សត្រូវធំៗកំពុងផលិតសព្វាវុធទំនើបថ្មីៗ អាមេរិកព្រមានថា ពិភពលោក កាន់តែខិតទៅជិតសង្គ្រាមនុយក្លេអ៊ែរ មែនទែនហើយ

សហរដ្ឋអាមេរិកបានព្រមានថា មានសក្តានុពលកាន់តែខ្លាំងឡើង ចំពោះជម្លោះនុយក្លេអ៊ែរជាមួយសត្រូវធំៗរបស់ប្រទេសនេះ ពីព្រោះពួកគេទាំងនោះ កំពុងស្តុកទុកអាវុធនុយក្លេអ៊ែរកាន់តែច្រើនឡើងៗសម្រាប់ប្រើប្រាស់នាពេលខាងមុខ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមរបាយការណ៍ ដែលចេញផ្សាយកាលពីពេលថ្មីៗនេះ ពីមន្ទីរបញ្ចកោណស្តីពីប្រតិបត្តិការនុយក្លេអ៊ែរបានបង្ហាញថា ប្រទេសរុស្ស៊ីនិងចិន កំពុងធ្វើទំនើបកម្មនិងពង្រីកឃ្លាំងអាវុធរៀងៗខ្លួន ក្នុងរយៈពេលមួយទសវត្សរ៍ចុងក្រោយនេះ។

ហើយកូរ៉េខាងជើង បានពន្លឿនការសាកល្បងមីស៊ីលដែលមានសមត្ថភាព អាចបាញ់ទៅដល់ទឹកដីអាមេរិក ចំណែកអ៊ីរ៉ង់ មានបច្ចេកវិទ្យាអាចបង្កើតអាវុធនុយក្លេអ៊ែរក្នុងរយៈពេលត្រឹមមួយឆ្នាំ បើពួកគេចង់ធ្វើ។

របាយការណ៍នោះនិយាយថា សហរដ្ឋអាមេរិក បានព្យាយាមចរចាឲ្យមាននការកាត់បន្ថយសមត្ថភាពអាវុធនុយក្លេអ៊ែរ ចាប់តាំងពីឆ្នាំ២០១០មក ប៉ុន្តែគ្មានសត្រូវណាមួយ កាត់បន្ថយតួនាទីរបស់អាវុធនុយក្លេអ៊ែរនៅក្នុងយុទ្ធសាស្ត្រសន្តិសុខជាតិរបស់ពួកគេ ឬចំនួនអាវុធនុយក្លេអ៊ែរដែលពួកគេកំពុងមាននោះទេ។ យ៉ាងណាមិញ ពួកគេបានផ្លាស់ប្តូរទៅរកទិសដៅផ្ទុយពីនេះ។

ជាលទ្ធផល វាមានសក្តានុពលកាន់តែខ្លាំង ចំពោះជម្លោះក្នុងតំបន់ ពាក់ព័ន្ធនឹងសត្រូវប្រដាប់អាវុធនុយក្លេអ៊ែរនៅតាមផ្នែកជាច្រើន លើពិភពលោកនិងសក្តានុពលនៃការកើនឡើងអាវុធនុយក្លេអ៊ែររបស់សត្រូវ នៅក្នុងវិបត្តិឬជម្លោះ។

ប្រទេសរុស្ស៊ីនិងចិន គឺជាការគំរាមកំហែងដ៏ធ្ងន់ធ្ងរបំផុតចំពោះសហរដ្ឋអាមេរិក ដោយសារតែបច្ចេកវិទ្យានិងអាវុធដែលពួកគេមានរួចទៅហើយ។

ប្រទេសរុស្ស៊ី ដែលចាត់ទុកសហរដ្ឋអាមេរិកនិងអង្គការណាតូ ជាការគំរាមកំហែងចម្បងចំពោះមហិច្ឆតាភូមិសាស្ត្រនយោបាយបច្ចុប្បន្នរបស់ខ្លួន គឺកំពុងប្រើប្រាស់ក្បាលគ្រាប់និងជើងទម្របាញ់នុយក្លេអ៊ែរថ្មីៗ ហើយកំពុងអភិវឌ្ឍប្រព័ន្ធអាវុធនុយក្លេអ៊ែរអន្តរទ្វីបថ្មីចំនួន ៣ប្រភេទ។

ប្រព័ន្ធអាវុធទាំងនោះរួមមាន យន្ដហោះបច្ចេកវិទ្យាខ្ពស់ មីស៊ីលផ្លោងបាញ់ពីលើដីនិង មីស៊ីលស្វ័យភាពនៅក្រោមទឹក។

ចំណែកប្រទេសចិនវិញ បានបង្កើនចំនួននិងសមត្ថភាពនៃអាវុធនុយក្លេអ៊ែររបស់ខ្លួន រួមទាំងកាំជ្រួចមីស៊ីលបាញ់ចេញពីនាវាមុជទឹកទំនើបបំផុតរបស់ខ្លួន ផងដែរ។ ប្រទេសចិន ក៏កំពុងផលិតយន្តហោះទម្លាក់គ្រាប់បែកផងដែរ ដែលនឹងអនុញ្ញាតឲ្យចិន បាញ់អាវុធពីដីគោក សមុទ្រនិងអាកាស។

រីឯប្រទេសកូរ៉េខាងជើង បានបង្កើនល្បឿន ក្នុងការស្វែងរកអាវុធនុយក្លេអ៊ែរ និងបង្កើនការធ្វើតេស្តមីស៊ីលរបស់ខ្លួនយ៉ាងខ្លាំង នាពេលថ្មីៗនេះ រួមទាំងការធ្វើតេស្តមីស៊ីលអន្តរទ្វីបរយៈចម្ងាយឆ្ងាយ ដែលមានសមត្ថភាពបាញ់ទៅដល់ទឹកដី អាមេរិកផងដែរ។

របាយករណ៍របស់អាមេរិកបង្ហាញថា ការបន្តពង្រឹងសមត្ថភាពអាវុធនុយក្លេអ៊ែររបស់កូរ៉េខាងជើង បានបង្កជាការគំរាមកំហែងយ៉ាងខ្លាំងបំផុត ដល់សន្តិសុខនិងស្ថិរភាពអន្តរជាតិ។

របាយការណ៍របស់មន្ទីរបញ្ចកោណនិយាយថា អ៊ីរ៉ង់មានបច្ចេកវិទ្យានិងសមត្ថភាព ក្នុងការអភិវឌ្ឍអាវុធនុយក្លេអ៊ែរ ត្រឹមរយៈពេលមួយឆ្នាំ បើប្រទេសនេះសម្រេចចិត្តធ្វើដូច្នេះ។

យុទ្ធសាស្រ្តនិងសកម្មភាពឈ្លានពានរបស់អ៊ីរ៉ង់ដើម្បីធ្វើឲ្យរដ្ឋាភិបាលប្រទេសជិតខាង មានភាពចលាចល បានចោទជាសំណួរអំពីការប្តេជ្ញាចិត្តយូរអង្វែងរបស់ខ្លួន ចំពោះការបោះបង់សមត្ថភាពអាវុធនុយក្លេអ៊ែរ៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ ពូទីន៖ ទោះបាញ់ពន្លិចនាវាចម្បាំងអង់គ្លេស ក៏សង្គ្រាមលោកលើកទី៣ មិនផ្ទុះឡើងដែរ ព្រោះលោកខាងលិចដឹងថា ខ្លួនមិនឈ្នះរុស្ស៊ី