ព័ត៌មានអន្ដរជាតិ

ប្រជាជនឥណ្ឌូនេស៊ីងាកទៅរកអាហារនិងភេសជ្ជៈដែលជឿថាអាចការពារកូវីដ តែអាជ្ញាធរព្រមាន

បានផុស

៣ years មុន

នៅ

ថ្ងៃអង្គារ ២០ កក្កដា ២០២១

ដោយ

ប្រជាជនឥណ្ឌូនេស៊ីបាននាំគ្នាសម្រុកទិញអាហារសុខភាពដូចជាភេសជ្ជៈ ទឹកដោះគោ និងទឹកដូងជាដើមដែលពួកគេជឿថាអាចការពារ និងព្យាបាលកូវីដ-១៩បាន បន្ទាប់ពីមានសារផ្ញើតៗគ្នា ប៉ុន្តែអាជ្ញាធរសុខាភិបាលបានព្រមានកំពុងទទួលព័ត៌មានមិនពិត។

សារដែលអះអាងថា មានប្រសិទ្ធភាពក្នុងការការពារ និងព្យាបាលជំងឺកូវីដ-១៩ត្រូវបានផ្ញើជូនគ្នាពីម្នាក់ទៅម្នាក់ និងបង្ហោះនៅលើបណ្តាញទំនាក់ទំនងសង្គមយ៉ាងខ្លាំងដែលបានធ្វើឲ្យតម្រូវការនៃអាហារទាំងនោះកើនឡើង ហើយតម្លៃក៏ឡើងខ្ពស់ដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទោះបីជាយ៉ាងណា អ្នកជំនាញសុខភាពបានសម្តែងការព្រួយបារម្ភជុំវិញផលប៉ះពាល់នៃការប្រើប្រាស់អាហារ និងភេសជ្ជៈទាំងនោះ។

លោកវេជ្ជបណ្ឌិត Siti Nadia Tarmizi អគ្គនាយកមជ្ឈមណ្ឌលគ្រប់គ្រង និងបង្ការជំងឺឆ្លងរបស់ក្រសួងសុខាភិបាលឥណ្ឌូនេស៊ីបាននិយាយថា ៖«ប្រជាជនកំពុងទទួលបានព័ត៌មានខុសអំពីអាហារទាំងនោះដែលអះអាងថាអាចព្យាបាលកូវីដ-១៩បាន ឬអាចការពារមិនឲ្យឆ្លង ឬជួយកាត់បន្ថយអាការរោគសញ្ញាខ្លះ»។

លោកបញ្ជាក់ថា ៖«មិនមានការសាកល្បងវេជ្ជសាស្ត្រណាមួយបង្ហាញថា អាហារទាំងនោះមានប្រសិទ្ធភាពក្នុងការការពារមិនឲ្យឆ្លង និងព្យាបាលកូវីដ-១៩ឲ្យជាសះស្បើយបានឡើយ»។

លោក Mdm Tarmizi មានប្រសាសន៍ថា ក្រសួងសុខាភិបាលបានព្រមានម្តងហើយម្តងទៀតដល់សាធារណជនកុំឲ្យរក្សាទុកទំនិញទាំងនោះ ប៉ុន្តែមិនដឹងជាសារមកពីណាបានធ្លាក់ទៅលើមនុស្សដែលមិនបានពិចារណាឲ្យច្បាស់លាស់។

ប៉ុន្មានសប្តាហ៍កន្លងទៅនេះ មានវីដេអូបង្ហាញឲ្យឃើញពីប្រជាជនឥណ្ឌូនេស៊ីកំពុងច្រានគ្នាទៅវិញទៅមកដើម្បីទិញទឹកដោះគោម៉ាកល្បីមួយប្រភេទ។ ករណីនេះបានកើតមានឡើងដោយសារតែព័ត៌មានមិនបានបញ្ជាក់ថា ទឹកដោះគោនោះម៉ាកអ្វីទេ ប៉ុន្តែគេជឿថា វាអាចជួយបង្កើនអង់ទីគ័រដែលការពារកូវីដ-១៩បាន។

ភ្លាមៗនោះ តម្រូវការទឹកដោះគោនោះបានកើនឡើងយ៉ាងលឿន ហើយអ្នកលក់ត្រូវបានគេនិយាយថា បានឡើងតម្លៃខ្ពស់ដល់ទៅ៥ដងឯណោះ។

ស្ត្រីឈ្មោះ Merry Sihombing បាននិយាយថា ៖«វាពិបាកដើម្បីរកទិញទឹកដោះគោនោះណាស់ប៉ុន្មានថ្ងៃនេះ អីចឹងហើយបានជាខ្ញុំបានព្យាយាមទិញបានខ្លះ តាមដែលអាចធ្វើទៅបាន។ គេប្រាប់ខ្ញុំថា ទឹកដោះគោនោះល្អណាស់។ ខ្ញុំមិនជឿថា វានឹងអាចបញ្ឈប់មិនឲ្យគ្រួសារខ្ញុំឆ្លងកូវីដទេ តែគ្មានបញ្ហាទេគ្រាន់តែប្រុងប្រយ័ត្នបន្ថែម»។

លោកវេជ្ជបណ្ឌិត Hermawan Saputra មកពីសមាគមអ្នកជំនាញសុខភាពសាធារណៈឥណ្ឌូនេស៊ី (IAKMI) បានឲ្យដឹងថា ប្រជាជនកាន់តែច្រើនៗឡើងរកវិធីការពារខ្លួនឯង។

លោកបានលើកឡើងថា ៖«កូវីដ-១៩បានកំពុងវាយប្រហារមួយឆ្នាំកន្លះហើយ ហើយប្រជាជនកំពុងឃើញការរាលដាលឆ្លងខ្លាំងហួសពីការគ្រប់គ្រង។ ប្រព័ន្ធសុខាភិបាលពោរពេញដោយអ្នកជំងឺ ហើយមិនមានសញ្ញាដែលជំងឺនេះធូរស្រាលសោះ»។

«ក្នុងដំណាក់កាលនេះ មនុស្សកាន់តែច្រើនឡើងមានអារម្មណ៍ថា ពួកគេត្រូវការការពារខ្លួនឯង និងក្រុមគ្រួសាររបស់ពួកគេ។ ជាអកុសល រឿងខ្លះបានកើតមានឡើងធ្វើឲ្យពួកគេជឿ»។

លោកវេជ្ជបណ្ឌិត Pandu Riono អ្នកឯកជំងឺឆ្លងនៅសាកលវិទ្យាល័យឥណ្ឌូនេស៊ីបាននិយាយថា ៖«ជម្រើសល្អបំផុតដើម្បីការពារខ្លួនពីកូវីដ-១៩គឺគោរពតាមវិធានការសុខាភិបាល ពាក់ម៉ាស់ កុំទៅកន្លែងមនុស្សច្រើន និងលាងដៃឲ្យបានញឹកញាប់»៕

ប្រែសម្រួល៖ វីរបុត្រ
ប្រភព៖ CNA