ព័ត៌មានអន្ដរជាតិ

ឆ្លងកូវីដកាន់តែខ្លាំង ឥណ្ឌូណេស៊ីកំពុងបន្ថែមមន្ទីរពេទ្យជាច្រើន

បានផុស

៣ years មុន

នៅ

ថ្ងៃសៅរ៍ ២៦ មិថុនា ២០២១

ដោយ

រដ្ឋមន្ត្រីក្រសួងសុខាភិបាលឥណ្ឌូណេស៊ីលោក Budi Gunadi Sadikin ប្រាប់ថា មន្ទីរពេទ្យ និងគ្រែត្រូវបានត្រៀមបន្ថែមជាច្រើននៅទីក្រុងហ្សាការតាដើម្បីទប់ទល់នឹងកូវីដ-១៩ដែលកំពុងហក់ឡើងខ្លាំង ខណៈធានាដល់សាធារណជនពីការផ្គត់ផ្គង់អ៊ុកស៊ីសែនគ្រប់គ្រាន់នៅកោះ Java។

ការត្រៀមបង្កើនមន្ទីរពេទ្យនេះបានធ្វើឡើង បន្ទាប់ពីចំនួនអ្នកឆ្លងកូវីដ-១៩ថ្មីប្រចាំថ្ងៃខ្ពស់បំផុត ២០៥៧៤នាក់ដែលបានបំបែកកំណត់ត្រារបស់ខ្លួន ហើយនៅទីក្រុងហ្សាការតាឆ្លងជាប់កំណត់ត្រា៧៥០៥នាក់។

លោកប្រធានាធិបតីឥណ្ឌូណេស៊ីពិនិត្យមើលការចាក់វ៉ាក់សាំង

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

និយាយក្នុងសន្និសីទកាសែត លោករដ្ឋមន្ត្រីថា មន្ទីរពេទ្យ Persahabatan, Sulianti Saroso និង Fatmawati ដែលទាំងអស់នេះស្ថិតនៅទីក្រុង នឹងកែប្រែជាមន្ទីរពេទ្យព្យាបាលកូវីដ-១៩ពេញលេញ។ រដ្ឋាភិបាលក៏បានត្រៀមមន្ទីរពេទ្យកូវីដបណ្តោះអាសន្មថ្មីមួយចំនួនទៀតនៅហ្សាការតា។ មន្ទីរពេទ្យទាំងនោះឧបត្ថម្ភដោយរដ្ឋាភិបាល និងព្យាបាលអ្នកឆ្លងដែលគ្មានរោគសញ្ញា និងជំងឺស្រាល។

ជាមួយគ្នានេះ ភូមិកីឡាដែលកសាងពេលរៀបចំការប្រកួតកីឡាទ្វីបអាស៊ីឆ្នាំ២០១៨នៅហ្សាការតាដែលបានធ្វើជាមន្ទីរពេទ្យបណ្តោះអាសន្នព្យាបាលកូវីដកាលពីឆ្នាំមុន ឥឡូវយកធ្វើជាកន្លែងព្យាបាលអ្នកជំងឺកូវីដ-១៩ធ្ងន់ធ្ងរ។

លោក Sadikin ឲ្យដឹងថា ៖«លើសពីនេះទៀត យើងមានគ្រែថ្មីរាប់រយដែលមានបំពាក់ឧបក្រណ៍ ព្រមទាំងមានក្រុមវេជ្ជបណ្ឌិត និងគិលានុប្បដ្ឋាកសម្រាប់ព្យាបាលអ្នកជំងឺកូវីដ។ យើងសង្ឃឹមថា សប្តាហ៍នេះ ការកែប្រែជាមន្ទីរពេទ្យនឹងត្រូវបានបញ្ចប់ ដូច្នេះវាអាចដាក់ចំនួនគ្រែបន្ថែមទៀត»។

លោកបន្ថែមថា មន្ទប់សង្គ្រោះបន្ទាន់នៅតាមមន្ទីរពេទ្យទីក្រុងហ្សាការតានឹងត្រូវបានប្រែក្លាយជាបន្ទប់កូវីដ-១៩ដាច់ដោយឡែក ខណៈតង់នឹងត្រូវបានតម្លើងនៅខាងក្រៅមន្ទីរពេទ្យដើម្បីបម្រើជាបន្ទប់សង្គ្រោះបន្ទាន់។

លោក Sadikin បានបញ្ជាក់ថា ឥណ្ឌូណេស៊ីមានគ្រែនៅមន្ទីរពេទ្យ៨៥០០០ ដោយមិនរាប់បញ្ចូលមន្ទីរពេទ្យ និងបន្ទប់កូវីដ-១៩ដាច់ដោយឡែកទេ។ ឥឡូវនេះ គ្រែ៦ម៉ឺនពេញដោយអ្នកជំងឺ។

លោករដ្ឋមន្ត្រីសុខាភិបាលបន្ថែមថា មន្ទីរពេទ្យមួយចំនួននៅ Java ប្រហែលជាកំពុងខ្វះអ៊ុកស៊ីសែន។ សមត្ថភាពផលិតអ៊ុកស៊ីសែនសរុបរបស់ឥណ្ឌូណេស៊ី ២៥%ត្រូវបានប្រើសម្រាប់គោលដៅវេជ្ជសាស្ត្រ និងផ្សេងទៀតសម្រាប់ឧស្សាហកម្ម។ ក្រុមផលិតកំពុងមានឆន្ទៈឧបត្ថម្ភអ៊ុកស៊ីសែនដល់ក្រសួងសុខាភិបាល បើត្រូវការឬខ្វះខាត។

ឥណ្ឌូណេស៊ីបានកំពុងតស៊ូនឹងការរាលដាលកូវីដ-១៩ ខ្លាំង បន្ទាប់ពីថ្ងៃឈប់សម្រាកនៃពិធិបុណ្យ Idul Fitri កាលពីខែមុនដែលគេឃើញប្រជាជនធ្វើដំណើរទៅស្រុកកំណើត ជួបជុំគ្នា និងមនុស្សច្រើនតាមតំបន់ទេសចរណ៍។

គិតត្រឹមថ្ងៃសុក្រម្សិលមិញ ប្រទេសឥណ្ឌូណេស៊ីមានករណីឆ្លងកូវីដ-១៩សរុប ២ ០៧២ ៨៦៧នាក់ និងករណីស្លាប់ ៥៦ ៣៧១នាក់៕