ផ្ទុះវិញហើយ អ៊ីស្រាអែល កំពុងជួបរលកឆ្លងវីរុសបំប្លែងខ្លួនឥណ្ឌា

អ៊ីស្រាអែលកំពុងបង្កើនវិធានការណ៍ប្រឆាំងនឹងជំងឺកូវីដ ១៩ ឡើងវិញ ចំពេលមានការកើនឡើងនៃករណីឆ្លង វីរុសបំប្លែងខ្លួនឥណ្ឌា “Delta” ។

មន្ត្រីសុខាភិបាលបានរាយការណ៍ពីករណីឆ្លងថ្មីចំនួន ១២៥ ករណីកាលពីថ្ងៃអង្គារ ហើយវាជាលើកទីមួយក្នុងរយៈពេល ២ ខែ សម្រាប់ករណីឆ្លងមានលើសពី ១០០ ករណី ខណៈ ៧០ ភាគរយនៃករណីឆ្លងថ្មីគឺជាវីរុសបំប្លែងខ្លួនឥណ្ឌា “Delta” ។

ទន្ទឹមនោះ រដ្ឋាភិបាលអ៊ីស្រាអែលកំពុងជំរុញឲ្យប្រជាជន ចៀសវាងការធ្វើដំណើរដែលមិនចាំបាច់ទៅបរទេស ក៏ដូចជាអំពាវនាវដល់ឪពុកម្តាយអនុញ្ញាតឲ្យកូនរបស់ពួកគេ ដែលមានអាយុពី ១២ ទៅ ១៥ ឆ្នាំទទួលការចាក់វ៉ាក់សាំង ។

ចំណែកប្រធានក្រុមប្រឹក្សាជំនាញផ្ដល់យោបល់ជាតិជំងឺកូវីដ ១៩ អ៊ីស្រាអែល លោក Ran Balicer បាននិយាយថា “ខ្ញុំគិតថា នៅពេលអត្រានៃរោគរាតត្បាតនៅប្រទេសអ៊ីស្រាអែលកើនឡើង ជាមួយនឹងការផ្ទុះវីរុសបំប្លែងខ្លួនឥណ្ឌា “Delta” ដែលយើងកំពុងមើលឃើញនាពេលនេះ តម្រូវការរបស់ឪពុកម្តាយដើម្បីអនុញ្ញាតឲ្យកូនៗរបស់ពួកគេចាក់វ៉ាក់សាំង នឹងកើនឡើងដូចគ្នា” ។

កន្លងមកប្រទេសអ៊ីស្រាអែលបានបន្ធូរបន្ថយវិធានការណ៍រឹតត្បិត ខណៈចំនួនករណីឆ្លងប្រចាំថ្ងៃថ្មីបានធ្លាក់ចុះ ដោយសារអត្រាចាក់វ៉ាក់សាំងខ្ពស់ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ អ៊ីស្រាអែល ឲ្យចាក់វ៉ាក់សាំងកូវីដដល់ក្មេងៗអាយុពី ១២ ទៅ ១៥ ឆ្នាំ ក្រោយផ្ទុះវីរុសបំប្លែងខ្លួន