ខណៈនេះ ជប៉ុន ជួបព្យុះត្រូពិក និងកំពុងបង្កឲ្យមានការបាក់ដីនៅតំបន់រៀបចំការប្រកួតអូឡាំពិក

ព្យុះត្រូពិកមួយបានវាយប្រហារភាគខាងជើងប្រទេសជប៉ុននៅថ្ងៃពុធនេះ ប៉ុន្តែមិនទាន់មានសេចក្តីរាយការណ៍អំពីការខូចខាត និងប៉ះពាល់ដល់ការប្រកួតបាល់ទាត់អូឡាំពិកនៅក្នុងតំបន់នេះនោះទេ ។

អាជ្ញាធរក្នុងតំបន់បានចេញបទបញ្ជាជម្លៀសប្រជាជន និងបង្កើតជម្រកគ្រាអាសន្ន នៅពេលព្យុះត្រូពិក Nepartak បានធ្វើឲ្យមានការបាក់ដីនៅតំបន់ Miyagi ភាគខាងជើងប្រទេសជប៉ុនភ្លាមៗ មុនម៉ោង ៦ ព្រឹក ។

តំបន់ Miyagi នឹងរៀបចំការប្រកួតបាល់ទាត់អូឡាំពិកនៅថ្ងៃពុធនេះ ប៉ុន្តែអ្នករៀបចំកម្មវិធីបាននិយាយថា ការប្រកួតនឹងមិនរងផលប៉ះពាល់នោះទេ ។

យោងតាមទីភ្នាក់ងារឧតុនិយមជប៉ុនឲ្យដឹងថា ព្យុះនេះកំពុងបោកបក់ទៅភាគខាងត្បូងទីក្រុង Morioka ក្នុងខេត្ត Iwate ដែលនាំមកនូវខ្យល់បក់ខ្លាំងក្នុងល្បឿន ៩០ គីឡូម៉ែត្រក្នុងមួយម៉ោង ។

ទន្ទឹមនោះ ភ្លៀងធ្លាក់ខ្លាំងបានជំរុញឲ្យទីក្រុងមួយចំនួននៅខេត្ត Iwate ចេញការព្រមានអំពីការបាក់ដី ហើយសេវាកម្មរថភ្លើងក្នុងស្រុកមួយចំនួនត្រូវបានផ្អាក ។

ប៉ុន្តែព្យុះនេះត្រូវបានគេព្យាករណ៍ថានឹងចុះខ្សោយ នៅពេលវាធ្វើដំណើរទៅភាគពាយព្យ និងឆ្ពោះទៅសមុទ្រជប៉ុននៅពេលល្ងាច ។

គួរបញ្ជាក់ថា រដូវខ្យល់ព្យុះរបស់ជប៉ុនចាប់ផ្តើមពីជុំវិញខែឧសភាដល់ខែតុលា និងឈានដល់ខែសីហា និងកញ្ញា ខណៈកាលពីឆ្នាំ ២០១៩ ព្យុះទីហ្វុង Hagibis បានវាយលុកចូលជប៉ុន នៅពេលដែលប្រទេសនេះធ្វើជាម្ចាស់ផ្ទះការប្រកួតបាល់ឱបពិភពលោក ដោយសម្លាប់មនុស្សជាង ១០០ នាក់ ៕

ប្រែសម្រួលដោយ ៖ ជីវ័ន្ត

ប្រភព ៖ CNA

ចុចអាន ៖ ក្រុមហ៊ុនឱសថមួយរបស់ ជប៉ុន ចាប់ផ្តើមធ្វើតេស្តថ្នាំគ្រាប់ព្យាបាលកូវីដ