តាមផ្លូវវាយលុកទៅបន្ទាយចុងក្រោយ ក្រុមតាលីបង់ រាប់រយនាក់ត្រូវបានកម្ចាត់ដោយចលនាតស៊ូប្រដាប់អាវុធ អាហ្វហ្គានីស្ថាន

ចលនាតស៊ូប្រដាប់អាវុធអាហ្វហ្គានីស្ថានបាននិយាយថា ពួកសកម្មប្រយុទ្ធប្រហែល ៦០០ នាក់មកពីក្រុមតាលីបង់ត្រូវបានកម្ចាត់នៅខេត្ត Panjshir ភាគឦសានប្រទេសអាហ្វហ្គានីស្ថានកាលពីថ្ងៃសៅរ៍ ។

លោក Fahim Dashti អ្នកនាំពាក្យរបស់ចលនានេះបាននិយាយថា “ភេរវករតាលីបង់ប្រហែល ៦០០ នាក់ត្រូវបានកម្ចាត់នៅតាមតំបន់ផ្សេងៗនៃទីក្រុង Panjshir តាំងពីព្រឹកព្រលឹម” ។

ទន្ទឹមនោះ លោក Fahim បានសរសេរលើបណ្ដាញ Twitter ថា “ក្រុមសកម្មប្រយុទ្ធតាលីបង់ជាង ១ ពាន់នាក់ត្រូវបានចាប់ខ្លួន ឬប្រគល់ខ្លួន” ។

អ្នកនាំពាក្យរូបនេះបានបន្ថែមថា តាលីបង់មានបញ្ហាក្នុងការទទួលការផ្គត់ផ្គង់ពីខេត្តអាហ្វហ្គានីស្ថានផ្សេងទៀត ក៏ដូចជាដោយសារគ្រាប់មីនដែលបង្កប់តាមផ្លូវឆ្ពោះទៅខេត្ត Panjshir ដោយចលនានេះ ។

គួរបញ្ជាក់ថា ខេត្ត Panjshir គឺជាបន្ទាយនៃរណសិរ្សតស៊ូជាតិ (NRF) ដែលដឹកនាំដោយលោក Ahmad Massoud កូនប្រុសរបស់អតីតមេបញ្ជាការទ័ពព្រៃអាហ្វហ្កានីស្ថានលោក Ahmad Shah Massoud ។ លោក Massoud បានសន្យាថានឹងចុះចេញពីតំណែង ឬចុះចាញ់ក្នុងករណីដែលក្រុមនេះបង្កើតរដ្ឋាភិបាលរួមបញ្ចូលគ្នា និងធានាសិទ្ធិស្មើគ្នាសម្រាប់ជនជាតិអាហ្វហ្កានីស្ថានទាំងអស់ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ ការវាយលុករបស់ តាលីបង់ ទៅខេត្តចលនាប្រដាប់អាវុធ អាហ្វហ្គានីស្ថាន ត្រូវជាប់ផុង ដោយសារការបង្កប់មីន