹងទាំងអស់នៅភូមិកីឡាត្រូវបានគណៈកម្មាធិការរៀបចំការប្រកួតពិចារណាឲ្យស្របទៅនឹងទីតាំងដែលមានវិធានការបង្ការកូវីដដែលត្រូវបានដាក់ចេញនៅប្រទេសជប៉ុន។

ចំណែក ស្រោមអនាម័យ ដែលត្រូវបានចែកជូនដល់អត្តពលិករាល់ពេលមានព្រឹត្តិការណ៍អូឡាំពិកតាំងពីឆ្នាំ១៩៨៨មកនឹងមានដល់អត្តពលិក និងអ្នកចូលរួម នៅពេលពួកគេចាកចេញពីព្រឹត្តិការណ៍ប្រកួតក្នុងពេលសម្រាកមួយតាមគោលការណ៍ប្រពៃណីរបស់អូឡាំពិក។

អត្តពលិកដែលទៅដល់ប្រទេសជប៉ុនមុនពេលព្រឹត្តិការណ៍ប្រកួតរយៈជាង៥ថ្ងៃ និងការចាកចេញមិនលើសពីពីរថ្ងៃ បន្ទាប់ពីស្ថិតក្រោមវិធានការរឹតត្បិតកំឡុងពេលព្រឹត្តិការណ៍ប្រកួតត្រូវមានទំនាក់ទំនងជាមួយអត្តពលិកដទៃដោយមានដែនកំណត់ប៉ុណ្ណោះនៅក្នុងភូមិកីឡា។

ពួកគេនឹងត្រូវធ្វើតេស្តរកកូវីដ-១៩ជាប្រចាំថ្ងៃ និងត្រូវពាក់ម៉ាស់គ្រប់ពេលវេលា លើកលែងតែពេលទទួលទានអាហារ ភេសជ្ជៈ និងពេលដេក។

អត្តពលិក និងអ្នកចូលរួមទាំងអស់ត្រូវតែគោរពគោលការណ៍វិធានការដែលមាននៅក្នុងកូនសៀវភៅដែលចេញផ្សាយជាផ្លូវការកាលពីសប្តាហ៍មុន បើពុំនោះទេនឹងត្រូវដាក់ទណ្ឌកម្មរាប់បញ្ចូលទាំងការពិន័យ ឬបណ្តេញចេញពីការប្រកួត។

អត្តពលិក និងមន្ត្រីប្រមាណ ១៨០០០នាក់ត្រូវបានគេរំពឹងថា នឹងស្នាក់នៅក្នុងភូមិកីឡាកំឡុងពេលព្រឹត្តិការណ៍កីឡាអូឡាំពិកដែលនឹងបើកទំព័រប្រវត្តិសាស្ត្រថ្ងៃទី២៣ ខែកក្កដាខាងមុខ៕

ប្រែសម្រួល៖ វីរបុត្រ
ប្រភព៖ insidethegames